پارلامەنت سەسسيالارىنىڭ جۇمىسى كۇنتىزبەلىك جىلمەن سايكەس بولمايتىندىقتان وسى جىلعى سەسسيادا قانشا زاڭ قابىلدانعانىن ناقتى ايتۋ قيىن. ويتكەنى پارلامەنتتىڭ قازىرگى, ءتورتىنشى سەسسياسىنىڭ جۇمىسى قىركۇيەك ايىنان باستالدى. ال وعان دەيىنگى ءۇشىنشى سەسسيا 30 ماۋسىمدا اياقتالعان بولاتىن. بىراق سوعان قاراماي 2018 جىلعى قابىلدانعان زاڭدارعا قىسقاشا شولۋ جاساپ كورەلىك.
2018 جىلى ەلىمىز ءۇشىن اسا ماڭىزدى زاڭداردىڭ قاتارىندا قاۋىپسىزدىك كەڭەسى تۋرالى زاڭ قابىلداندى.
سونداي-اق ۆاليۋتالىق رەتتەۋ جانە ۆاليۋتالىق باقىلاۋ تۋرالى زاڭ قابىلداندى. ول ۆاليۋتالىق وپەراتسيالارمەن بايلانىستى قوعامدىق قاتىناستاردى رەتتەيدى جانە ۆاليۋتالىق رەتتەۋدىڭ ماقساتتارى مەن مىندەتتەرىن ايقىندايدى. وسى جىلى قابىلدانعان زاڭداردىڭ قاتارىندا بالالاردىڭ دەنساۋلىعىن جانە دامۋىن زياندى اقپاراتتاردان قورعاۋ تۋرالى دا زاڭ بار. 2017 جىلعى مالىمەتتەرگە قاراعاندا, اقپارات جانە كوممۋنيكاتسيالار مينيسترلىگى ينتەرنەت رەسۋرستاردىڭ قاتارىنان 270 مىڭنان اسا ماتەريالداردى الدىرىپ تاستاۋعا ءماجبۇر بولعان, ويتكەنى ولار بالالاردىڭ جاس ساناسىنا كەرى اسەر ەتىپ, ولاردىڭ بويىنا قاتىگەزدىك دەرتىن ەگىپ, اگرەسسيانى وياتۋعا ىقپال ەتكەن. ال ەندى مىنا زاڭ بالانىڭ ءسوز بوستاندىعى مەن اقپارات الۋ قۇقىن قامتاماسىز ەتە وتىرىپ, ولاردى كەلەڭسىز اقپاراتتاردان ساقتاۋعا ىقپال ەتەتىن بولادى دەپ تانىلدى.
2018 جىلى قابىلدانعان زاڭداردىڭ قاتارىندا ادۆوكاتتىق ءىس-ارەكەتتەر مەن زاڭگەرلىك كومەكتى قامتاماسىز ەتۋ, ستاندارتتاۋ, كينەماتوگرافيا, تابيعي مونوپوليالار تۋرالى زاڭدار دا بولدى.
ستاندارتتاۋ تۋرالى زاڭ – بىرتەكتىلىكتىڭ ۇلتتىق جۇيەسىن رەفورمالاۋ شەڭبەرىندە زاڭنامانى جەتىلدىرۋدى ماقسات ەتكەن. ول ءونىمنىڭ ساپاسىن كوتەرىپ, باسەكەلەستىككە قابىلەتتىلىگىن ارتتىرا تۇسۋگە مۇمكىندىك بەرەتىن بولادى.
كينەماتوگرافيا تۋرالى زاڭنىڭ نەگىزگى ماقساتى – ۇلتتىق كينو تۋىندىلارىن قولداۋ جانە كينوداعى قازاق ءتىلىنىڭ ءورىسىن اشۋعا ارنالعاندىعى تۋرالى ايتىلدى. وسى اتالعان زاڭدار دەربەس زاڭدار بولسا, بۇلاردان باسقا ەكى كونستيتۋتسيالىق زاڭعا وزگەرىستەر مەن تولىقتىرۋلار ەنگىزىلدى. سونىڭ ىشىندە شىمكەنت قالاسىنىڭ رەسپۋبليكالىق دارەجەدەگى قالالار قاتارىنا ەنۋىنە جانە تۇركىستان وبلىسىنىڭ قۇرىلۋىنا بايلانىستى قازاقستان رەسپۋبليكاسىنىڭ اكىمشىلىك-تەرريتوريالىق قۇرىلىمىنا وزگەرىستەر ەنگىزۋ تۋرالى زاڭ قابىلداندى. دەربەس زاڭداردىڭ قاتارىندا جىل سايىن بەكىتىلەتىن كەلەر جىلداردىڭ بيۋدجەتى مەن ۇلتتىق قوردان بولىنەتىن كەپىلدەندىرىلگەن ترانسفەرتتەر تۋرالى زاڭدار دا بار.
سونىمەن بىرگە قولدانىستاعى زاڭدارعا وزگەرتۋلەر مەن تولىقتىرۋلار ەنگىزۋ تۋرالى وتىزدان ارتىق زاڭ قابىلدانىپ, قولدانىسقا ەندى.
پارلامەنت قابىلداعان زاڭنامانىڭ ۇلكەن بولىگى قازاقستاننىڭ ءتۇرلى مەملەكەتتەرمەن جاساعان حالىقارالىق كەلىسىمدەرىن راتيفيكاتسيالايتىن زاڭداردى قابىلداۋعا ارنالدى. 2018 جىلى سونداي 40-قا جۋىق زاڭ قابىلداندى. قابىلدانعان زاڭداردىڭ اراسىندا پارلامەنت دەپۋتاتتارىنىڭ باستاماشىلدىعىمەن ازىرلەنگەندەرى دە بار. سونىڭ ىشىندە جوعارىدا اتالعان بالالاردىڭ دەنساۋلىقتارى مەن دامۋىنا زيان كەلتىرەتىن اقپاراتتاردان قورعاۋ تۋرالى جانە وعان ىلەسپە زاڭدار دەپۋتاتتاردىڭ باستاماشىلدىعىمەن دايىندالدى. سونداي-اق گاز جانە تۇرعىنداردى گازبەن قامتاماسىز ەتۋ تۋرالى زاڭ دا دەپۋتاتتاردىڭ باستاماشىلدىعىمەن ازىرلەندى. ءبىلىم بەرۋ تۋرالى زاڭعا ەنگىزىلگەن وزگەرىستەر مەن تولىقتىرۋلار تۋرالى زاڭدى دا دەپۋتاتتار كوتەرگەن.
مىنە, قىسقاشا ايتقاندا حالىق قالاۋلىلارى 2018 جىلى وسىنداي قىزمەتتەر اتقاردى.
جاقسىباي سامرات,
«ەگەمەن قازاقستان»
