اتقارىلعان جۇمىستارعا تولىققاندى باعا بەرىلدى, الداعى مىندەتتەر سارالاندى. كلۋب مۇشەلەرى تولعاقتى ويلارىن ورتاعا سالدى. «قازاق پەن كلۋبىنىڭ» تىكەلەي ارالاسۋىمەن جانە قارجىلىق كومەك كورسەتۋىنىڭ ارقاسىندا شەتەلدەن جارىق كورگەن قازاق قالامگەرلەرىنىڭ شىعارمالارى تۋرالى پىكىرلەرى جينالعانداردىڭ كوڭىلدەرىنەن شىقتى. بۇل باستاما الداعى ۋاقىتتا دا جالعاسىن تاپسا دەگەن نيەتتەرىن ءبىلدىردى. ەندىگى كەزەكتە شەت تىلىنە اۋدارىلاتىن تۋىندىلار الدىن الا تالقىلاۋدان وتكىزىلەتىن بولىپ شەشىلدى.
قوعامدىق بىرلەستىك توراعاسى ب. عابدۋللين جىل ىشىندە اتقارىلعان جۇمىستارعا ەسەپ بەردى. ەسەپ بىرلەستىك مۇشەلەرى تاراپىنان قاناعاتتانارلىق دەپ باعالانىپ, كوپشىلىك داۋىسپەن ب. عابدۋللين توراعالىققا قايتا سايلاندى.
وتىرىستىڭ قىزىعى پەن-كلۋبتىڭ ءداستۇرلى لاۋرەاتتارىن انىقتاۋ ەدى. التى-جەتى قالامگەردىڭ شىعارماشىلىق الەۋەتى, شىعارمالارىنىڭ بۇگىنگى كۇن تالاپتارىنا ساي كەلۋى جانە وقىرمانداردىڭ تالعام-تارازىسىنان ءوتۋى دەگەن سەكىلدى كريتەريلەر جان-جاقتى سارالاندى. قورىتىندىسىندا جازۋشى قۋانىش جيەنباي «م. اۋەزوۆ» اتىنداعى, ورىس تىلىندە جازاتىن قالامگەر, اۋدارماشى اسلان جاقسىلىقوۆ «م. ماقاتاەۆ» اتىنداعى سىيلىقتىڭ لاۋرەاتتارى دەپ تانىلدى. ارىپتەستەرگە شىعارماشىلىق تابىستار تىلەيمىز.
