ماركەتينگ مەكتەبى بىرنەشە باعىت بويىنشا جۇمىس ىستەيدى. مۇندا بيزنەس-ترەنەرلەر مەن جەكە كومپانيالاردىڭ باسشىلارى كاسىپكەرلەرگە ماركەتينگ پەن مەنەدجمەنتتى ۇيرەتەدى. كەزدەسۋ بارىسىندا وبلىستىق كاسىپكەرلەر پالاتاسى مەن قازاقستاندىق ماركەتولوگتار قاۋىمداستىعى اراسىندا ەكىجاقتى ىنتىماقتاستىق مەموراندۋمىنا قول قويىلدى.
– كەيبىر كاسىپكەرلەر ماركەتينگتىڭ ماڭىزدىلىعىن تۇسىنە بەرمەيدى. سول سەبەپتى كاسىبي تۇردە وقىتۋ يدەياسى پايدا بولدى. كوپشىلىك ماركەتينگتى تەك جارناما, عالامتورداعى بەلسەندىلىك رەتىندە قابىلدايدى. شىن مانىندە, ماركەتينگ دەگەنىمىز – بيزنەستى جوسپارلاۋ, تالداۋ. قازىر قازاقستاندا كاسىبي ماركەتولوگتار ساۋساقپەن سانارلىق,–دەيدى قازاقستاندىق جارناما, PR جانە ماركەتينگ قاۋىمداستىعىنىڭ پرەزيدەنتى تيمۋر ءسابيتوۆ.
وبلىستىق كاسىپكەرلەر پالاتاسى كاسىپورىن باسشىلارىنا بيزنەس-جوبالاردى جۇزەگە اسىرۋعا كومەكتەسىپ كەلەدى. باستى مىندەت – كاسىپكەرلەردى كاسىپكەرلىككە ماشىقتاندىرىپ, ءوز ءونىمىن ساتۋعا كومەكتەسۋ. كاسىپكەر ءۇشىن ءبىلىم مەن تاجىريبەنى ۇشتاستىرىپ وتىرۋ ماڭىزدى.
رەسپۋبليكا بويىنشا 2013 جىلى العاشقى ىرگەتاسى قالانعان اتالمىش مەكتەپتە كۇنى بۇگىنگە دەيىن 300-دەن استام كاسىپكەر ءبىلىم العان.
بايقال ءبايادىل,
«Egemen Qazaqstan»
اقمولا وبلىسى
