«حالىق قاۋىپسىزدىگىن قامتاماسىز ەتۋ» جوباسىنىڭ الدىنا قويعان ماقساتى سان الۋان. بۇل – ءمانى دە, ماعىناسى دا وتە كەڭ ۇعىم. ءبىر سوزبەن ايتقاندا, ونى بۇگىنگى زامان تالاپتارىنا ساي حالىقپەن تىعىز قارىم-قاتىناس جاساۋدىڭ جاڭاشا ءبىر تەتىگى, وڭتايلى ءادىسى دەۋگە بولادى», دەدى اقتوبە وبلىسىنىڭ اكىمى بەردىبەك ساپارباەۆ جوبانىڭ كەيىنگى كەزەڭىنىڭ قورىتىندىسىنا بايلانىستى وتكىزىلگەن كوميسسيا وتىرىسىندا.
ءوڭىر باسشىسىنىڭ وي-پىكىرىن ءسال تەرەڭدەتە تۇسەر بولساق, اتالعان جوبا اياسىندا قايىرىمدىلىق قاعيداتتارى قانات قاعىپ, جەتىمدەردى جەبەپ, سۇرىنگەندى دەمەۋ جونىندە ءبىراز ءىستىڭ باسى قايىرىلدى. ونىڭ باستى بولىگىن قايىرىمدىلىق كومەكتەر قۇرايدى. سونداي-اق كاسىپكەرلىكتى دامىتۋ مەن جۇرگىزۋ بويىنشا سەمينارلار, ترەنينگتەر مەن شەبەرلىك ساباقتارى وتكىزىلدى. جوبا – شاعىن جانە ورتا بيزنەستى دامتىۋعا قاتىستى قابىلدانعان مەملەكەتتىك باعدارلامالاردى ەل-جۇرتتىڭ اراسىندا كەڭىنەن تۇسىندىرۋگە باسىمدىق بەرەدى.
بۇگىنگى كەزدە ەلىمىزدىڭ قاي وڭىرىندە بولسىن, تەرىس ءدىني اعىمداردىڭ جەتەگىندە جۇرگەندەر كەزدەسپەي قالمايدى. «اداسقاننىڭ ايىبى جوق, قايتىپ ءۇيىرىن تاپقان سوڭ» دەمەي مە دانا حالقىمىز. وسى ورايدا تەولوگتەر مەن ءدىني اعارتۋشىلىق باعىتتا قىزمەت جاسايتىن ساراپشىلار توبىنىڭ قىزمەتى دە ءتيىستى ناتيجەسىن بەرىپ ءجۇر.
دەسترۋكتيۆتى ءدىني اعىم وكىلدەرىمەن جەكەلەگەن جانە توپتىق كەزدەسۋلەر وتكىزۋ ءۇردىسى دە ەنگىزىلدى. قانداي تەرىس قۇبىلىس بولسىن, ونىڭ الدىن الا بىلگەن جاعدايدا زالال كەلتىرە قويماسا كەرەك. بۇل رەتتە كوڭىلگە قونىمدى, مازمۇنعا باي, پروفيلاكتيكالىق ءىس-شارالار جوبانىڭ ناتيجەلى بولۋىنا ىقپالىن تيگىزۋدە. قازىرگى كەزدە جوبا شەڭبەرىندە جۇرگىزىلەتىن جۇمىستاردىڭ تيىمدىلىگىن ودان ءارى كوتەرۋ جولدارى قاراستىرىلۋدا.
رەسپۋبليكا وڭىرلەرى اراسىندا حالىقپەن قويان-قولتىق جۇمىس جۇرگىزۋدىڭ بالاماسى جوق جولدارى بەلگىلەنگەن ۋاقىتتان بەرى وبلىستا جۇيەلى شارالار اتقارىلدى. سونىڭ ناتيجەسىندە ماقساتتىق كورسەتكىشتەرگە قول جەتكىزىلدى. مۇنى ەشكىم جوققا شىعارا المايدى. بۇگىنگى باستى مىندەت وسىمەن شەكتەلىپ قالماي, حالىققا قاجەتتى العىشارتتاردى ودان ءارى شيراتا ءتۇسۋ بولماق.
ايتالىق جوبانىڭ جەتىنشى كەزەڭىندە 126 ءىس-شارا وتكىزىلىپ, وعان 14 مىڭ ادام قامتىلىپتى. ارينە باستى گاپ ساندا ەمەس, ساپالىق كورسەتكىشتە, جۇرگىزىلگەن جۇمىستاردىڭ تۇرعىندارعا تيگىزەتىن پايداسىندا, كەزدەسۋ كەزىندە ايتىلعان اڭگىمەلەردىڭ جۇرەكتەرگە جەتۋىندە. بۇل تۇرعىدان دا «حالىق قاۋىپسىزدىگىن قامتاماسىز ەتۋ» جوباسىنىڭ ءباسى بيىك تۇر.
تەمىر قۇسايىن,
«ەگەمەن قازاقستان»
اقتوبە
