ماقالا بيلىك باسىنداعى «تەحنوكراتتارعا» وي سالىپ, مەكتەپتەردە, كوللەدجدەردە جانە جوعارى وقۋ ورىندارىندا وقىتىلىپ جاتقان تاريح ءپانىنىڭ وقۋ جوسپارى مەن ونىڭ ساپاسىنا كوڭىل اۋدارادى عوي دەگەن ۇمىتتەمىن.
ماقالادا بۇگىنگى تاريح عىلىمىندا ەسكەرىلمەي جاتقان كوپتەگەن پروبلەمالار نازارعا الىنعان. اسىرەسە بۇكىل تۇركى حالىقتارىنا ورتاق تاريحىمىز تەرەڭ زەردەلەنگەن. تاريح ءبىزدى ءبىر-بىرىمىزدەن الشاقتاتپاي, كەرىسىنشە بىرىكتىرەتىن فاكتور بولۋعا ءتيىستى. بۇل – دالەلدەۋدى قاجەت ەتپەيتىن اكسيوما. «قازاقستان – بۇكىل تۇركى حالىقتارىنىڭ قارا شاڭىراعى» دەگەن ەلباسىمىزدىڭ يدەياسىن بار ىقىلاسىممەن قولدايمىن. ماقالادا تاريحشىلارعا ۇلكەن ءۇمىت ارتىلىپ وتىر.
كەز كەلگەن تاريحي شىعارما دەرەك نەگىزىندە جازىلاتىندىعى بەلگىلى. سوندىقتان دا ارحيۆ دەرەكتەرىن ىزدەۋ, تابۋ جانە تالداۋ, ءسويتىپ ولاردى عىلىمي اينالىمعا قوسۋ وڭاي شارۋا ەمەس. ونىڭ ۇستىنە كورشى ەلدەر ارحيۆىندەگى حالقىمىز تاريحىنا قاتىستى قۇجاتتاردى الۋ, ءتىپتى قيىنداپ كەتتى. تاۋەلسىزدىك جىلدارىندا جيناقتالعان ارحيۆ قۇجاتتارىنىڭ عىلىمي اينالىمعا تۇسپەي جاتقاندىعى دا بەلگىلى. ويتكەنى ولاردى وقيتىن جانە تالدايتىن مامانعا ءزارۋمىز. وكىنىشتىسى ەلىمىزدىڭ بىردە-ءبىر وقۋ ورنى دەرەكتانۋشى مامان دايىندامايدى.
پرەزيدەنتىمىز تاريحىمىزداعى تۇلعالار ءرولى ماسەلەسىنە كوڭىل اۋدارعان ەكەن. بۇگىندە جەر-جەرلەردە تۇلعالار جونىندە ءىرىلى-ۋاقتى كىتاپ, كىتاپشالار شىعىپ, ەسكەرتكىشتەر قويىلىپ ءجۇر. بىراق ەسكەرتكىشتەردىڭ مارتەبەسىن انىقتاپ, ولار جونىندە دەرەكتەر جيناپ جاتقان ەشكىم جوق. سونىمەن قاتار ارتىندا اقشالى ۇرپاعى بار كىسىلەرگە دە كوشەنىڭ اتىن بەرۋ ءىسىن تىقپالاۋ دا جوق ەمەس. سوندىقتان تۇلعاتانۋ عىلىمىن قالىپتاستىرۋىمىز قاجەت. ونىڭ مەتودولوگيالىق جانە تەوريالىق نەگىزدەرىنىڭ جاسالۋى كەزەك كۇتتىرمەيتىن ماسەلە.
امانجول كۇزەمباي ۇلى,
تاريح عىلىمدارىنىڭ دوكتورى,
پروفەسسور
قوستاناي
