دجيۋ-دجيتسۋ ونەرىنىڭ كوجالدارى, ەلىمىزگە ەڭبەك سىڭىرگەن سپورت شەبەرلەرى شىڭعىس قاسىموۆ پەن قانات جاقىپباەۆتىڭ جۇلدەسى ءۇشىن وتكەن جارىستا قازاقستاننىڭ بىرقاتار ايماعى جانە قىرعىزستان مەن وزبەكستاننان كەلگەن 200-گە تارتا بالعىن بوكسشىلار باق سىنادى. سول ءتۋرنيردى تاماشالاۋ ءۇشىن الماتى وبلىسى دەنە شىنىقتىرۋ جانە سپورت باسقارماسىنىڭ باستىعى, گرەك-ريم كۇرەسىنەن وليمپيا ويىندارىنىڭ كۇمىس جۇلدەگەرى نۇرباقىت تەڭىزباەۆ, بوكستان وليمپيادالىق دايارلاۋ ورتالىعىنىڭ ديرەكتورى, وليمپيادا چەمپيونى ەرماحان ىبىرايىموۆ پەن ونىڭ جەكە باپكەرى تۇرسىنعالي ەدىلوۆ, كسرو كۋبوگىنىڭ يەگەرى بولات ساعىندىقوۆ, دزيۋدودان الەم چەمپيوناتى مەن ازيا ويىندارىنىڭ جۇلدەگەرى, سامبودان الەم چەمپيونى ازامات مۇقانوۆ, قازاقستاننىڭ ستۋدەنتتەر قۇراماسىنىڭ اعا جاتتىقتىرۋشىسى داستان سادۋاقاسوۆ جانە باسقا دا ەل سپورتىنىڭ دامۋىنا وراسان زور ۇلەس قوسىپ جۇرگەن ازاماتتار جولدىباي قايىپوۆ اتىنداعى اۋىلعا ارنايى ات باسىن بۇردى.
جارىستىڭ جابىلۋ سالتاناتىندا ءسوز سويلەگەن داڭقى بوكسشىمىز, وليمپيا ويىندارىنىڭ جەڭىمپازى ەرماحان ىبىرايىموۆ: «بۇگىنگى تاڭدا ەل بوكسىنىڭ قارقىندى دامىپ كەلە جاتقانىن اۋىلدا وتكەن وسىنداي جارىستاردان-اق بايقاۋعا بولادى. مەن بۇگىن بىرقاتار قىزىقتى جەكپە-جەكتەردىڭ كۋاسى بولدىم. ءار وڭىردەن دارىندى بالالاردىڭ كوپتەپ شىعىپ جاتقانىنا قاتتى قۋاندىم. كەلەسى جىلى وسى جاس ەرەكشەلىكتەرى بويىنشا ەل بىرىنشىلىگىنىڭ جالاۋى جەلبىرەيدى. بۇگىنگى تۋرنيردە توپ جارعان بوكسشىلار سول جارىستا دا وزدەرىن جاقسى قىرىنان كورسەتەدى دەپ ويلايمىن. ەڭ باستىسى, جاس ورەندەر ەرىنبەي ەڭبەكتەنۋى كەرەك. جاتتىعۋ زالىندا ايانباي تەر توگىپ, جاۋاپتى جارىستاردا بارىن سالسا, الىنبايتىن قامال جوق. مەن ءوزىم دە وسىنداي تۋرنيرلەرگە قاتىسا ءجۇرىپ ىسىلدىم. سول ارقىلى شەبەرلىگىم شىندالىپ, اقىرى وليمپيا ويىندارىنىڭ التىن تۇعىرىنا كوتەرىلدىم. ەگەر بوكس ونەرىنە ادالدىق تانىتاتىن بولساڭدار, سەندەر دە سونداي بيىككە كوتەرىلەسىڭدەر», – دەپ جاس ورەندەرگە ءوز اقىل-كەڭەسىن بەردى.
ەستەرىڭىزگە سالا كەتەيىك, وسى جارىس يەلەرى شىڭعىس قاسىموۆ پەن قانات جاقىپباەۆتىڭ ەكەۋىنىڭ دە سپورتتىق جولى بوكستان باستالعان. جاسوسپىرىمدەر مەن جاستار بۋىنى اراسىندا جۇدىرىقتاسا ءجۇرىپ, ولار سپورت شەبەرلىگىنە ۇمىتكەر دارەجەسىنە دەيىن جەتتى. كەيىننەن دجيۋ-دجيتسۋ ونەرىنە مىقتاپ دەن قويىپ, كوپتەگەن ءدۇبىرلى دودالاردا جەڭىس تۇعىرىنا كوتەرىلدى. تارقاتىپ ايتساق, الەم جانە ازيا چەمپيوناتتارىندا ءۇش رەتتەن باس جۇلدەنى ولجالاعان شىعىس قاسىموۆ بۇگىنگى تاڭدا جەكپە-جەكتىڭ بۇل تۇرىنەن تورتكۇل دۇنيەدەگى ەڭ مىقتى سپورتشىلاردىڭ ساناتىنا ەركىن قوسىلىپ وتىر. سول سەكىلدى قانات جاقىپباەۆتىڭ دا ءبىر باسىنا جەتەرلىك اتاق-داڭقى بار. ول الەم جانە ازيا چەمپيونى.
