الگىندە سالماقتى زاكەڭ ءاپ-ساتتە ابىر-سابىر بولىپ, ەرىپ سالا بەردى. قۇشاعىنا قۇشىپ, بەتىنەن ءسۇيىپ:
− كىمنىڭ بالاسىسىڭ؟ – دەدى.
− اتالاردىڭ بالاسىمىن.
− اتالارىڭنىڭ اتى كىم؟
− ءابدىر, سارسەن, سادىربەك, نۇركەن!
قۇلاق ەلەڭ ەتە قالدى. جاۋابى قىزىقتىردى.
– باتىر اعامىزدىڭ كىشى شوبەرەسى بۇل. ماعان تۋعان جيەن ءارى. باۋىزداۋ قۇدام اۋكەڭنىڭ نەمەرەسى, – دەپ تانىستىرىلدى.
اۋكەڭ − ابۋباكىر ءابدىروۆ الىس-جاقىنعا بەلگىلى كىسى. اسىرەسە, قاراعاندىلىقتاردىڭ كوبى جاقسى بىلەدى. ۇزاق جىل قوعامدىق ءتارتىپتى ساقتاۋ, تىنىشتىقتى قورعاۋ جولىندا جۇمىستى جۇمىلدىرعان ادام. قالانىڭ بەيمازالاۋ ايماعى مايقۇدىقتى كوزگە قوراش ەتپەۋگە سىڭىرگەن ەڭبەگى ەل ەسىندە. كەۋدەسى ماراپات بەلگىلەرگە تولى, پولكوۆنيك شەنىندە جەتپىستىڭ جوتاسىنا شىققالى وتىرعان ارداقتى ازامات.
ەڭ باستىسى نۇركەن باتىردىڭ ەت باۋىر ءىنىسى تۇرعىسىندا جۇرت كوڭىلىنە ودان سايىن جىلى. داڭقتى اعاسىنا شەكسىز قۇرمەتىمەن, قاستەرىن اسىرۋعا ىستىق ىنتا-ىقىلاسىمەن ءسۇيىنىشتى جان.
«سۋ سۇزىلمەيدى, سۇيەك ۇزىلمەيدى» دەگەن وسى-اۋ شىعار. ءبىر بايقاعاننان باتىلدىعى, زەرەكتىگى سۇيكىمدى داۋلەت ەسىمدى بوتاقان ءابدىردىڭ قارا شاڭىراعىن ساقتاپ قالعان سارسەنىنەن تامىر جايعان بۇتاق ەكەن. اۋكەڭ اكەدەن جالعىز ۇل, وزىنەن ەكى ۇل بولسا, ەكەۋىنەن اتۇستار نەمەرەلەر ءسۇيۋ جازىپتى. كىشىسى الگى ساڭقىلداعان جەتكىنشەك.
جانە ءبىر عاجابى, داۋلەت نۇركەن اتاسىنىڭ ايگىلى ەرلىگىن جاساعان كۇنگە تۇسپا-تۇس دۇنيەگە كەلگەن. 1942 جىلى 19 جەلتوقساندا ستالينگراد مايدانى شەبىنە ەنتەلەگەن تانكتەردى جويۋ ءۇشىن اۋەگە كوتەرىلىپ, تاپسىرمانى ورىنداۋ كەزىندە جالىن شارپىعان ۇشاعىن جاۋ كۇشى شوعىرلانعان تۇسقا باعىتتاپ, قاھارماندىقپەن قازا تاپقان بولاتىن باتىر. سايكەستىك پە, جاراتۋشى يە جازۋى ما! قىرشىن كەتكەن قىران ارۋاعىن جاڭعىرتۋعا اللا تاعالا ىقىلاسى ءتۇسۋى مە دەيسىڭ.
– مەن اكەم سارسەن 49 جاسىندا ءوزى ەڭبەك ەتەتىن شاحتاداعى اپاتتا وپات بولعان سوڭ باعجان اجەنىڭ باۋرىندا ءوستىم. اجەم اعالى-ءىنىلى ۇشەۋدەن قالعان جالعىز تۇقىم ەكەنىمدى ايتىپ, قارا شاڭىراقتى ساقتاۋىما جەتكىزۋدى, ۇرپاقتى بولۋىمدى تىلەيتىن جارىقتىق. بۇگىندە اق تىلەۋىن بىزگە بەرىپ, اۋلەتىمىز كەڭەيدى. ادام ءوزىنىڭ سوڭىنان ەرگەن ۇرپاققا قاراپ كوڭىل جۇباتار, وشاق وتى وشپەۋىنە ءۇمىت ەتەر عوي. دانيارىما تيگەن قارا شاڭىراقتىڭ شىراعىن داۋلەتىم دە جارقىراتار دەپ تاۋبە ەتەمىن ىشتەي, – دەيدى اۋكەڭ.
بيىل جازدا نۇركەن باتىردىڭ تۋعانىنا 100 جىل تولادى. ۇزىلمەگەن ۇرپاق, سونبەگەن شىراق بار. دەمەك باتىر رۋحى جاساي بەرەدى.
ايقىن نەسىپباي
قاراعاندى
