ءباسپاسوز ءماسليحاتىنا «قازاقستاننىڭ ەكولوگيالىق ۇيىمدارىنىڭ قاۋىمداستىعى» زتب باسقارما توراعاسى ايگۇل سولوۆەۆا مەن بىرلەستىك توراعاسىنىڭ ورىنباسارى ەلدوس اباقانوۆ, ينتەرفاكس-ەرا اگەنتتىگىنىڭ ديرەكتورى الەكساندر مارتىنوۆ, حالىقارالىق «جاسىل» تەحنولوگيالار جانە ينۆەستيتسيالىق جوبالار ورتالىعىنىڭ جەتەكشىسى راپيل جوشىباەۆ قاتىستى.
ينتەرفاكس-ەرا اگەنتتىگى ديرەكتورىنىڭ ايتۋىنشا, 11 ءتۇرلى سالالىق رەيتينگىنى انىقتاۋعا قازاقستاننىڭ 200-دەن استام كومپانياسى قاتىسىپتى. ولاردىڭ باسىم بولىگى مۇناي-گاز, تاۋ-كەن, ماشينا جاساۋ ونەركاسىبى, ەنەرگيا تاراتۋ سالاسىنداعى كاسىپورىندار.
– مۇناي-گاز كومپانيالارىنىڭ اراسىندا «سنپس-اقتوبەمۇنايگاز», «قازترانسگاز», «تەڭىزشەۆرويل», «وزەنمۇنايگاز», «قازمۇنايگاز بارلاۋ ءوندىرۋ» كومپانيالارى, «قازمۇنايگاز» ۇلتتىق كومپانياسى جوعارى ناتيجە كورسەتتى, – دەدى ا.مارتىنوۆ.
قازاقستان مەن رەسەي كومپانيالارىنىڭ جالپى رەيتينگىندە قارا جانە ءتۇستى مەتاللۋرگياعا قاتىستى رەيتينگىدە «قازاقمىس» كورپوراتسياسى» جشس – 81-ورىندى, «جەزقازعانتۇستىمەتالل» اق – 107, ارسەلورميتتال تەمىرتاۋ» اق – 125, «قازاقستان ءاليۋمينيى» جشس – 139, «قازتسينك» جشس – 145-ورىندى يەلەنگەن.
ەكولوگيالىق-ەنەرگەتيكالىق تيىمدىلىك كورسەتكىشى بويىنشا «استانا-ايماقتىق ەلەكتر جەلىلەرى كومپانياسى» اق, «استانا-جىلۋترانزيت» اق, «سارىارقااۆتوپروم» جشس, «كەنتاۋ ترانسفورماتور زاۋىتى» اق, «كەمونت» اق جانە تاعى باسقا كاسىپورىنداردىڭ ناتيجەلەرى جوعارى.
جالپى, وڭىرلەردەگى لاستانۋ كورسەتكىشى بويىنشا اتىراۋ, قاراعاندى, وسكەمەن سىندى ءوندىرىسى دامىعان, ونەركاسىپ ورىندارى كوپ وبلىستار ءتىزىم باسىندا تۇر ەكەن.
– وسى ماقساتتا جەرگىلىكتى اتقارۋشى ورگاندارمەن بايلانىس ورناتىپ, وبلىس اكىمدىكتەرىمەن جانە رەسپۋبليكالىق ماڭىزى بار قالالاردىڭ اكىمدىكتەرىمەن كەلىسىم جاسادىق. ورتالىق ايماقتاردىڭ باسشىلىعىنا ينۆەستورلار مەن بيزنەس جوبالارعا «جاسىل» تەحنولوگيانى دامىتۋعا قاتىستى ادىستەمەلىك, قۇقىقتىق جانە تەحنيكالىق قولداۋ كورسەتەدى, – دەدى راپيل جوشىباەۆ.
«جاسىل» تەحنولوگيالاردى ەنگىزۋ, ەنەرگيانى ءتيىمدى پايدالانۋ كورسەتكىشتەرى, اۋاعا كومىرتەگىن تاراتۋ كولەمى سىندى ءتۇرلى ولشەمدەر بويىنشا ءىرى كومپانيالاردىڭ رەيتينگىن انىقتاۋ تۋرالى باستاما وتكەن جىلى قولعا الىنعان بولاتىن. ونى قازاقستاننىڭ ەكولوگيالىق ۇيىمدارى قاۋىمداستىعى ۇسىنعان ەدى. بۇل رەيتينگ وتاندىق كومپانيالاردىڭ قورشاعان ورتاعا تيگىزىپ جاتقان اسەرىن انىقتاۋعا, سونىمەن قاتار ولاردىڭ ەكولوگيالىق ساياساتتى اشىق جۇرگىزۋىنە مۇمكىندىك بەرمەك.
ارنۇر اسقار,
«Egemen Qazaqstan»
