كوپشىلىكتى قۋانىشتى وقيعامەن قۇتتىقتاعان اماندىق باتالوۆ مەملەكەت قولداۋىنىڭ ارقاسىندا وبلىستا دەنساۋلىق ساقتاۋ سالاسىن دامىتۋدا, مەديتسينالىق قىزمەت كورسەتۋ ساپاسىن ارتتىرۋدا ءبىرشاما جۇمىستار اتقارىلعانىن تىلگە تيەك ەتىپ, نەوناتالدىق ورتالىقتىڭ اشىلۋىن سونىڭ ءبىر ايعاعى دەپ اتاپ ءوتتى:
- مەملەكەتتىڭ باستى مەرەكەسى تاۋەلسىزدىك كۇنىنە وراي ماڭىزدى نىساندى ىسكە قوسىپ وتىرمىز. وبلىسقا جاڭا تۋعان سابيلەرگە, جالپى بالالارعا ارنايى مەديتسينالىق كومەك كورسەتەتىن وسىنداي ورتالىق قاجەت بولاتىن. بۇگىن, مىنە, سول قۋانىشتى كۇنگە جەتىپ وتىرمىز. نەوناتالدى حيرۋرگيالىق ورتالىق قاجەتتى زاماناۋي قۇرالدارمەن تولىق جابدىقتالعان. مۇنداي ورتالىقتار ەلىمىز بويىنشا ساناۋلى عانا. ماماندار ەندى وسى قۇرال-جابدىقتاردى بالالار ەمىنە ءتيىمدى پايدالانادى دەپ سەنەمىز. قازىر ءبىز مەملەكەت باسشىسىنىڭ تاپسىرماسىنا وراي دەنساۋلىق ساقتاۋ سالاسىن تسيفرلاندىرۋدى قولعا الدىق. بۇل رەتتە مەملەكەتتىك-جەكەمەنشىك ارىپتەستىك ءتيىمدى تەتىك بولىپ وتىر. وسى سالاداعى كوپتەگەن جوبالار مەملەكەتتىك-جەكەمەنشىك ارىپتەستىك نەگىزىندە جۇزەگە اسىرىلۋدا. ولاردىڭ قاتارىندا وبلىستىڭ اۋدان, قالالارىنداعى دارىگەرلىك امبۋلاتوريالار, ەمحانالار دا بار. مەديتسينا عىلىمىنىڭ جەتىستىكتەرى, جاڭا قۇرال-جابدىقتاردى كاسىبيلىكپەن ءتيىمدى قولدانۋ ادام ءومىرىن ساقتاۋعا جانە دەنساۋلىعىن نىعايتۋعا سەپتەسەدى دەپ ويلايمىن, - دەدى وبلىس اكىمى ا. باتالوۆ.
سونىمەن قاتار, كەلەسى جىلى وبلىستىق كوپسالالى بالالار اۋرۋحاناسى كۇردەلى جوندەۋدەن وتەتىنىن, اۋماعى اباتتاندىرىلاتىنىن اتاپ ءوتتى. جاس مامان, جاڭا نەوناتالدى حيرۋرگيا ورتالىعىنىڭ رەانيماتولوگ دارىگەرى الياقپار بەك ۇلى قۇتتىقتاۋ تىلەگىنەن كەيىن ءوزىنىڭ دارىگەرلىك تاجىريبەسىمەن ءبولىستى:
- مەنىڭ تاجىريبەمدە جاڭا تۋعان سابيگە كۇردەلى وپەراتسيا جاساۋ ءۇشىن الماتى, استانا قالالارىنا تاسىمالداۋ جاعدايلارى ءجيى كەزدەسەتىن, بۇل, ارينە, ۇلكەن قاۋىپ بولاتىن. ونداي كەزدە ءاربىر ساعات ەمەس, ءتىپتى مينۋتتىڭ ءوزى قىمباتقا تۇسەدى. سوندىقتان مۇنداي ورتالىقتىڭ تالدىقورعاندا اشىلۋى - شىنىندا دا ءبىز ءۇشىن ۇلكەن وقيعا. ءبىز, دارىگەرلەر, ءوز تاراپىمىزدان سابيلەردىڭ دەنساۋلىعى مەن ءومىرىن ساقتاۋعا جانە نىعايتۋعا بار كۇش-جىگەرىمىزدى جۇمسايمىز, - دەدى.
نەوناتالدى حيرۋرگيا ورتالىعى 60 توسەككە شاقتالعان, 20 پالاتاسى بار. رەانيماتسيالىق بولىمدە 9 توسەك قويىلعان. ورتالىق جاڭا وزىق ۇلگىدەگى قۇرالدارمەن جابدىقتالعان. اتاپ ايتقاندا, لاپاروسكوپيالىق باعان, بەينەكولونوسكوپ, فيبروگاستروسكوپ, برونحوسكوپ, ناركوزدىق اپپاراتتار, يۆل, جاڭا تۋعان نارەستەگە ارنالعان «جيراف» رەانيماتسيالىق ۇستەلى, فوتوتەراپيا اپپاراتتارى, كيۋۆەزدەر, رەانيماتسيالىق توسەكتەر بار. قازىر ورتالىقتا 5 بالا ەم الىپ جاتىر. جوبانىڭ قۇنى - 896,2 ملن تەڭگە.
جاڭا نەوناتالدى ورتالىقتىڭ مىندەتى - جاڭا تۋعان سابيلەرگە جانە بالالارعا كورسەتىلەتىن مەديتسينالىق كومەكتى جەتىلدىرۋ. جالپى الماتى وبلىسىندا مەديتسينا ماماندارىنىڭ بىلىكتىلىگىن ارتتىرۋعا, ولاردى قايتا دايارلاۋعا كوپ كوڭىل بولىنەدى. بۇل ماقساتقا 2018 جىلى جەرگىلىكتى بيۋدجەتتەن 201,5 ملن تەڭگە بولىنگەن. سونىڭ ناتيجەسىندە ءوڭىردىڭ مەديتسينا قىزمەتكەرلەرى شەتەلدىڭ وزىق كلينيكالارىندا تاجىريبە الماسۋعا, بەلگىلى كلينيكالاردىڭ جوعارى بىلىكتى ماماندارىنان ءدارىس تىڭداۋعا مۇمكىندىك الدى. ماسەلەن, 2018 جىلى 344 مامان ليتۆا, پولشا, وڭتۇستىك كورەيا, تۇركيا كادرلارىنان ءدارىس الدى.
