بىلتىر العاش رەت قىتاي نارىعىنا قازاقستاندىق بالمۇزداق پەن ەت شىعارىلسا, بىرىككەن اراب امىرلىكتەرىنە بال ونىمدەرى ەكسپورتتالدى. ەلىمىزدىڭ سىرتقى ساۋدا نارىعىنا ۇسىناتىن ونىمدەرى جايلى يندۋستريا جانە ينفراقۇرىلىمدىق دامۋ ۆيتسە-ءمينيسترى ارىستان قابىكەنوۆ ۇكىمەت ۇيىندە وتكەن ءباسپاسوز ءماسليحاتىندا مالىمدەدى.
ونىڭ ايتۋىنشا, ەكسپورتقا شىعارىلاتىن ونىمدەر سانى جىل سايىن 8-10 ونىمگە ارتۋدا. بيىل وتاندىق تەمىر جول ونىمدەرىن مىسىر, ازەربايجان, وزبەكستان سياقتى ەلدەردىڭ نارىعىنا شىعارۋ جوسپارلانىپ وتىر. سونىمەن قاتار اممياك سەليتراسىن گرۋزياعا ەكسپورتتاۋ كوزدەلگەن.
− بۇعان قوسا, سارى فوسفور مەن فوسفورلى-كالي تىڭايتقىشتارى اقش, گەرمانيا, پولشا, چەحيا نارىعىنا شىعارىلسا, اۋعانستان, سينگاپۋر مەن قىتايعا سۋ, ءسۇت, ەت ونىمدەرى ەكسپورتتالادى. قىرعىزستانعا جەڭىل اۆتوكولىكتەر, تاجىكستانعا ارماتۋرا, تاتارستانعا جارما, جاپونياعا ماقسارى مايى جىبەرىلمەك, – دەدى ا.قابىكەنوۆ.
ەلىمىزدىڭ بىلتىرعى جالپى ەكسپورت كولەمى 54,7 ملرد اقش دوللارىن قۇرادى. بۇل كورسەتكىش وتكەن جىلمەن سالىستىرعاندا 26,4 پروتسەنتكە ارتىق. سونىمەن قاتار شيكىزاتتىق ەمەس ءونىم ەكسپورتىنىڭ كولەمى 3 پروتسەنتكە ارتقان. ايتا كەتەرلىگى, سوڭعى 5 جىلدا وڭدەۋ ونەركاسىبىندەگى ەكسپورت ۇلەسى 9%-كە ءوستى.
سونداي-اق ول وڭدەۋ ونەركاسىبىندەگى نەگىزگى ەكسپورتتىق ونىمدەردىڭ قاتارىندا لەگيرلەنگەن بولات, پىشىندەلگەن جانە ارنايى پروفيل, قۇبىر, جىكسىز پروفيل جانە باسقا دا مەتاللۋرگيالىق ونىمدەر بار ەكەنىن اتاپ كورسەتتى.
ەكسپورتتى دامىتۋعا مەملەكەت تاراپىنان ايتارلىقتاي قولداۋ بار. وعان دالەل, شيكىزاتتىق ەمەس ەكسپورتتى ۇلعايتۋ شارالارىن كۇشەيتۋ ماقساتىندا 2019-2021 جىلدارعا بولىنگەن قاراجات كولەمى – 500 ملرد تەڭگە. 2018 جىلدىڭ قورىتىندىسى بويىنشا KazakhExport كومپانياسى تاراپىنان قولداۋ كورسەتىلگەن ەكسپورتتىق كەلىسىمشارت سوماسى 419,7 ملرد تەڭگەنى قۇرادى.
ەركەجان ايتقازى,
«Egemen Qazaqstan»
