بۇل كۇندەرى وبلىس بويىنشا 228 مىڭعا جۋىق ادام بۇقارالىق سپورتپەن شۇعىلدانادى. وبلىستىق دەنە تاربيەسى جانە سپورت باسقارماسىنىڭ مالىمەتىنشە, وتكەن جىلعى سپورتتىق شارالارعا 160 مىڭنان استام ادام قاتىسقان. مەكتەپتەر مەن كوللەدجدەردەگى, جوعارى وقۋ ورىندارىنداعى سپورت زالداردى ساباقتان تىس ۋاقىتتا كوپشىلىكتىڭ دە پايدالانۋىنا رۇقسات. وبلىس كولەمىندە 202 فۋتبول الاڭى جۇمىس ىستەيدى. ولاردىڭ 10-ى تولىق ولشەمدى الاڭدار بولسا, 192-ءسى جاساندى جامىلعىلى شاعىن فۋتبول الاڭدارى.
بۇل كۇندەرى الداعى 5 جىلعا بۇقارالىق سپورتتى دامىتۋدىڭ ستراتەگياسى ازىرلەندى. وبلىس اكىمدىگى «قازاقستاندىق STREET WORKOUT فەدەراتسياسىنا», «سامۇرىق-قازىنا» اكتسيونەرلىك قوعامى مەن «ەRG» كومپانياسىنا كوپفۋنتسيونالدىق سپورتتىق الاڭدار سالۋعا دەمەۋشىلىك كورسەتكەندەرى ءۇشىن العىس بىلدىرەدى.
مىسالى, «ەRG» كومپانياسىنىڭ دەمەۋشىلىگىمەن وڭىردە 62 كوپفۋنتسيونالدى الاڭ ىسكە قوسىلعان. «سامۇرىق-قازىنا» اق 14 سپورتتىق نىساندى پايدالانۋعا بەرگەن. باياناۋىلداعى مىرزاشوقى تاۋ-شاڭعى بازاسىنىڭ قۇرىلىسىنا ERG كورپوراتسياسى 300 ميلليون تەڭگە بولگەن. باسقارمانىڭ مالىمەتىنشە, وبلىس ورتالىعىندا مەملەكەتتىك-جەكەمەنشىك ارىپتەستىك شەڭبەرىندە جابىق جەڭىل اتلەتيكا مانەجى, جابىق فۋتبول مانەجى, وليمپيادالىق رەزەرۆ دايارلاۋ ورتالىعى, ەسكەك ەسۋگە ارنالعان ارنايى ورىن مەن ۋسولكا وزەنى ارناسىندا ترياتلون مەن بياتلون ساياباعىن اشۋ جوباسى ازىرلەنۋدە.
بىلتىر ءتۇرلى مەنشىك فورماسىنداعى 115 سپورتتىق عيمارات پايدالانۋعا بەرىلدى. اقسۋ قالاسى اۋىلدىق اۋماعىنا قاراستى قىزىلجار اۋىلىنداعى دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى. بۇگىندە جەلەزين اۋدانى مەن پاۆلودارسكوە اۋىلىندا دەنەشىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلۋدە.
كوشە سپورتىن دامىتۋدا وبلىس ورتالىعىندا بىرقاتار Street Workout الاڭدارى اشىلعان ەدى. الداعى ۋاقىتتا بۇل جۇمىس جالعاسادى. وبلىس ورتالىعىنداعى 50 سپورت الاڭىن كۇتىپ, باقىلاۋ جۇمىسى «ەرتىس» سپورت كلۋبىنا جۇكتەلگەن. جاڭادان اشىلاتىن سپورت نىساندارى پاتەر يەلەرى كووپەراتيۆ-تەرىنىڭ قۇزىرىنا بەرىلەدى. جالپى, وبلىستا اشىق اسپان استىنداعى سپورت الاڭدارىنان بولەك, 37 اۋلا كلۋبى جۇمىس ىستەيدى. مۇنداعى ۇيىرمەلەر تەگىن جۇرگىزىلەدى.
باسقارمانىڭ مالىمەتىنشە, س.تورايعىروۆ اتىنداعى مەملەكەتتىك ۋنيۆەرسيتەتى مەن مەملەكەتتىك پەداگوگيكالىق ۋنيۆەرسيتەتى دەنە شىنىقتىرۋ ءپانى مۇعالىمدەرىن دايارلايدى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن ۆالەري بۋگاەۆ
