نۇرسۇلتان نازارباەۆ ورتالىق ازياداعى 5 مەملەكەت تاعدىرلاس قانا ەمەس, قانى دا, جانى دا ءبىر ەكەنىن, بيىلعى استاناداعى كەزدەسۋدىڭ جەمىستى بولعانىن ايتتى. جيىن ناتيجەسى بويىنشا كورشىلەس وزبەكستان, قىرعىزستانمەن قارىم-قاتىناس جاقسارىپ, الداعى جىلعا ناقتى جوسپارلار قۇرىلعانىن حابارلادى.
«وزبەكستان پرەزيدەنتى شاۆكات ميرزيوەۆپەن سويلەستىم. قازىر ولاردىڭ جاعدايى قيىن, جاڭا باسشى مەملەكەتتى تىعىرىقتان الىپ شىعۋعا تىرىسىپ جاتىر. ءوز كەزەگىمدە مەن دە قولداپ, كومەكتەسەمىن. كەلەر جىلى ورتالىق ازيا مەملەكەتتەرىنىڭ باسشىلارى تاشكەنتتە باس قوسپاق. وسى تۇستا قازاقستاننىڭ وزبەكستانداعى مادەني كۇندەرى اتاپ ءوتىلۋ جوسپارلاندى.
بۇعان دەيىن ەكى ەل اراسىنداعى ساۋدا اينالىمى 1 ميللياردقا جەتپەيتىن. بيىلعى ناتيجە 42 پايىزعا ءوسىپ, 3 ميلليارد اقش دوللارىنا جەتتى. 2019 جىلى بۇل كورسەتكىشتى 5 ميللياردقا جەتكىزەمىز دەپ جوسپارلاپ وتىرمىز. قىتايمەن بىرگە «قورعاس» شەكارا ماڭى ىنتىماقتاستىق حالىقارالىق ورتالىعىن قۇرعانداي وزبەكستانمەن وسىنداي ورتالىق قۇرۋدى قولعا الۋىمىز كەرەك. ويتكەنى وزبەكستان حالقىنىڭ سانى – 33 ميلليون. شەكارالاس مەملەكەتپەن ساۋدا قاتىناسىن جاقسارتۋ ءتيىمدى, سەبەبى مەملەكەتتەر جاقىن, حالىق سانىنىڭ كوپ بولۋى ەكونوميكامىزعا كوپ پايدا اكەلمەك», دەدى مەملەكەت باسشىسى نۇرسۇلتان نازارباەۆ.
