اتىراۋ وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى تەمىربەك مۇساعاليەۆ جۇقپالى اۋرۋدىڭ ورشۋىنە ۋاقىتىلى ەكپە الماۋ سەبەپ بولىپ وتىرعانىن ايتادى.
- اۋىرعاندار اراسىندا ءبىر جاسقا تولماعان نارەستەلەر بار, ولار ۆاكتسيناتسيادان وتپەگەن, مەديتسينالىق كورسەتكىشتەر بويىنشا ەكپە الماعان جانە ەكپە سالدىرۋدان باس تارتقان. سوندىقتان اتا-انالاردى بالالارىنىڭ دەنساۋلىقتارىنا جاۋاپكەرشىلىكپەن قاراپ, ۆاكتسينا ينفەكتسيالىق كونتاگيوزدىق اۋرۋلاردىڭ الدىن الاتىنىن ەسكەرتە وتىرىپ, ەكپەدەن باس تارتپاۋعا شاقىرامىز. ۆاتسيناتسيا قورى بىزدە جەتكىلىكتى, تۇرعىلىقتى مەكەن-جايى بويىنشا كەز كەلگەن ەمحاناعا بارىپ, تەگىن ەكپە سالدىرۋعا بولادى, - دەيدى تەمىربەك مۇساعاليەۆ.
وتكەن جىلدىڭ قازان ايىندا وسى ماسەلە بويىنشا جۇمىس توبى قۇرىلعان. ارنايى ماماندار وبلىستىڭ بارلىق اۋداندارىنا بارىپ, اقپاراتتىق-تۇسىندىرمە جۇمىستارىن جۇرگىزدى. وسىنداي جۇمىستاردىڭ ناتيجەسىندە بۇرىن باس تارتىپ كەلگەن 752 بالا قىزىلشاعا قارسى ەكپە الدى.
جالپى ەلىمىزدە قازىر قىزىلشا اۋرۋى بويىنشا ەپيدەميولوگيالىق جاعداي قولايسىز بولىپ تۇر. وتكەن جىلى اتىراۋ وبلىسىندا قىزىلشا اۋرۋىن جۇقتىرعاندار تىركەلمەگەن ەدى.
باقىتگۇل باباش,
«ەگەمەن قازاقستان»
اتىراۋ
