جاتىر موينى وبىرى جاتىر مويىنى ەپيتەليىندە پايدا بولاتىن قاتەرلى ىسىك بولىپ تابىلادى. قازىرگى تاڭدا ماماندار ادام پاپيللوماسى ۆيرۋسى (اپۆ) مەن جاتىر موينى وبىرىنىڭ دامۋ قاتەرى اراسىنداعى بايلانىس بار ەكەندىگىن دالەلدەپ وتىر.
قازاقستاندا ونكوپاتولوگيا قۇرىلىمىندا جاتىر موينى وبىرى ءسۇت بەزى قاتەرلى ىسىگىنەن كەيىنگى ەكىنشى ورىندا تۇر. جىل سايىن ەلىمىزدە 1700-دەن استام ادامدا جاتىر موينى وبىرى انىقتالادى جانە ونىڭ 600-گە جۋىعى كوز جۇمادى.
جاتىر موينى وبىرى 40-44 جاستاعى قىز-كەلىنشەكتەر اراسىندا ءجيى بايقالادى.
ءوز كەزەگىندە ەلىمىزدە 2008 جىلدان بەرى جاتىر موينى وبىرىن ەرتە انىقتاۋ جونىندەگى ۇلتتىق سكرينينگ باعدارلاماسى ارەكەت ىستەپ كەلەدى
دۇيسەنبىدە وتكەن ءباسپاسوز ءماسليحاتىندا قر دسم «قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ» باسقارما ءتورايىمى, قر دسم باس ونكولوگى ديليارا قايداروۆا, قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ونكوگينەكولوگيا بولىمشەسىنىڭ مەڭگەرۋشىسى ەرلان كوكىباسوۆ, تاجىريبەلى ونكوگينەكولوگ تولقىن سادىقوۆا سىندى ەلىمىزدىڭ جەتەكشى ونكولوگتارى اتالمىش دەرتتىڭ الدىن الۋ, ونىڭ ىشىندە جاتىر موينى وبىرى مەن جاتىر موينى وبىرىنىڭ بەلگىلەرى, ۆاكتسيناتسيالاۋ قاۋىپسىزدىگى تۋرالى كەڭىنەن باياندادى.
سونداي-اق, قاڭتار ايىندا قازاقستاننىڭ ونكولوگيالىق ۇيىمدارىندا جاتىر موينى وبىرىنىڭ الدىن الۋ بويىنشا شارالار وتەدى.
ەلىمىزدىڭ باس ونكولوگى قازاق ونكولوگيا جانە راديولوگيا عىلىمي-زەرتتەۋ ينستيتۋتىندا, سونداي-اق ەلىمىزدىڭ بارلىق ونكولوگيالىق مەكەمەلەرىندە 2019 جىلدىڭ 26 قاڭتارىندا ساعات 09.00-دەن 14.00-گە دەيىن جاتىر موينى وبىرىنىڭ الدىن الۋ جانە ەرتە انىقتاۋ ءۇشىن اشىق ەسىك كۇنى وتەتىندىگىن مالىمدەدى.
بۇل كۇنى ايەلدەر تەگىن كەڭەس الا الادى, سونىمەن قاتار ونكوگينەكولوگتان تەكسەرىستەن ءوتىپ, وزدەرىن قىزىقتىرعان بارلىق سۇراقتارىن قويا الادى.
ايناش ەسالي,
«ەگەمەن قازاقستان»
الماتى
