ۇلى دالا تاريحىندا ءمۇيىزدى وتەگەن اتىمەن ماڭگىلىككە قالعان باتىر 15 جاسىنان قولىنا نايزا الىپ, جوڭعار شاپقىنشىلىعىنا قارسى سوعىسقا قاتىسادى. كىندىك قانى 1699 جىلى قازىرگى جامبىل وبلىسى شۋ وزەنىنىڭ بويىنداعى يزەندى توپىراعىنا تامعان وتەگەن باتىردىڭ اقتىق دەمى 1773 جىلى بۇگىنگى قاپشاعاي كولى ماڭىنداعى شەڭگەلدى وڭىرىندە ۇزىلگەن ەكەن. باتىردىڭ ەرلىگىن ارعىداعى كۇسەپ, ءسۇيىنباي, المەيىن, سارباس, جامبىل جىراۋلار مەن بەرگىدەگى كەنەن اقىن جىرعا قوسىپ, ەرلىك داستانىنا ارقاۋ ەتكەن. بۇگىندە ەسكەرتكىش قويىلعان ىلە اۋدانىنىڭ ورتالىعى وسى وتەگەن باتىر اتىندا.
- اۋىزدىقپەن الىسقان تۇلپارعا مىنگەن باتىر بەيبىتشىلىكتى بەينەلەيدى. جورىقتان جەڭىپ قايتقان باتىر يىعىنا الدىنان قۋانا جۇگىرىپ شىققان بالانى وتىرعىزعان. بالانىڭ الاقانىندا بوزتورعاي بار. بۇل قازىرگى بەيبىت ءومىردىڭ كورىنىسى ىسپەتتى, - دەيدى ەسكەرتكىش اۆتورى, ءمۇسىنشى باقىتبەك مۇحامەدجان.
الماتىدان تالدىقورعانعا قاراي بەت العان جولاۋشىلاردىڭ نازارىن باۋرايتىن ەسكەرتكىشتى باتىر ۇرپاقتارىنىڭ جەكە قارجىسىنا جاسالعان ەكەن. بيىكتىگى 5 جارىم مەتر, ەنى 2 جارىم مەتىرگە جەتەتىن تاس ءمۇسىنىن 4 مەترلىك تۇعىرعا قونعاننان كەيىن ايبارلانا تۇسكەندەي.
قالماحانبەت مۇقامەتقالي,
«ەگەمەن قازاقستان»
الماتى وبلىسى
