ءۇش جىل بۇرىن قايىرىمدى جانداردىڭ باستاماسىمەن كوكشەتاۋ قالاسىندا «جانۇيا» بالالاردى اسىراپ الۋ ورتالىعى اشىلعان بولاتىن. بالالارعا اتا-انانىڭ ايالى الاقانىنىڭ جىلۋىن سەزدىرگەن بۇل ورتالىقتىڭ ماقساتى وتباسىن تابۋعا كومەكتەسۋ جانە تولىققاندى ومىرگە بەيىمدەۋ.
– بالالارعا ەستەن كەتپەس كەش ۇيىمداستىرۋعا تىرىستىق. سەبەبى, بالالار جىلىنا ءبىر-اق رەت كەلەتىن جاڭا جىل كەشىن اسىعا كۇتەدى. وسىنداي مەرەكەلىك ءىس-شارالار ارقىلى بالالاردى كوپشىلىككە كورسەتىپ وتىرساق, ولار ءوز وتباسىلارىن تاۋىپ قالار دەگەن ۇمىتتەمىز. ءار بالا عاجايىپقا تولى جاڭا جىلدا جانىندا جاقىندارى بولعانىن ارماندايدى, –دەيدى «انالار ءۇيى» قوعامدىق بىرلەستىگىنىڭ ايماقتىق وكىلى قۇرالاي جۇمابەكوۆا.
ءيا, بالالار جاڭا جىلدا شىنىمەن عاجايىپقا سەنەدى. اياز اتاعا حات جازىپ, ارماندارىنىڭ ورىندالۋىن اسىعا كۇتەدى. اتا-انانىڭ قامقورلىعىنسىز قالعان بالالاردىڭ جاڭا جىلدى جاقسى قارسى الۋىنا دەمەۋشىلەر بارىن سالدى.
–ەڭ باستىسى, بالالاردىڭ جۇزىنەن كۇلكى كەتپەي, قۋانىپ جۇرسە بولعانى. ءبىز سول ماقساتتا بالالارعا كوپتەگەن سىيلىقتار مەن تاتتىلەر الىپ كەلدىك. بارلىعى بالا قۋانىشى ءۇشىن. ماعان وزىمە قايىرىمدىلىق جاساۋ ءىسى ۇنايدى, – دەيدى جەكە كاسىپكەر گۇلميرا تاسەنوۆا.
مەرەكەلىك كەشكە شۋچينسك قالاسىنداعى بالالاردى قولداۋ ورتالىعىنىڭ تاربيەلەنۋشىلەرى مەن كوكشەتاۋ قالاسىنداعى جاسوسپىرىمدەردى بەيىمدەۋ ورتالىعىنان اسىراپ الىنعان بالالار قاتىستى. تاڭعاجايىپ مەرەكەلىك كەشكە بالالاردىڭ دا دايىندىعى ەرەكشە مۇقيات بولدى.
ۇيىمداستىرۋشىلار بالالارعا ارناپ «جاڭا جىلدىق كالەيدوسكوپ» اتتى ويىن باعدارلاماسىن ۇسىندى. بالالار سابىن كوبىكتەرىنەن جاسالعان شوۋدى ەرەكشە ۇناتىپ, سايقىمازاقتارمەن كوڭىلدى ويىندار وينادى. كەش سوڭىندا بالالار جاڭا جىلدىق سىيلىقتارعا يە بولدى.
بايقال ءبايادىل,
«ەگەمەن قازاقستان»
اقمولا وبلىسى.
