− بۇل كۇندەرى ءبىزدىڭ مەكتەپتە ءبىر مىڭنان استام بالا جاتتىعادى, – دەپ باستادى اڭگىمەسىن سپورت مەكتەبىنىڭ باسشىسى. – تەك بالالار ەمەس, قالا تۇرعىندارى دا باسسەينگە كەلىپ, سۋعا جۇزەدى, دەنساۋلىقتارىن تۇزەيدى. قازىر مەكتەپتە سۋ دوبى, سۋعا سەكىرۋ, ءجۇزۋ, بايداركا جانە كانوە ەسۋ, بايداركا جانە كانوەدەن اعىندى تاۋ سۋىندا ءجۇزۋ بولىمدەرى بار. قالانىڭ سىرتىنداعى «ەللينگ» بايداركا, كانوە ەسۋ بازاسىندا كوكتەم شىعا كۇزگە دەيىن جاتتىعۋ ءبىر ساتكە دە تىنبايدى. ءبىلىمدى دە بىلىكتى 30 باپكەر شاكىرتتەرگە ساباق بەرەدى. ولاردىڭ قاتارىندا قازاقستان رەسپۋبليكاسىنا ەڭبەگى سىڭگەن جاتتىقتىرۋشىلار ليۋبوۆ كراساۆينا, ماريا گريگورەۆانى ەرەكشە اتاپ وتكەن ورىندى. ولار باپتاعان شاكىرتتەر حالىقارالىق, رەسپۋبليكالىق جانە وبلىستىق جارىستاردا توپ باسىنان كورىنۋدە. بايداركا, كانوە ەسۋدەن لاريسا لۋكيچەۆا دەگەن تاجىريبەلى جاتتىقتىرۋشىمىز بار. ونىڭ قىزى ءارى شاكىرتى ەكاتەرينا سميرنوۆا (تەگىن وزگەرتكەن) بەيجىڭدەگى جازعى وليمپيا ويىندارىنا قاتىسىپ, العاشقى وندىقتان كورىنگەن. قازىر ول ەكاتەرينانى 2020 جىلعى وليمپياداعا دايىنداۋدا. سونىمەن بىرگە ۆ.افاناسەنكوۆ, م.فيليمونوۆ, ق.مۇقامەدجانوۆ تا جاس ۇرپاققا ساپالى ءبىلىم, سانالى تاربيە بەرۋدە. سۋعا سەكىرۋ, سۋ دوبىنان, جۇزۋدەن قاراعاندى, تەمىرتاۋ قالالارىنان تاجىريبەلى باپكەرلەر ە.سيزينتسەۆ, ا.رەيماندى شاقىرىپ, ولارعا جاعداي جاسادىق.
− شاكىرتتەرىڭىز اراسىنان ازيا جانە ەل چەمپيوناتتارىندا توپ جارعان ساڭلاقتار بار ما؟
− بيىلعى جىلدىڭ قىركۇيەگىندە يسپانيادا سۋ سپورتى تۇرلەرىنەن 2020 جىلى توكيودا وتەتىن وليمپيا ويىندارىنا جولداما ۇلەستىرەتىن ليتسەنزيالىق الەم چەمپيوناتى وتەدى. وعان بىزدەن بەس بىردەي سپورتشى قاتىسادى. دجاكارتاداعى ازيا ويىندارىنا قاتىسىپ, قولا مەدال يەلەنگەن تالانتتى سپورتشى الەكساندر كۋليكوۆ, ءتورتىنشى ورىندى قاناعات تۇتقان كاميللا سافينا, قۋانىش ەرەنعايىپوۆ, پەتر ۆولكوۆ, ەكاتەرينا سميرنوۆا باقتارىن سىناپ كورمەك. ەگەر قاجەتتى ۇپايدى جيناسا, ولار وليمپياداعا قاتىسادى.
