اۋقىمدى مىندەتتەر, ماڭىزدى باستامالار. ءبىرىنشى كەزەكتە ەلباسىنىڭ جىل باسىندا جاريالاعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنا توقتالا كەتەر بولساق, وندا يندۋستريالاندىرۋدى جاڭا تەحنولوگيالاردى ەنگىزۋدىڭ كوشباسشىسىنا اينالدىرۋ سىندى ماڭىزدى ماسەلەلەر قوزعالدى. سونداي-اق ەلباسى 5 جىل ىشىندە اگروونەركاسىپ كەشەنىندەگى ەڭبەك ونىمدىلىگىن جانە وڭدەلگەن اۋىل شارۋاشىلىعى ءونىمىنىڭ ەكسپورتىن كەم دەگەندە 2,5 ەسەگە ارتتىرۋدى تاپسىردى.
بۇلاردان بولەك, جولداۋدا كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋ, ترانزيتتەن تۇسەتىن جىل سايىنعى تابىستى 2020 جىلى 5 ميلليارد دوللارعا جەتكىزۋ, اۋىلدىق ەلدى مەكەندەردى ساپالى اۋىزسۋمەن قامتاماسىز ەتۋ ءۇشىن بارلىق قاراجات كوزدەرىنەن جىل سايىن كەم دەگەندە 100 ميلليارد تەڭگە قاراستىرۋ قاجەتتىگى اتاپ كورسەتىلدى.
الەۋمەتتىك تولەمدەردى, سونىڭ ىشىندە زەينەتاقىنى ءوسىرۋ 3 ميلليوننان استام قازاقستاندىقتىڭ تابىستارىن كوبەيتەدى. مۇگەدەكتەرگە, اسىراۋشىسىنان ايىرىلعان جانە مۇگەدەك بالالار تاربيەلەپ وتىرعان وتباسىلارىنا ارنالعان جاردەماقىلار 16 پايىزعا دەيىن ءوستى. 2018 جىلدىڭ 1 شىلدەسىنەن باستاپ بازالىق زەينەتاقى ەڭبەك وتىلىنە بايلانىستى ورتاشا العاندا 1,8 ەسە كوبەيەتىن بولادى (جولداۋدان – رەد.)».
سونداي-اق ەلباسى 2018 جىلدىڭ 1 شىلدەسىنەن باستاپ كامەلەتكە تولعان, بالا كەزىنەن ءى توپتاعى مۇگەدەكتەردى باعىپ وتىرعان اتا-انالار ءۇشىن قوسىمشا مەملەكەتتىك جاردەماقىنى ەنگىزۋدى, مۇعالىم مارتەبەسىن ارتتىرۋ ماقساتىمەن ءبىلىم بەرۋدىڭ جاڭارتىلعان مازمۇنىنا كوشكەن ۇستازداردىڭ لاۋازىمدىق جالاقىسىن 2018 جىلدىڭ 1 قاڭتارىنان باستاپ 30 پايىزعا كوبەيتۋدى تاپسىردى.
بىرەگەي بەس باستاما. وسى جىلعى 5 ناۋرىزدا ەلباسى نۇرسۇلتان نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋى جاريالانىپ, ول قوعام تاراپىنان ۇلكەن قولداۋ تاپتى.
تاراتا ايتار بولساق, اتالعان ۇندەۋدە ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ, جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ, جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ, شاعىن نەسيە بەرۋدى كوبەيتۋ, ەلدى گازبەن قامتاماسىز ەتۋ جۇمىستارىن جالعاستىرۋ سىندى ماڭىزدى الەۋمەتتىك باستامالار قامتىلدى.
بۇل كورسەتىلگەن باستامالار بويىنشا ءتيىستى شارالار قولعا الىنىپ, ۇكىمەت, مەملەكەتتىك ورگاندار, جەرگىلىكتى اتقارۋشى بيلىك, بيزنەس-قاۋىمداستىق جانە ازاماتتىق قوعام باستى مىندەتتەردى ورىنداۋعا جۇمىلا كىرىستى.
جۇرتشىلىق جىلى قابىلداعان قادامدار. «قازاقستاندىقتاردىڭ əل-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا مەملەكەت باسشىسى ءبىرىنشى كەزەكتە ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە, ياعني 28 مىڭنان 42 مىڭعا دەيىن ءوسىرۋدى مىندەتتەدى. مۇنىڭ ءتۇرلى مەنشىك نىساندارىنداعى بارلىق كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىنا تىكەلەي قاتىسى بار. سونداي-اق بيۋدجەتتىك مەكەمەلەردە جۇمىس ىستەيتىن 275 مىڭ قىزمەتكەردىڭ ەڭبەكاقىسى كوبەيىپ, ورتا ەسەپپەن 35 پايىزعا وسەدى.
سونىمەن بىرگە بۇعان دەيىن قابىلدانعان «بيزنەستىڭ جول كارتاسى-2020» باعدارلاماسىن 2025 جىلعا دەيىن ۇزارتۋ ماسەلەسى كۇن تارتىبىنە شىعارىلدى. سول ءۇشىن جىل سايىن قوسىمشا كەمىندە 30 ميلليارد تەڭگە ءبولۋ قاجەتتىگى اتاپ كورسەتىلدى. بۇل ءوز كەزەگىندە 3 جىل ىشىندە قوسىمشا كەمىندە 22 مىڭ جاڭا جۇمىس ورنىن اشۋعا, 3 تريلليون تەڭگەنىڭ ءونىمىن وندىرۋگە مۇمكىندىك بەرمەك.
جولداۋدا تۇرعىن ءۇي-كوممۋنالدىق شارۋاشىلىعى مەن تابيعي مونوپوليالاردىڭ قىزمەتى ءۇشىن بەلگىلەنەتىن تاريفتەر سالاسىندا ءتارتىپ ورناتۋ ماقساتىمەن باتىل شارالار قابىلداۋ قاجەتتىگى دە اتالدى.
تاعى ءبىر ەرەكشە توقتالا كەتەر جايت, حالىقتىڭ تۇرمىس ساپاسىن ارتتىرۋ باعىتىندا ماڭىزدى مىندەتتەر كۇن تارتىبىنە قويىلدى. سوندىقتان 5 جىل ىشىندە ءبىلىم, عىلىم, دەنساۋلىق ساقتاۋ سالالارىنا بارلىق كوزدەردەن جۇمسالاتىن قاراجاتتى ىشكى جالپى ءونىمنىڭ 10 پايىزىنا دەيىن جەتكىزۋ قاجەتتىگىنە ەكپىن بەرىلدى. قورىتا ايتقاندا, 2018 جىلى دا ەلباسى تاراپىنان ەلىمىزدىڭ ۋاقىت تالابىنا ساي دامۋىنا كەڭىنەن جول اشقان, حالىقتىڭ ءال-اۋقاتىن, تۇرمىس ساپاسىن ارتتىرۋعا باعىتتالعان ءتيىمدى باستامالار جۇزەگە اسىپ, ولاردىڭ بارلىعى ەل يگىلىگىنە اينالدى.
جولدىباي بازار,
«ەگەمەن قازاقستان»
