قازاقستان • 17 قاڭتار، 2019

شىمبۇلاقتا فريستايلدان الەم كۋبوگى وتەدى

386 رەتكورسەتىلدى

2-3 ناۋرىز كۇندەرى فريستايل-موگۋلدان الەم كۋبوگىنىڭ فينالدىق كەزەڭى تۇڭعىش رەت الماتىدا وتەدى. ەلىمىزدە العاش ۇيىمداستىرىلاتىن دوداعا الەمدىك فريستايل ۇزدىكتەرى تەگىس جينالماق. «شىمبۇلاق» تاۋ-شاڭعى كەشەنىندە وتەتىن جارىس قازاقستاندىق سپورتشىلار ءۇشىن دە ماڭىزدى بولارى ءسوزسىز. بۇل تۋرالى ۇلتتىق وليمپيادا كوميتەتىنىڭ ءباسپاسوز قىزمەتى حابارلادى. 

الماتىداعى الەم كۋبوگى كەزەڭىنە دايىندىق جۇمىستارىنىڭ قالاي ءوتىپ جاتقانىن قازاقستان شاڭعى سپورتى تۇرلەرى قاۋىمداستىعىنىڭ باس حاتشىسى اسقار ۆاليەۆ تۇسىندىردى. 

- الماتىدا فريستايلدان ءىرى كولەمدەگى جارىس العاش رەت وتكەلى وتىر. سوندىقتان، ءبىزدىڭ سپورتشىلارعا دا، ۇيىمداستىرۋشىلارعا دا ارتىلعان جۇك جەڭىل ەمەس. قازىرگى ساتتە الەم كۋبوگى كەزەڭىنە تولىققاندى دايىندىق ءجۇرىپ جاتىر. اسسوساتسيا جارىستى ۇيىمداستىرۋ ماقساتىندا ۇلكەن شارۋا تىندىرۋدا. حالىقارالىق شاڭعى سپورتى تۇرلەرى فەدەراتسياسى (FIS) «شىمبۇلاق» تاۋ-شاڭعى كەشەنىندەگى تراسسانى تەكسەرىپ كەتتى. بۇگىندە تراسسانى جارىسقا دايىنداۋ ءۇشىن جاساندى قار ءوندىرىلىپ جاتىر. قاجەتتى ماماندار دا جۇمىسقا تارتىلۋدا، - دەيدى باس حاتشى. 

قاۋىمداستىق باس حاتشىسىنىڭ ايتۋىنشا، الماتىداعى الەمدىك سىنعا قاتىسۋ ءۇشىن قىتاي، وڭتۇستىك كورەيا، فينليانديا، جاپونيا سىندى مەملەكەتتەر ءوتىنىم بەرىپ ۇلگەرگەن. 20 اقپانعا دەيىن قاتىسۋشى ەلدەر سانى كوبەيىپ، 15-18 كوماندانىڭ جينالارى انىق. 

- الماتىدا الەم كۋبوگى كەزەڭىنىڭ بيىلعى ماۋسىمىنا نۇكتە قويىلادى. سول سەبەپتى، توپتان قارا ءۇزىپ شىعاتىن مىقتىلاردىڭ ءبارى دە وسىندا باس قوسادى. الماتىعا فريستايلدان 2018 جىلعى پحەنچحان وليمپياداسىنىڭ چەمپيوندارى ميكاەل كينسبەري (كانادا) مەن پەررين لافون (فرانتسيا)، 2017 جىلعى الەم چەمپيوندارى يكۋما حوريسيما (جاپونيا) مەن بريتتاني كوكس (اۆستراليا) جانە موگۋل سپورتىنداعى وزگە دە تانىمال سپورتشىلار تابان تىرەيدى. ۇزدىكتەر قاتارىنا ءبىزدىڭ موگۋلشىلار دا ەنەتىنىن ۇمىتپاۋ كەرەك. يۋليا گالىشەۆا كالگاريدە توپ جارىپ، مىقتىلار توبىنا ەندى. ەرلەرىمىزدىڭ دە كورسەتكىشى جامان ەمەس. ولار ءوز جانكۇيەرلەرىنىڭ الدىندا ايانىپ قالمايدى دەپ ويلايمىن. سونداي-اق، الماتىدا الەم كۋبوگىنىڭ جالپى ەسەبىندە توپ جارعان سپورتشىلار FIS دايىنداعان ۇلكەن جانە كىشى حرۋستال گلوبۋستار تابىستالماق، - دەيدى اسقار ۆاليەۆ. 

ەسكە سالا كەتەيىك، وليمپيادا ويىندارىنىڭ قولا جۇلدەگەرى يۋليا گالىشەۆا الەم كۋبوگى كەزەڭىنىڭ جالپى ەسەبىندە ۇزدىك ۇشتىكتە تۇر. ول فرانتسيالىق پەررين لافونعا عانا ەسە جىبەرگەن. دميتري رەيحەرد ۇزدىك بەستىك قاتارىنا كىرسە، پاۆەل كولماكوۆ جيىرمالىققا ەندى. 

- كوماندا مۇشەلەرى حالىقارالىق كۇنتىزبەگە سايكەس الەم كۋبوگى كەزەڭدەرىنە قاتىسۋدا. بۇل كۇندەرى سپورتشىلارىمىز 17-18 قاڭتار كۇنى لەيك-پلەسيدتە وتەتىن الەم كۋبوگى كەزەڭىنە قاتىسۋ ءۇشىن اقش-تا ءجۇر. 27 قاڭتار كۇنى كانادانىڭ ترەمبلان قالاسىندا الەم كۋبوگىنىڭ تاعى ءبىر كەزەڭى وتەدى. 1-10 اقپان ارالىعىندا اقش-تىڭ پارك-سيتي قالاسىندا فريستايل مەن سنوۋدبوردتان الەم چەمپيوناتى ۇيىمداستىرىلادى. 23-24 اقپان كۇندەرى جاپونيانىڭ تازاۆاكو قالاسىندا الەم كۋبوگى كەزەڭى جوسپارلانعان. مىنە، ناۋرىز ايىندا الماتىدا وتەتىن دوداعا دايىندىق ماقساتىندا كوماندا مۇشەلەرى اتالعان جارىستار تىزبەگىنە مىندەتتى تۇردە قاتىسادى، - دەيدى باس حاتشى. 

جارىس دەمالىس كۇندەرىنە جوسپارلانعاندىقتان، «شىمبۇلاق» كەشەنىندە دەمالىپ جۇرگەن تۇرعىنداردىڭ دا الەمدىك سىندى تاماشالاۋ مۇمكىندىگى بار ەكەنىن ەسكەرتەمىز. 

سوڭعى جاڭالىقتار

قىس قىسىمىن ادام كۇشى جەڭۋدە

ايماقتار • بۇگىن، 16:56

تارازدا «اntikor ortalygy» اشىلدى

ايماقتار • بۇگىن، 16:10

200 تەڭگەلىك مونەتا اينالىمعا شىقتى

قازاقستان • بۇگىن، 10:39

قورجىنىمىز بوس قايتتى

قىسقى سپورت • بۇگىن، 06:56

بوكسشىلار امماندا ىرىكتەلەدى

كاسىپقوي بوكس • بۇگىن، 06:53

ناقىل سوزدەرگە تولى اعاش

ايماقتار • بۇگىن، 06:47

كەمەل ويلاردىڭ كەمەڭگەرى

اباي • بۇگىن، 06:41

ۇقساس جاڭالىقتار