وڭىردەگى اتا-انا قامقورلىعىنسىز قالعان, الەۋمەتتىك از قامتىلعان جانە كوپبالالى وتباسىلاردان شىققان ۇزدىك وقۋشىلار قاتىسقان مەرەكەلىك شارادا ەلباسى اتىنان ءار بالاعا نوۋتبۋك, قىستىق كيىمدەر مەن ءتاتتى سىيلىقتار تابىس ەتىلدى. «جارقىرا, قازاقستان! جارقىرا, تۋعان جەر!» اتاۋىمەن ۇيىمداستىرىلعان شاراعا قاتىسقان وبلىس اكىمى جانسەيىت تۇيمەباەۆ بالالارمەن بىرگە لەد-ەكراننان ەلباسىنىڭ قۇتتىقتاۋ ءسوزىن تىڭداپ, شىرشا شامىن جاقتى. «بۇگىن, سىزدەر, ەلىمىزدە ۇردىسكە اينالعان «پرەزيدەنت شىرشاسىنا» قاتىسۋداسىزدار! بۇل – ەلباسى نۇرسۇلتان نازارباەۆتىڭ قازاقستاننىڭ جارقىن بولاشاعى - سىزدەرگە دەگەن ۇلكەن قۇرمەتى. سىزدەردىڭ ءبىلىمدى, پاراساتتى, جان-جاقتى دامىعان تۇلعا رەتىندە قالىپتاسىپ, زامان اعىمىنا بەيىمدەلگىش, باسەكەگە قابىلەتتى بولىپ جەتىلۋلەرىڭىز ءۇشىن مەملەكەت بارلىق مۇمكىندىكتەر مەن يگى شارالاردى اتقارۋدا جانە اتقاراتىن بولادى!», - دەدى ج.تۇيمەباەۆ.
ايتا كەتەلىك, بۇگىندە ءوڭىر بالالارى بيۋدجەتتەن 748,0 ملن.تەڭگەگە 128 مەكتەپكە ساتىپ الىنعان روبوتوتەحنيكا كابينەتتەرىندە كومپيۋتەرلىك باعدارلامالاۋ داعدىلارىنا, قاراپايىم الگوريتمدەر قۇراستىرۋعا, Web-سايت جانە كومپيۋتەرلىك ويىندار مەن انيماتسيالاردى قۇرۋدى ەۋروپالىق ستاندارتتارمەن ۇيرەنۋدە. سونداي-اق 2017 جىلدان باستاپ وبلىستا «KazRobosport» چەمپيوناتى مەن «KazRoboproject» عىلىمي-تەحنيكالىق جوبالار كونكۋرسى وتكىزىلۋدە. جەڭىمپازدار رەسپۋبليكالىق چەمپيوناتقا قاتىسىپ, كوماندالىق جۇلدەلى 2-ورىندى يەلەندى. ال ەلىمىزدىڭ مەكتەپ جانە كوللەدج وقۋشىلارى اراسىنداعى IX جازعى سپارتاكياداعا قاتىسقان تۇركىستان وبلىسىنىڭ وقۋشىلارى جالپى كوماندالىق ەسەپتە ءبىرىنشى ورىنعا يە بولدى. جالپى ءبىلىم بەرەتىن پاندەر بويىنشا وتكەن رەسپۋبليكالىق وليمپيادادا تۇركىستان وبلىسىنان قاتىسقان وقۋشىلاردىڭ 25-ءى جۇلدەگەر اتاندى. بىلىمىمەن وسىنداي بيىكتەردەن كورىنگەن وقۋشىلار اراسىندا پرەزيدەنت شىرشاسىنا قاتىسۋشىلار دا بار.
عالىمجان ەلشىباي,
«ەگەمەن قازاقستان»
تۇركىستان وبلىسى
