وقۋشىلار سارايىندا ورنالاسقان وزىق جوبالى كەڭسەنىڭ اشىلۋ سالتاناتىنا وڭىرىمىزگە جۇمىس ساپارىمەن كەلگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ولجاس بەكتەنوۆ پەن وبلىس اكىمىنىڭ ورىنباسارى ماديار قوجاحمەت قاتىستى.
«كەڭسەنىڭ مىندەتى تۇرمىستىق سىبايلاس جەمقورلىق دەڭگەيىن قىسقارتۋعا, دەنساۋلىق ساقتاۋ, ءبىلىم بەرۋ سياقتى الەۋمەتتىك, سونداي-اق, قۇقىق قورعاۋ سالالارىنىڭ جۇمىسىن تالداۋعا, پاراقورلىق جاعدايلارىنىڭ الدىن الىپ, جولىن كەسۋ ءىس-شارالارىن جۇزەگە اسىرۋعا باعىتتالعان. مۇندا تۇرعىندار ادەتتەگىدەي تاقىرىپتىق سەمينارلارعا, «دوڭگەلەك ۇستەلدەرگە» قاتىسۋ ءۇشىن ەمەس, ناقتى ماسەلەلەرمەن ءبولىسىپ, پىكىر الماسىپ, كەڭەس الۋ ماقساتىمەن كەلەتىن بولادى», دەدى و. بەكتەنوۆ.
ء وڭىر مەملەكەتتىك قىزمەت سالاسىنداعى سىبايلاس جەمقورلىق دەڭگەيى بويىنشا ەلىمىزدە تومەن كورسەتكىشكە يە. مەملەكەتتىك قىزمەت تۇرلەرىنىڭ 83 پروتسەنتى حالىققا قىزمەت كورسەتۋ ورتالىقتارى ارقىلى جانە ەلەكتروندى تۇردە كورسەتىلەدى. مەملەكەتتىك قىزمەتشىلەر اراسىندا سىبايلاس جەمقورلىققا قارسى زاڭناما مەن ادەپ نورمالارىن ساقتاۋ جونىندە 370 ءتۇسىندىرۋ جۇمىسى جۇرگىزىلگەن.
وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى «قىزىلجار – ادالدىق الاڭى» جوباسى اياسىندا ءوزارا ىنتىماقتاستىق تۋرالى مەموراندۋمعا قول قويدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
