وبلىستا جىل سايىن ءداستۇرلى تۇردە ۇزدىكتەردى قورىتىندىلايتىن شاراعا رەسپۋبليكاداعى سپورت سالاسىنىڭ مايتالماندارى جينالدى. شارانى سالتاناتتى تۇردە اشقان وبلىس اكىمى ەل ماقتانىشىنا اينالعان جەرلەس سپورتشىلارعا اتىراۋلىقتار اتىنان العىس ءبىلدىردى.
- سىزدەرگە قاراپ وسى جاستار بوي تۇزەيدى, سپورتپەن اينالىسقىسى كەلەدى. جەتىستىكتەرىڭىزدى كورىپ سىزدەر سياقتى بولۋعا تالپىنادى. ارتتارىڭىزدان ەرگەن كوپتەگەن ءىنى-قارىنداستارىمىز دا باستاعان ءىستى ابىرويلى جالعاستىرىپ كەلە جاتىر. وبلىستىڭ سپورت سالاسىنداعى جەتىستىكتەرىن قىسقاشا تاماشالادىق. بۇل ءبىر عانا بولىگى. ءبىز ءوز سپورتشىلارىمىزدى قۇتتىقتايمىز. الدا تالاي جەتىستىككە جەتىپ, وبلىس قانا ەمەس, ەل ماقتانىشىنا اينالۋلارىڭىزعا تىلەكشىمىز جانە ءاردايىم قولداۋ بىلدىرەمىز,- دەدى نۇرلان نوعاەۆ.
سونىمەن قاتار ايماق باسشىسى ۇزدىكتەرگە قازاقستان رەسپۋبليكاسى مادەنيەت جانە سپورت مينيسترلىگىنىڭ توسبەلگىسىن جانە وبلىس اكىمىنىڭ العىس حاتىن تابىستادى. سونداي-اق, «جىل سپورتشىسى» مەن «جىل جاتتىقتىرۋشىسىن» انىقتادى. بيىل "جىل سپورتشىسى" بولىپ دجاكارتا قالاسىندا وتكەن پاراجۇزۋدەن ەكى التىنعا يە بولعان حالىقارالىق دارەجەدەگى سپورت شەبەرى ەرجان سالىمگەرەەۆ اتانسا, "جىل جاتتىقتىرۋشىسى" كاراتەدەن وبلىستىق جاستار كومانداسىنىڭ جاتتىقتىرۋشىسى بولات ىزباسقانوۆ بولدى.
مەرەكەلىك جيىندا جاقسىلىق ۇشكەمپىروۆ, ەرماحان يبرايموۆ, بولات تەمىروۆ, ماكسيم راكوۆ, ايبەك نۇعىماروۆ, سپورت ارداگەرى اقمىرزا باتىرحايىروۆتار قۇتتىقتاۋ ءسوز سويلەپ, «ەڭ ۇزدىك جاس سپورتشى», «جىل سەرپىلىسى», «ەڭ ۇزدىك ءجاسوسپىرىم سپورتشى», «ۇزدىك فەدەراتسيا», «سپورت جاناشىرى», «ۇزدىك سپورتتىق اكىم»,«ۇزدىك سپورت سەرىكتەسى», «ۇزدىك سپورتتىق باسشى», «ۇزدىك سپورتتىق ءبولىم», «ۇزدىك بۇقارالىق-سپورتتىق شارا», «ۇزدىك سپورت ارداگەرى», «ۇزدىك كوماندا», «ۇزدىك سپورتتىق ۇيىم», «ۇزدىك سپورت جاڭالىقتارىنىڭ شولۋشىسى», «ۇزدىك سپورتتىق جوبا», «ۇزدىك سپورت ءتىلشىسى» نوميناتسيالارىنىڭ جەڭىمپازدارىن انىقتادى.
اتىراۋ وبلىسى دەنە شىنىقتىرۋ جانە سپورت باسقارماسىنىڭ باسشىسى رينات يبراگيموۆ سپورت جاناشىرلارىنا باسقارمانىڭ العىس حاتىن تابىستادى.
سپورت بالىنا قاتىسقاندار وبلىسىمىزدىڭ سپورتشىلارى رەسپۋبليكالىق جانە حالىقارالىق جارىستاردا يەلەنگەن 300 كۋبوكتەن تۇرعىزىلعان جاڭا جىلدىق شىرشانى تاماشالادى.
