مەملەكەت باسشىسىنىڭ العىس حاتى مەن باعالى سىيلىعىن قالا اكىمى عابيدوللا ءابدىراحىموۆ تاربيەلەنۋشىلەر مەن ۇجىمعا ارنايى بارىپ تابىس ەتتى. بالالار پرەزيدەنتتىڭ وزدەرىنە ارناپ جازعان حاتىن ەرەكشە ىقىلاسپەن تىڭداپ, ۇلت كوشباسشىسىنا العىس ايتتى.
ەستەرىڭىزگە سالار بولساق, اتالعان بالالار ءۇيىنىڭ تاربيەلەنۋشىلەرى 1-جەلتوقسان تۇڭعىش پرەزيدەنت كۇنى قارساڭىندا ەلتۇتقامىز نۇرسۇلتان ءابىش ۇلىنا ۇجىمدىق قۇتتىقتاۋ مەن ءوز قولدارىمەن جاسالعان ونەر تۋىندىلارىن جولداعان بولاتىن. شىمكەنتتىك بالالاردىڭ حاتى مەن سىيلىعىن قابىل العان ەلباسى ريزاشىلىعىن ءبىلدىرىپ, ىستىق لەبىزىن وسىلايشا جەتكىزگەن ەدى.
ەلباسى سالەمدەمەسىن الا كەلگەن قالا اكىمى عابيدوللا ءابدىراحىموۆ سايرام تۇرعىن الابىنداعى بالالار ءۇيىنىڭ جەتكىنشەكتەرىن جاڭا جىل مەرەكەسىمەن قۇتتىقتاپ, سپورتتىق كيىمدەر سىيعا تارتتى. ءارى ولار دايىنداعان كونتسەرتتىك باعدارلامانى تاماشالادى.
اتالعان بالالار ۇيىندە 80 ءجاسوسپىرىم تاربيەلەنۋدە. ولاردىڭ 26-سى تۇل جەتىم بولسا, 54-ءى اتا-اناسىنىڭ قامقورلىعىنسىز قالعان جاندار. سونداي-اق مۇندا ءتۋابىتتى كەمىستىگى بار بالالاردى ونەرگە باۋلىپ, قوعامعا بەيىمدەيدى. 30 جىلدان بەرى بالالار ءبىلىم مەن تاربيە الىپ جاتقان بۇل عيمارات 1916 جىلى قۇرىلعان تاريحي نىسان بولىپ سانالادى. مۇندا ءدال قازىر 210 وقۋشى تاربيەلەنىپ جاتىر.
نۇرشات توكەن,
«ەگەمەن قازاقستان»
