فاريزا اقىن «ولەڭ سەنى ايالاپ وتەم» دەيتىن جىر الەمىندەگى ايگىلى كونتسەپتسياسىن الماتىدا ءجۇرىپ ورنەكتەدى. سوندىقتان دا ءورشىل اقىندى الماتىمەن بايلانىستىراتىن دۇنيە كوپ-اق. قالا اكىمدىگىنىڭ تىكەلەي قولداۋىمەن قويىلعان وسىناۋ مەموريالدى تاقتانى – بۇگىنگى ۇرپاقتىڭ اعا بۋىنعا كورسەتكەن قۇرمەتى دەپ تۇسىنگەن ءجون. كوزى تىرىسىندە-اق حالقىنىڭ ماحابباتىنا بولەنىپ, پوەزيا پاديشاسى اتانعان اياۋلى اقىننىڭ سەزىمگە تولى ساۋلەلى جىرلارى ويلى وقىرمانىن جىر بەسىگىندە تەربەتىپ كەلەدى. مۇنى اق قار كوك مۇزعا قاراماي ەسكەرتكىش تاقتانىڭ اشىلۋ سالتاناتىنا كەلگەن قاراقۇرىم حالىقتىڭ ىستىق ىقىلاسىنان-اق اڭعاردىق. قالا اكىمىنىڭ ورىنباسارى ارمان قىرىقباەۆ اشىپ بەرگەن سالتاناتتى راسىمدە اقىننىڭ وتتى جىرلارى وقىلىپ, قالامداس ىنىلەرىنىڭ جىلى ەستەلىكتەرى ايتىلدى.
– بەسىگىن اتىراۋدىڭ اق تولقىندارى تەربەگەن فاريزا وڭعارسىنوۆا الماتىعا كەلىپ ءوزىنىڭ ونەرمەن, ولەڭمەن تابىسقان, حالىقتىڭ عۇمىربايانىنا كىرگەن جاڭا ءومىرىن باستادى. الماتى اڭىزداردى جاراتقان الاشتىڭ ارعى-بەرگى تاريحىنداعى ۇلىلارىنىڭ تۇساۋىن كەسكەن قالا. وڭعارسىنوۆانىڭ اتىن اڭىزعا اينالدىرعان داستاندارى, ارداقتى تۋىندىلارىنىڭ بارلىعى دەرلىك ارۋ الماتىدا كىندىگىن كەستى. بۇل قالا ونىڭ بۇكىل جاستىق-شاعىنا, ابىرويىن اسقاقتاتقان سىرلى ساتتەرگە كۋا. ءبىر كەزدەرى ءبارىمىز ءۇشىن اساۋ جىردىڭ التىن تورىندەي كورىنگەن, اقىنعا سايا بولعان بۇل ءۇيدىڭ ورنى بولەك. فاريزا, ولەڭ قىزدار پوەزياسى نەمەسە ەرلەر پوەزياسى دەپ بولىنبەيتىنىن, مۇندا تەك ۇلى دارىنداردىڭ داڭعىلى بولاتىنىن دالەلدەپ كەتكەن جان. ۇرپاققا مۇرا بولاتىن بۇل يگى ءىستى بۇكىل قازاق جىرىنا جاسالعان قۇرمەت دەپ ەسەپتەيمىن, – دەيدى مەملەكەت جانە قوعام قايراتكەرى, اقىن نۇرلان ورازالين.
ارمان وكتيابر,
«ەگەمەن قازاقستان»
الماتى
