جاستار جىلىنا وراي, ىشكى ساياسات باسقارماسى وتكەن جىلدى قورىتىندىلاپ, اعىمداعى جىلدىڭ جوسپارلارىمەن ءبولىستى. وتكەن جىلدىڭ وزىندە ءتۇرلى مەملەكەتتىك باعدارلامالاردىڭ اياسىندا 4800 جاس ەڭبەككە ورنالاستىرىلسا, ونىڭ 300-گە جۋىعى «ديپلوممەن – اۋىلعا!» باعدارلاماسى بويىنشا ەلدى مەكەندەرگە جول تارتقان. بۇگىندە 276 ادام وبلىس اكىمىنىڭ شاكىرتاقىسىن الادى. ءبىر جىلدىڭ ىشىندە 50 مىڭ جاستى قامتىعان 600-گە جۋىق ءىس-شارا وتكىزىلگەن.
– جاستار جىلى اياسىندا «اقمولا جاستارى» باعدارلاماسى باستاۋ الدى. بۇگىندە وبلىستاعى جاستاردىڭ سانى 150 مىڭعا جۋىق. بۇل باعدارلاما اياسىندا كوكشەتاۋدا 424 وتباسىنا ارنالعان 6 تۇرعىن ءۇي سالىناتىن بولادى. اعىمداعى جىلى 4 بەس قاباتتى جانە 2 توعىز قاباتتى ءۇيدىڭ قۇرىلىسى باستالماق. بۇل ۇيلەردى ساتىپ الاتىن ۇمىتكەرلەرگە قويىلاتىن باستى تالاپتار – جاسى 35-تەن اسپاۋى قاجەت جانە وبلىستا تۇرىپ, جۇمىس ىستەۋى كەرەك. ەڭ جوعارعى قارىز سوماسى 10 ميلليون تەڭگەنى قۇرايتىن بولادى, – دەيدى وبلىستىق ىشكى ساياسات باسقارماسىنىڭ ءبولىم جەتەكشىسى دامير ىرگەباەۆ.
بۇگىندە «رۋحاني جاڭعىرۋ» جوبالىق كەڭسەسى دە جاستارمەن بەلسەندى جۇمىس جۇرگىزۋدە. جاستار جىلىنا وراي وبلىس ورتالىعىندا جاستار تەاترى قۇرىلاتىن بولادى. 20 اقپان كۇنى دوستار مادەنيەت سارايىندا تەاتردىڭ العاشقى پرەمەراسى وتەدى. بۇدان بولەك, جوبالىق كەڭسە بالاباقشا, مەكتەپتەرمەن, جوعارى وقۋ ورىندارىمەن دە جۇمىس جۇرگىزۋدە.
– كەلەسى اپتادا بالاباقشالاردى ارالاپ, قازاقشا مۋلتفيلمدەر جازىلعان ديسكتى اپارىپ بەرىپ, كەيىپكەرلەرىن ويناتىپ, سول ارقىلى ولاردى ۇلتتىق دۇنيەتانىمعا باۋليمىز, تارتامىز. ودان قالا بەردى جوعارى وقۋ ورىندارىندا ءتىل مارافونىن وتكىزبەكپىز, – دەيدى «رۋحاني جاڭعىرۋ» جوبالىق كەڭسەسىنىڭ جەتەكشىسى مەرگەن توقسانباي.
جاستار ساياساتىن جۇزەگە اسىرۋدا «نۇر وتان» پارتياسىنىڭ جانىنداعى «جاس وتان» جاستار قاناتى دا ەلەۋلى ۇلەسىن قوسۋدا. ماسەلەن, بۇگىنگى كۇنى «جاس وتاننىڭ» قۇرامىندا 9000-عا جۋىق بەلسەندى بار. ولار 16 مەن 29 جاس ارالىعىنداعى جاستار. جاسوتاندىقتار قوعامنىڭ بارلىق سالاسىنا بەلسەنە ارالاسىپ, جاستاردى ىنتالاندىرۋعا, دامىتۋعا باعىتتالعان جوبالاردى جۇزەگە اسىرۋدا.
بايقال ءبايادىل,
«Egemen Qazaqstan»
اقمولا وبلىسى
