نۇرسۇلتان نازارباەۆ جىل قورىتىندىسى بويىنشا باق وكىلدەرىنە بەرگەن سۇقباتىندا ەڭ الدىمەن استانا قالاسىنىڭ 20 جىلدىق مەرەيتويىنا توقتالدى.
«بىرنەشە جىلدار بۇرىن استانا قالاسىندا ەشتەڭە جوق ەدى. ال قازىرگى استانانىڭ كوركىنە كوز تويمايدى. سول كەزدە بۇگىنگى باس قالانىڭ اسەم قالا بولارىنا سەنبەگەندەر بولدى. الايدا ەرەن ەڭبەكتىڭ ارقاسىندا استانانىڭ بۇگىنگى كەلبەتى شىندىققا اينالىپ وتىر. 20 جىلدىق دەگەنىمىز تاريح ءۇشىن تۇك ەمەس. استانا ءوزىنىڭ دامۋ جولىندا ەلدىڭ وزگە اۋماقتارىن دا العا تارتتى», دەدى ەلباسى ءوز سوزىندە.
بۇدان سوڭ, ول باتىس قازاقستان اۋماعىندا ورنالاسقان قالالاردىڭ دامۋ جۇمىستارىن اتاپ ءوتتى.
«اتىراۋ قالاسى العاشقى كەزەڭنەن كوپ وزگەردى. بىرنەشە جىل بۇرىن بۇل قالادا رازىڭكە ەتىكسىز اياق الىپ جۇرۋگە دە بولمايتىن ەدى. ال بۇگىندە اتىراۋ تاماشا قالاعا اينالىپ وتىر. سونداي-اق اقتاۋ قالاسىن ەرەكشە اتاپ وتكىم كەلەدى. بۇل قالادا بيىل كاسپي ماسەلەسىنە قاتىستى بىرنەشە ەلدىڭ باسشىلارىمەن ۇلكەن سامميت ءوتتى. تاماشا جاعالاۋى بار قالا بۇگىندە كوڭىل قۋانتادى. بۇل قالانىڭ بۇگىندە مارتەبەسى اسا ءتۇسىپ وتىر. اتىراۋ ەلىمىزدىڭ ۇزدىك تۋريزم ايماعى بولۋعا ابدەن لايىق. ورال, اقتوبە قالالارىنىڭ دا قارقىندى ءوسۋ جۇمىستارىن اتاپ وتپەسكە بولمايدى. اقتوبە قالاسىندا 130 مىڭ ادام تۇراتىن جاڭا 3 ىقشام اۋداننىڭ جاندانۋ جۇمىستارى قارقىندى ءجۇرىپ جاتىر. بۇل ايماقتىڭ الەۋمەتتىك جاعدايى بۇگىندە ءبىرشاما جاقسارعان», دەدى مەملەكەت باسشىسى.
سونداي-اق ەلباسى قوستاناي, تالدىقورعان, وسكەمەن, پەتروپاۆل, الماتى قالالارىنا جەكە-جەكە توقتالىپ, ەلىمىزدەگى قالالاردىڭ استانا قالاسىنا قاراپ بوي تۇزەيتىنىن ايتتى.
«ەلىمىزدىڭ بارلىق قالالارى باس قالا استانا قالاسىنا قاراپ بوي تۇزەيدى. بۇل تەندەنتسيا ەندى شاعىن قالالار مەن اۋداندارعا دا ەنىپ جاتىر. بيىل استانانىڭ 20 جىلدىق مەرەيتويىندا بارلىق وبلىستار اتسالىستى. ءار وبلىس بۇل قالانىڭ دامۋىنا وزىندىك ۇلەس قوستى», دەدى پرەزيدەنت.
