«نۇر وتان» پارتياسى سىرىم اۋداندىق فيليالى جانە اۋداندىق ءماسليحات دەپۋتاتى سەرىك توقمامبەتوۆتىڭ ۇيىمداستىرۋىمەن وتكەن شارانىڭ ماقساتى – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى ماقالاسىندا كوتەرىلگەن اتقا ءمىنۋ مادەنيەتىن جاڭعىرتۋ ماسەلەسىنە ءۇن قوسۋ.
شەبەرلىك ساعاتىنا قاتىسقان سىرىم اۋداندىق كوللەدجى ستۋدەنتتەرى, جاھانشا دوسمۇحامەد ۇلى جانە قادىر مىرزاليەۆ اتىنداعى مەكتەپ وقۋشىلارى ات ابزەلدەرى اتاۋلارىمەن تانىسىپ, اتتى دۇرىس ەرتتەۋ جانە بوساتۋ جونىندە ءدارىس الدى. كوشپەلىلەردىڭ مىڭجىلدىق تاجىريبەسىن كوزبەن كورىپ, قولمەن ۇستاپ, ءتىپتى وزدەرى تاجىريبە جۇزىندە جاساپ تا كوردى. ال اتقا ءمىنۋدىڭ ىڭعايى, ونىڭ كۇتىمى مەن بابى تۋرالى سىرىم اۋداندىق ءماسليحاتىنىڭ دەپۋتاتى سەرىك توقمامبەتوۆ كەڭىرەك ايتتى.
− جينالىس جاساپ, بايانداما وقۋمەن جاستارعا رۋحاني تاربيە بەرە المايمىز. ولارعا ءوزىمىز ناقتى ىسپەن ۇلگى كورسەتۋىمىز كەرەك! شەبەرلىك ساعاتى جاستارعا پايدالى بولدى دەپ ەسەپتەيمىن. ءداستۇرلى شارۋاشىلىقتى جاڭعىرۋدى ۇدايى جۇزەگە اسىرۋعا نيەتتىمىز, – دەيدى شارا تۋرالى «نۇر وتان» پارتياسى سىرىم اۋداندىق فيليالى توراعاسىنىڭ ءبىرىنشى ورىنباسارى تالعات دارعوجيەۆ.
− اتقا ءمىنۋ مادەنيەتىن الداعى ۋاقىتتا بۇقارالىق سپورتتىق شارالاردىڭ ءبىرى رەتىندە دە قولدانعان ءجون. مەملەكەتتىك مەرەكە قۇرمەتىنە ۆەلوشەرۋ, اۆتوشەرۋ وتكىزە بەرگەنشە, ءبىر كەزەك سالت اتتىلار شەرۋىن دە وتكىزۋگە بولاتىن سەكىلدى, – دەيدى جىمپيتىلىق ارىپتەسىمىز باۋىرجان شيرمەدين ۇلى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
