«ەسىمى التىن ارىپپەن جازىلىپ وتىرعان وسى جاستاردىڭ بارلىعى دا مۇنداي بەدەلدى اتاققا ءوزىنىڭ تازا ەڭبەگىمەن جەتتى. ولار ەڭ الدىمەن وزگەلەرگە ۇلگى. ءار جىلدارى ەسىمى وسى كىتاپقا كىرگەن جاستار قازىر ەلىمىزگە بەلگىلى ازاماتتار بولىپ قالىپتاستى. مىسالى وسى كىتاپقا ەسىمى ءبىرىنشى بولىپ تىركەلگەن «توبىل» كومانداسىنىڭ فۋتبولشىسى نۇرلان جۇماسقاليەۆ ەلىمىزدەگى سپورت اڭىزدارىنىڭ بىرىنە اينالدى. قازىر وسى كوماندا باسشىلارىنىڭ ءبىرى بولىپ وتىر. ءاليا ساپاروۆا پارلامەنت دەپۋتاتى, ال الەم چەمپيونى دەنيس كۋزين «100 جاڭا ەسىم» جوباسىنىڭ جەڭىمپازى بولدى» دەدى وبلىس اكىمى ارحيمەد مۇحامبەتوۆ.
جوبا لاۋرەاتتارى بىرنەشە اتالىم بويىنشا ماراپاتتالدى. ولاردى ءار سالاداعى بەلگىلى, ارداگەر, حالىقتىڭ قۇرمەتىنە بولەنگەن جاندار تاپسىردى. ماراپاتتالعانداردىڭ اراسىندا بەيبىت كۇندە ەرلىك كورسەتكەندەر, سپورت, ونەر, مادەنيەت, ءبىلىم مەن دەنساۋلىق سالاسىندا, بيزنەستە جۇرگەن ۇزدىك جاستار بار. قوستاناي وبلىسىنىڭ «التىن جاستارىنىڭ» قاتارىنان ءانشى, حالىقارالىق بايقاۋدىڭ لاۋرەاتى ەرنار سادىرباەۆ تا ورىن الدى.
وبلىس اكىمى ارحيمەد مۇحامبەتوۆ سالتاناتتى جيىننىڭ سوڭىندا جاستار جىلى بولىپ بەلگىلەنگەن 2019 جىلى وبلىستا اتقارىلار كەلەلى ىستەردى اتاپ ءوتتى.
– قوستاناي قالاسىنىڭ «يۋبيلەينىي» جاڭا شاعىن تۇرعىن اۋدانىندا زاماناۋي جاستار سارايى سالىنىپ جاتىر. ۇلكەن, كەڭ عيماراتتا بىرنەشە زالدار, جاستارعا بايلانىستى جۇمىستار جۇرگىزىلەتىن كابينەتتەر جابدىقتالادى. جاستار سارايىنىڭ قۇرىلىسى كەلەسى جىلدىڭ ناۋرىز ايىندا اياقتالادى, ونىڭ اينالاسىن كوركەيتۋ, اباتتاندىرۋ جۇمىستارى جازدا تولىق اياقتالادى. سونىمەن قاتار وبلىس ورتالىعىندا جاڭا ۇلگىدەگى سپورت جانە جاستاردىڭ روبوت تەحنيكالارىمەن اينالىسۋىنا قولايلى عيماراتتار دا بوي كوتەرەتىن بولادى. «يۋبيلەينىي» تۇرعىن اۋدانىنداعى «قوستاناي-پلازا» ساۋدا-ويىن-ساۋىق كەشەنى تاعى دا كەڭەيتىلەدى. وندا ويىن-ساۋىق جانە دەمالىس وراندارى ورنالاسادى, – دەدى ارحيمەد بەگەجان ۇلى.
ءنازيرا جارىمبەت,
«ەگەمەن قازقستان»
قوستاناي
