بۇگىندە مەكتەپتەردى كەڭ جولاقتى ينتەرنەتكە قوسۋ جانە بەينە قۇرالدارمەن جابدىقتاۋ, سونداي-اق تسيفرلىق بىلىم بەرۋ رەسۋرستارىن دامىتۋ ماسەلەلەرىنىڭ ماڭىزى زور. سوڭعى جىلدارى بۇل باعىت بويىنشا ەداۋىر ىلگەرىلەۋ بايقالادى. ەلىمىزدەگى مەكتەپتەردىڭ باسىم بولىگى كەڭجولاقتى ينتەرنەتكە قوسىلىپ, مەكتەپتەر مەن مەكتەپتەن تىس ۇيىمداردا ىسكە قوسىلعان روبوتوتەحنيكا جانە 3D مودەلدەۋ ۇيىرمەلەرىنىڭ سانى ارتقان.
بۇل رەتتە ءبىلىم وشاقتارىندا جاپپاي قولدانىسقا ەنگەن «Kundelik.kz» ەلەكتروندى كۇندەلىك جانە جۋرنالدار جۇيەسىن ايرىقشا اتاۋعا بولادى. اتالعان جۇيە مۇعالىمدەرگە ەلەكتروندى فورماتتا جۋرنال تولتىرۋعا مۇمكىندىك تۋدىرسا, اتا-انالار قاۋىمى ءۇشىن بالاسىنىڭ ۇلگەرىمىن قاشىقتىقتان-اق قاداعالاۋعا جول اشقان. ماماندار جۇيە جۇمىسىن باستاعالى بەرى وقۋشىلاردىڭ ۇلگەرىم ساپاسى مەن تارتىبىندە وڭ وزگەرىستەر بايقالعانىن ايتادى.
ناقتىراق ايتساق, ەلەكتروندى جۋرنالدار مەن كۇندەلىكتەر جۇيەسى ەل اۋماعى بويىنشا 6 مىڭنان استام مەكتەپتە ىسكە قوسىلىپتى. بۇگىنگى تاڭدا جۇيەگە 300 مىڭعا جۋىق مۇعالىم مەن 2,5 ملن استام وقۋشى جانە 1,5 ملن استام اتا-انا تىركەلىپ ۇلگەرگەن. جۇيەنىڭ ارنايى ءموبيلدى نۇسقاسى دا ازىرلەنگەن.
بۇل رەتتە باسا ايتاتىن ماسەلەنىڭ ءبىرى, اسىرەسە, شالعاي اۋىلدارداعى شاعىن مەكتەپتەر ايرىقشا نازار اۋدارۋدى قاجەت ەتەدى. بۇگىنگىدەي جاپپاي دامۋ كەزەڭىندە ول ءبىلىم وشاقتارى دا قالا مەكتەپتەرىنەن ەش كەم بولماۋى كەرەك. سوڭعى ۋاقىتتارى وڭىرلەردەگى مەكتەپتەردى «Bilim book» ءتارىزدى ەلەكتروندى كومپيۋتەر-پلانشەتتەرمەن, سوڭعى ۇلگىدەگى جاڭا تەحنولوگيالارمەن جابدىقتاۋ ءىسى دە قارقىن الا باستاعانداي.
مالىمەتتەرگە سايكەس, ەلىمىزدە وتكەن جىلى تسيفرلى ءبىلىم بەرۋ رەسۋرستارى بويىنشا 2 مىڭ جاڭا ساباق پەن 50 مىڭ جاڭا تەست سىناعى ازىرلەنىپتى. ارنايى وتكىزىلگەن 697 ترەنينگ پەن 126 ونلاين كونفەرەنتسياعا قاتىسقان 15 مىڭنان استام مۇعالىم كاسىبي بىلىكتىلىگىن جەتىلدىرگەن. وعان قوسا 500-گە جۋىق مەكتەپ «Bilim book» قاناتقاقتى ءبىلىم بەرۋ جۇيەسىمەن قامتىلعان. استانا, الماتى, شىمكەنت, تالدىقورعان, ورال قالالارىندا مەكتەپ مۇعالىمدەرىن اقپاراتتىق تەحنولوگيالاردى مەڭگەرۋگە بەيىمدەيتىن بەس بىردەي ورتالىق اشىلعان.
– قازاقستاننىڭ بارلىق مەكتەپتەرى ءبىزدىڭ پورتالدارعا قوسىلعان. جۇيەمىزدە قازاق, ورىس, اعىلشىن تىلدەرىندە 40 مىڭنان استام ينتەراكتيۆتى تسيفرلىق ساباق بار. ءار ساباقتىڭ ىشىندە قىسقاشا تۇسىندىرمە ماتىندەر, ارنايى بەينەماتەريالدار, ينتەراكتيۆتى تاپسىرمالار, قىسقاشا تەستىلەۋ سىناقتارى قامتىلعان. ەلىمىزدەگى ۇلتتىق بىرىڭعاي تەستىلەۋ ەكى ساتىعا بولىنگەندىكتەن Itest.kz جوبامىزدى سوعان ىڭعايلاندىرىپ وتىرمىز. وندا 60 مىڭعا جۋىق سۇراق بار. بۇل تۇلەكتەر ءۇشىن ۇلكەن كومەك. رەسۋرسىمىزعا كۇنىنە شامامەن 50 مىڭعا جۋىق ادام كىرەدى. بريتاندىق كومپانيامەن بىرلەسە جاساعان Tvit.bilim دەپ اتالعان جوبامىزدى ماماندار جوعارى باعالادى. مۇندا كوبىنە-كوپ جاراتىلىستانۋ پاندەرى بويىنشا ۇزدىك بەينەساباقتار ەنگىزىلگەن. بىلتىردان باستاپ نارىققا شىعارىلعان «Bilim book» كومپيۋتەر پلانشەتىمىز ۇلكەن سۇرانىسقا يە بولىپ وتىر. ونىڭ ىشىنەن كەرەكتىنىڭ ءبارىن تابۋعا بولادى. قۇرىلعىنىڭ باستى ەرەكشەلىگى ينتەرنەتسىز دە جۇمىس ىستەي بەرەدى. وتكەن جىلى 3 مىڭنان اسا پلانشەت ساتىلدى, – دەيدى «Bilim Media Group» كومپانياسىنىڭ اتقارۋشى ديرەكتورى سانجار كەنجەحان ۇلى.
سوڭعى ۋاقىتتارى بىلىم جۇيەسىن تسيفرلاندىرۋعا باعىتتالعان قاناتقاقتى جوبالار ءوز تيىمدىلىگىن كورسەتە باستاعان. ايتۋلى تەحنولوگيا ءوندىرۋشى كومپانيالارمەن بىرلەسە وتىرىپ قولعا الىنعان مۇنداي جاڭاشىلدىقتار ءبىلىم سالاسىن ساندىق فورماتتا جەتىلدىرۋدىڭ اۋقىمىن بارىنشا كەڭەيتىپ كەلەدى.
ارمان وكتيابر,
«ەگەمەن قازاقستان»
الماتى
