قر ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆانىڭ ايتۋىنشا, رەسپۋبليكالىق جانە وبلىستىق ماڭىزى بار قالالاردا بىرىڭعاي جيىنتىق تولەمى 1 اەك (2525 تەڭگە), ال باسقا ەلدىمەكەندەردە 0,5 اەك (1263 تەڭگە) كولەمىندە بەلگىلەنىپ وتىر. اتالعان اقشانىڭ 10 پروتسەنتى جەكە تابىس سالىعىنا, 20 پروتسەنتى - مەملەكەتتىك الەۋمەتتىك ساقتاندىرۋ قورىنا, 30 پروتسەنتى - بىرىڭعاي جيناقتاۋشى زەينەتاقى قورىنا, 40 پروتسەنتى مىندەتتى الەۋمەتتىك مەديتسينالىق ساقتاندىرۋ قورىنا اۆتوماتتى تۇردە تۇسەدى. وسىلايشا, ءبىر تولەممەن ءتورت بىردەي جارنا اۋدارىلادى. سونىڭ ناتيجەسىندە بەيرەسمي جۇمىسپەن قامتىلعاندار الەۋمەتتىك كومەكتى بارلىعىمەن تەڭ دارەجەدە الا الادى.
«جالپى العاندا, بىرىڭعاي جيىنتىق تولەمدى ەنگىزۋ بەيرەسمي جۇمىسپەن قامتىلعاندارعا: مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋعا جانە سوماسى مەن تۇرلەرى شەكتەلمەگەن مەديتسينالىق قىزمەتتەرگە قول جەتكىزۋگە, مەديتسينالىق مەكەمەلەردى تاڭداۋعا; جيناقتاۋشى زەينەتاقى جۇيەسىنە قاتىسۋعا ءارى جۇيەگە قاتىسۋ وتىلىنە قاراي بازالىق زەينەتاقى تولەمىن الۋعا; ەڭبەك ەتۋ قابىلەتىنەن, اسىراۋشىسىنان ايىرىلعان جاعدايعا, جۇكتىلىك پەن بوسانۋعا, بالا اسىراپ الۋعا, بالا 1 جاسقا دەيىن ونىڭ كۇتىمىنە بايلانىستى الەۋمەتتىك تولەمدەر الۋعا مۇمكىندىك بەرەدى», - دەدى م. ابىلقاسىموۆا. ونىڭ سوزىنە قاراعاندا, بىرىڭعاي جيىنتىق تولەمىن اۋدارۋ يا اۋدارماۋ - ءاربىر ازاماتتىڭ ءوز ەركى. بجت-نى تولەمەگەنى ءۇشىن ەشقانداي شارالار قولدانىلمايدى.
«ۇكىمەت سانكتسيا ساياساتىنان باس تارتتى. نەگىزىندە كودەكستە اكىمشىلىك جازا قاراستىرىلعان. ياعني, ادامدار تاپقان تابىسىن جاسىرىپ وتىر. بۇگىندە جازالاۋدان گورى ىنتالاندىرۋعا باسىمدىق بەرىلۋدە. ازاماتتار اتالعان تولەمنەن باس تارتپاعان جاعدايدا قانداي الەۋمەتتىك كومەك الاتىنىن ءبىلۋى ءتيىس. بجت رەجيمىندە ماجبۇرلىك سيپات جوق. بۇل جەردە ەشقانداي جازالاۋ قاراستىرىلماعان. بۇل تەتىك ارقىلى بۇرىن اتالعان قىزمەتتەردى پايدالانا الماعان ادامدار الەۋمەتتىك قولداۋعا قول جەتكىزەدى. بۇل سالىقتىڭ جاڭا ءتۇرى ەمەس. بۇل سالىقتار بۇرىن دا تولەنىپ تۇراتىن. تەك وزىن ءوزى جۇمىسپەن قامتۋشى ازاماتتار ەندى ەڭ از مولشەردە تولەپ تۇراتىن بولادى. تولەي مە, تولەمەي مە - ادامنىڭ ءوز ەركى», - دەيدى م.ابىلقاسىموۆا.