− سوڭعى جىلدارى وسكەمەندە سۋعا جۇزۋدەن 14-15 جاستاعى, ودان دا كىشىرەك بالالار اراسىندا «التاي جۇلدىزى» اتتى رەسپۋبليكالىق تۋرنير ءوتىپ كەلەدى. ونى وتكىزۋگە ءوزىڭىز باستاما كوتەرىپسىز. بۇل سايىس ءداستۇرلى وتە بەرە مە؟
− سيقىرى مول سۋ سپورتى بىزگە قاراعاندا ەۋروپا, مۇحيتتىڭ ارعى جاعىنداعى ەلدەردە ەرەكشە دامىعان. ءبىر عانا مىسال, اۋستراليالىق يان تورپ, امەريكالىق فەلپس ءبىر وليمپيا ويىندارىندا عانا بەستەن سەگىزگە دەيىن التىن القانى ۋىستاپ العانى بەلگىلى. ريوداعى وليمپيادادا الماتىلىق دميتري بالاندين ايدى اسپانعا شىعارىپ, التىن العاندا بوركىمىزدى اسپانعا لاقتىرىپ شاتتاندىق. سول-اق ەكەن ەلىمىز بويىنشا جۇزدەگەن اتا-انا بالالارىن باسسەينگە جەتەكتەپ اكەلە باستادى. ءتىپتى, بىزدەگى باسسەينگە كەلىپ, ۇيىرمەلەرگە قاتىساتىن بالالاردىڭ سانى ەداۋىر ءوستى.
سۋ سپورتى تۇرلەرىنەن وليمپيادا باعدارلاماسىنا 48 جيىنتىق مەدال ساراپقا سالىنادى ەكەن. دەمەك, سۋ سپورتىنا ەلىمىزدە ەرەكشە نازار اۋدارىلۋى ءتيىس. وبلىس اكىمى دانيال احمەتوۆ سۋ سپورتىنىڭ وركەندەۋىنە ەرەكشە كوڭىل بولۋدە. «التاي جۇلدىزى» ءتۋرنيرىنىڭ اشىلۋىنا قاتىسىپ, بولاشاق چەمپيوندارعا ساتتىلىك تىلەدى. العاشقى تۋرنيردە شاكىرتتەرىمىز ءنۇرالى سوۆەتحانوۆ چەمپيون اتانسا, ەليزاۆەتا چەرنىشەۆا, نيكيتا ارەپەۆ ءۇشىنشى ورىنعا يە بولدى. بيىل قاراشادا وتەتىن تۋرنيرگە چەمپيونداردى شاقىرساق دەپ وتىرمىز, ولار بالالارمەن جۇزدەسىپ, شەبەرلىك سىنىبىن وتكىزەدى, تاجىريبەلەرىن بولىسەدى.
سۋ سپورتى دامي باستاعاننان بەرى وسكەمەننىڭ وزەن-كولدەرىندە, سۋعا شومىلاتىن جەرلەردە بالالاردىڭ سۋعا باتىپ كەتۋى ازايعانىن وبلىستىق ستاتيستيكا باسقارماسى حابارلادى. دەمەك, قالا, اۋدان اكىمدەرى جىلدىڭ ءتورت مەزگىلىندە سۋ سپورتىمەن شۇعىلدانۋعا بولاتىن جابىق, اشىق باسسەيندەردى سالۋعا كوشسە, ۇتارىمىز انىق. توتەنشە جاعدايلار جونىندەگى دەپارتامەنت ءبىزدىڭ باسسەيندە اۋداندار مەن قالالاردان كەلگەن نۇسقاۋشىلارمەن ساباق جۇرگىزە باستادى. ءار سەنبى سايىن ء«ۇمىت» بالالار ءۇيىنىڭ, «اق نيەت» مەكتەپ-ينتەرناتىنىڭ بالالارى باسسەينگە كەلىپ سۋدا جۇزەدى, ولارعا بىلىكتى ماماندار ءدارىس بەرەدى.
− شاكىرتتەرىڭىز اراسىندا قانشا سپورتشى ەلىمىزدىڭ قۇراما كومانداسىنا مۇشە؟
− ءبىزدىڭ مەكتەپتىڭ 46 وقۋشىسى قۇراماعا مۇشە بولىپ قابىلداندى. ولاردىڭ 13-ءى نەگىزگى, 2-ءۋى جاستار, ال 31-ءى جاسوسپىرىمدەر قۇراماسىندا ونەر كورسەتۋدە. 7 ادام حالىقارالىق دارەجەدەگى, 4-ەۋى سپورت شەبەرى, 31-ءى سپورت شەبەرلىگىنە ۇمىتكەر, 22-ءسى 1 رازريادتى سپورتشىلار. تۇلەكتەرىمىز سوڭعى بىرنەشە جىلدا 500-گە تارتا مەدال يەلەندى. ونىڭ 139-ى التىن, قالعانى كۇمىس, قولا مەدال.
اڭگىمەلەسكەن
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
وسكەمەن
