قۇدىق ءحىح عاسىردىڭ باستاپقى شيرەگىنە دەيىن جۇمىس ىستەگەن. تۇركيانىڭ «ۆاكف ينشاات» فيرماسىنىڭ كەسەنەگە 1992-1999 جىلدار ارالىعىندا جۇرگىزگەن رەستاۆراتسيالىق جۇمىستارىنا بايلانىستى قۇدىق سۋى مۇلدە جابىلعان بولاتىن. ەندى مىنە, اراعا جىلدار سالىپ, «ازىرەت سۇلتان» مەملەكەتتىك تاريحي-مادەني قورىق-مۋزەيىندە ورتاعاسىرلىق تاريحي قۇدىق ىسكە قوسىلدى.
قورىق-مۋزەي ديرەكتورى نۇربولات احمەتجانوۆتىڭ ايتۋىنشا, بيىلعى قازان ايىندا تۇركىستان قالاسىنا رەسمي ساپارى بارىسىندا مەملەكەت باسشىسى ن.نازارباەۆ قوجا احمەت ياساۋي كەسەنەسىنە ارنايى ات باسىن بۇرىپ, ورتاعاسىرلىق قۇدىقتى حالىق يگىلىگىنە جاراتىپ, ىسكە قوسۋ تۋرالى تاپسىرما بەرگەن. وسىعان وراي, تازارتۋ جۇمىستارى جۇرگىزىلگەن. قۇدىق سۋىنىڭ قۇرامى بارلىق ءتيىستى ساراپتامالاردان ءوتىپ, ءتيىستى قۇجاتتار دايىندالىپتى. بۇگىندە كەسەنەگە زياراتقا كەلۋشىلەر قۇدىق سۋىنان ءشول قاندىرۋدا.
تاريحي دەرەككوزدەردە قۇرىلىس كەزىندە سۋ الۋ ءۇشىن قازىلعان, كەيىننەن ءدىن يەلەرى قۇدىقتان تارتىلعان سۋدى دا شيپالى دەپ جاريالاعانى ايتىلادى. اينالاسى دوڭگەلەنە كىرپىشتەن قالانعان, ديامەترى 80 سم قۇدىقتان سۋ بۇرىن 7-8 مەتر تەرەڭدىكتەن شىقسا, قازىر جەر استى سۋلارىنىڭ كوتەرىلۋىنە بايلانىستى 5-6 مەتر تەرەڭدىكتەن الىنادى.
عالىمجان ەلشىباي,
«ەگەمەن قازاقستان»
تۇركىستان وبلىسى
