جارتىلاي فينالدىق سايىستا يسپانيانىڭ «رەال» كومانداسى جاپونيانىڭ 8 دۇركىن چەمپيونى, 2018 جىلى فۋتبولدان ازيا چەمپيوندار ليگاسىنىڭ جەڭىمپازى اتانعان «كاسيما انتلەرس» كلۋبىن جەڭىپ (3:1), فينالعا شىقتى. «رەال» ساپىنان ءۇش گولدى دا گارەت بەيل سالسا, «كاسيما انتلەرس» كومانداسىنان سيوما دوي ءبىر عانا گولمەن جاۋاپ قايىردى.
ەكىنشى جارتىلاي فينالدا بىرىككەن اراب امىرلىگىنىڭ ء«ال-اين» جانە ارگەنتينانىڭ «ريۆەر پلەيت» كوماندالارى كەزدەسىپ, ويىننىڭ نەگىزگى كەزەڭى 2:2 ەسەبىمەن تەڭ اياقتالدى. ويىن سوڭىنداعى پەنالتي سەرياسىندا ء«ال-اين» كومانداسىنىڭ باعى جانىپ, فينالدىق سايىسقا جولداما الدى. كلۋبتار اراسىنداعى الەم چەمپيوناتىنىڭ فينالدىق ويىنى 22 جەلتوقسان كۇنى وتەدى.
دايىنداعان ءالي بيتورە,
«ەگەمەن قازاقستان»
