قازاقستان رەسپۋبليكاسىنىڭ ەڭبەك سىڭىرگەن سپورت قايراتكەرى مارات جارماعامبەتوۆ 2005 جىلدان بەرى اقكول اۋىلىنىڭ جاسوسپىرىمدەرىن ەركىن كۇرەسكە باۋلىپ ءجۇر. ونىڭ شاكىرتتەرى تالاي مارتەبەلى جارىستاردا جەڭىستىڭ بيىك تۇعىرىنان كورىنۋدە. اقكول اۋىلىنىڭ اۋماعىندا جەرلەنگەن قازاقتىڭ سوڭعى حاندارىنىڭ ءبىرى ءۋالي حان اتامىزدىڭ ارۋاعىن اسقاقتاتۋ نيەتىندە اشىق تۋرنير تۇڭعىش رەت جالاۋىن كوتەردى. بۇل رۋحاني جاڭعىرۋىمىزدىڭ جارقىن ءبىر كورىنىسى ىسپەتتى.
– بۇل ءتۋرنيردى اقكول اۋىلىندا باپكەرلىك قىزمەتتە جۇرگەن نۇربەك كارجانوۆ پەن مارات راقىمجانوۆ ۇيىمداستىردى. ولاردىڭ ماقساتى بالۋانداردىڭ دەڭگەيىن كوتەرۋ,–دەيدى باس تورەشى مارات جارماعامبەتوۆ.
ورتا مەكتەپتىڭ سپورت زالىنا توسەلگەن بوزكىلەمدە 60 استام ءجاسوسپىرىم بالۋان بەلدەستى. تۇڭعىش تۋرنير وتە تارتىستى ءوتتى. اقكول ورتا مەكتەبىنىڭ وقۋشىلارى ماحات حاميت, الماز ءابۋوۆ, ەرسەيىت ابىلقاسىموۆ جانە ارۋلان مۇحامەدالى جەرلەستەرىنىڭ الدىندا جاقسى ونەر كورسەتىپ, ءۋالي حان اتىنداعى تۇڭعىش ءتۋرنيردىڭ چەمپيوندارى اتاندى.
بايقال ءبايادىل,
«ەگەمەن قازاقستان»
اقمولا وبلىسى.
