فورۋمعا پارلامەنت ءماجىلىسىنىڭ دەپۋتاتتارى, مەملەكەتتىك ورگانداردىڭ باسشىلارى, قازاقستان رەسپۋبليكاسىنداعى شەتەلدىك ديپلوماتيالىق وكىلدىكتەردىڭ وكىلدەرى, ىسكەرلىك-قاۋىمداستىق, جاس ستارتاپشىلار, ەتنومادەني بىرلەستىكتەردىڭ جەتەكشىلەرى مەن مۇشەلەرى قاتىستى.
ءىس-شارا مەملەكەت باسشىسىنىڭ كاسىپكەرلىكتى دامىتۋ جونىندەگى تاپسىرمالارىنىڭ شەڭبەرىندە وتاندىق ونىمدەردى جانە قازاقستاندىق كاسىپكەرلەردىڭ يمپورت الماستىرۋ بويىنشا باستامالارىن ناسيحاتتاۋعا باعىتتالعان.
جيىن ۇيىمعا مۇشە كاسىپ يەلەرىنىڭ كورمەسىنەن باستالدى. كەڭ دالىزگە قاز-قاتار ورنالاستىرىلعان جەرگىلىكتى ءونىم وندىرۋشىلەردىڭ, قولونەرشىلەردىڭ, جاس ستارتاپشىلاردىڭ قولدارىنان شىققان دۇنيەلەر مەن ولار كورسەتەتىن قىزمەت تۇرلەرى سان الۋان.
جالپى وتىرىستى قحا توراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو اشتى. ونىڭ ايتۋىنا قاراعاندا, اسسوتسياتسيا مۇشەلەرى اراسىندا تەرەڭ ارىپتەستىك قارىم-قاتىناس ورناعان. سونداي-اق قازىرگى ۋاقىتتا قاۋىمداستىق مۇشەلەرى ەلىمىزگە ينۆەستيتسيا تارتۋعا باعىتتالعان بىرقاتار جوبالاردى قولعا العان. وعان قوسا, اسسوتسياتسيا حالىقارالىق كەلىسىمدەر دەڭگەيىنە شىعىپ ۇلگەرگەن. بۇل جۇمىستاردىڭ بارلىعى ەلباسى جولداۋىندا كورسەتىلگەن مىندەتتەردى ورىنداۋعا باعىتتالعان. سوندىقتان اتالعان ۇيىم كەلەسى جىلى ورىندالۋى ءتيىس بەس مىندەتتى بەلگىلەگەن.
– ولار اگروونەركاسىپ كەشەنىنىڭ الەۋەتىن ىسكە اسىرۋ – عىلىمي اگرارلىق-يننوۆاتسيالىق ورتالىق قۇرۋ, اۋىل شارۋاشىلىعى سالاسىنداعى بەدەلدى شەتەلدىك جانە وتاندىق مامانداردى تارتۋ. ەكىنشىسى, جاستار كاسىپكەرلىگىن دامىتۋ – جاس, باستاماشىل كاسىپكەرلەردى قولداۋ, اۋىلدىق جەرلەردە كاسىپكەرلىكتى دامىتۋ, وڭىرلەردە جاستاردى قولداۋ ورتالىعىن قۇرۋ. ءۇشىنشىسى, يمپورتتى الماستىرۋ جانە كووپەراتسيا ورتالىعىن دامىتۋ − حالىق تۇتىناتىن تاۋارلاردى وندىرەتىن كاسىپورىنداردىڭ («قاراپايىم زاتتاردىڭ ەكونوميكاسى») ىنتىماقتاستىعىن دامىتۋ. ءتورتىنشىسى, تەحنولوگيا جانە قۇزىرەتتەردى بەرۋ – زاماناۋي تەحنولوگيالاردى تارتۋ, كاسىپكەرلەرگە جاڭا بيزنەس داعدىلارىن ۇيرەتۋ. بەسىنشىسى, «جاسىل» ەكونوميكا – تابيعي رەسۋرستاردى ۇتىمدى پايدالانۋعا باعىتتالعان جوبالاردى قولداۋ جانە ىلگەرىلەتۋ, تابيعات پايدالانۋشىلارىنىڭ وداعىن, كوگالداندىرۋشىلار كونسورتسيۋمىن قۇرۋ, – دەدى ل.پروكوپەنكو.
جالپى, قازاقستان حالقى اسسامبلەياسى كاسىپكەرلەر اسسوتسياتسياسى قوعامدا بىرلىك پەن كەلىسىمدى ناقتى ىستەردىڭ اينالاسىندا شوعىرلاندىراتىنى بۇقاراعا ءمالىم. ولاردىڭ قاتارىنداعى قالىپتاسقان, تولىسقان, جەتىلگەن كاسىپكەرلەر ءار كەزدە الەۋمەتتىك جاۋاپكەرشىلىكتەرىن ەستەن شىعارعان جوق. سونىمەن قاتار جاستاردى كاسىپكە باۋلۋدى مىندەتىنە الىپ, قاناتتاندىرۋدى ماقسات تۇتقان.
جيىن بارىسىندا ءماجىلىس توراعاسىنىڭ ورىنباسارى ۆلاديمير بوجكو, ءماجىلىس دەپۋتاتى, قازاقستان حالقى اسسامبلەياسى كاسىپكەرلەر اسسوتسياتسياسىنىڭ قۇرمەتتى توراعاسى يۋري تيموششەنكو, ءماجىلىس دەپۋتاتى البەرت راۋ, «ۇلتتىق اگرارلىق عىلىمي-ءبىلىم بەرۋ ورتالىعى» كەاق باسقارما توراعاسى ۇلان تاجىباەۆ ءسوز سويلەدى. ولار نەگىزىنەن كاسىپكەرلىكتى دامىتۋداعى مەملەكەتتىك قولداۋ, كاسىپتىڭ جاڭا قىرلارى مەن حالىقارالىق بايلانىستار جونىندە وي ءوربىتتى.
جالپى وتىرىستىڭ سوڭىندا قازاقستان حالقى اسسامبلەياسى كاسىپكەرلەر اسسوتسياتسياسى فيليالى ديرەكتورلارىنا كۋالىكتەر تاپسىرىلىپ, بىرقاتار مەموراندۋمدارعا قول قويىلدى.
سەرىك ابدىبەك,
«ەگەمەن قازاقستان»
