«جاڭا اقتاستى» كومپانياسى الماتى وبلىسىنداعى ەت ءوندىرىسىن كلاستەرلىك جولمەن دامىتۋعا كىرىسكەن بىرەگەي ۇيىم. شارۋاشىلىقتىڭ بازاسىنا كەگەن اۋدانىنىڭ اقتاستى اۋىلىنداعى رەپرودۋكتور مەن 6000 باسقا ارنالعان بورداقىلاۋ الاڭى, ساتى اۋىلىنداعى 100 باس كوشىم جىلقىسى مەن 400 مەرينوس قويىن ءوسىرىپ وتىرعان 600 باسقا ارنالعان رەپرودۋكتور جانە ەڭبەكشىقازاق اۋدانى قىربالتاباي اۋىلىندا بورداقىلاۋ الاڭى بار. جاقىندا وسى اۋىلدان تəۋلىگىنە 10 تونناعا دەيىن ەت وڭدەيتىن كاسىپورىن قۇرىلىسى اياقتالىپ, ىسكە قوسىلادى. ال مال بورقاقىلاۋعا قاجەت جەم-ءشوپ دە شارۋاشىلىقتىڭ شابىندىق القابى مەن ەگىستىكتەرىنەن دايىندالادى.
سونداي-اق, سەرىكتەستىك ءوندىرىستى عىلىممەن ۇشتاستىرىپ وتىر.اسىرەسە, اسىل تۇقىمدى ءىرى قارا ءوسىرۋدىڭ پايداسىن كورۋدە. قازىر شارۋاشىلىق قوراسىندا 1500 باس «ابەردين انگۋس» تۇقىمدى ءىرى قارا بار. اعىلشىن ەلىندە وسىرىلەتىن بۇل تۇقىمدى ءوسىرۋدىڭ شىعىن از, پايداسى مول بولىپ ەسەپتەلەدى ەكەن. «ابەردين انگۋس» سيىرلارىنىڭ ءتىرى سالماعى 500 – 700 كەلى تارتادى. ال 15-16 اي باعىمدا بولعان جاس مال 700 كەلىدەن 1000 كەلىگە دەيىن تازا ەت بەرەدى.
قالماحانبەت مۇقامەتقالي,
«Egemen Qazaqstan»
الماتى وبلىسى
