بۇگىن قانداسىمىزدىڭ كىممەن جۇدىرىقتاساتىنى بەلگىلى بولدى. جانىبەك «جالدامالى جانالعىش» دەگەن بۇركەنشىك ەسىممەن تانىمال ستيۆەن مارتينەسپەن ايقاسادى. 1990 جىلى پۋەرتو-ريكودا تۋىپ-وسكەن ول كەيىننەن اقش-قا قونىس اۋداردى. وسى سپورت ءتۇرىن سەرىك ەتكەلى 10 جىلعا جۋىقتاپ قالدى. سول ارالىقتا 21 كەزدەسۋ وتكىزىپ, 18 رەت جەڭىسكە جەتتى. 13 باسەكەنى مەرزىمىنەن بۇرىن اياقتادى. ءوزىنىڭ سوڭعى جەكپە-جەگىن مارتينەس ۇستىمىزدەگى جىلدىڭ 16-ناۋرىزىندا امەريكالىق كورتني پەنەنگتونعا قارسى وتكىزىپ, ۇتىلىپ قالعان بولاتىن.
ال جانىبەك ءالىمحانۇىلىنىڭ ءجۇرىپ وتكەن جولىن قازاقستاندىق جانكۇيەرلەر جاقسى بىلەدى. ول – اۋەسقويلار اراسىندا الەم جانە ازيا چەمپيونى, ازيا ويىندارىنىڭ جەڭىمپاز. 2016 جىلدىڭ قازان ايىندا كاسىپقوي رينگتەگى العاشقى قادامىن جاساپ, الماتىدا كولۋمبيالىق نۋنەس ميلتوندى ءبىرىنشى راۋندتا ۇرىپ شىقتى. 2017 جىلدىڭ قىركۇيەيەگىندە استانادا برازيليالىق جيلبەرتۋ پەرەيرا دوس سانتوستى ۇپاي سانىمەن ۇتتى. ودان كەيىن جانىبەك مۇحيت اسىپ, امەريكاعا اتتاندى. اقش-تا ول اتىشۋلى بوب ارۋم جەتەكشىلىك ەتەتىن ايگىلى Top Rank پروموۋتەرلىك كومپانياسىمەن كەلسىمشارتقا وتىردى. سول كەزدەن بەرى تاعى ەكى كەزدەسۋ وتكىزىپ, ەكەۋىندە دە جەڭىسكە جەتتى. قانداسىمىز تاجىريبەلى كارلوس گالۆان (كولۋمبيا) مەن الەكساندەر ۆوننان (اقش) باسىم ءتۇستى.
عالىم سۇلەيمەن,
«ەگەمەن قازاقستان»
