زاڭ جوباسى تابيعي مونوپوليالار سۋبەكتىلەرى قىزمەتىنىڭ تيىمدىلىگىن ارتتىرۋعا, تاريفتەردى قالىپتاستىرۋ پروتسەسىنىڭ اشىقتىعىن قامتاماسىز ەتۋگە, تاريفتىك سمەتالار مەن ينۆەستيتسيالىق باعدارلامالاردىڭ ورىندالۋىنا باقىلاۋدى كۇشەيتۋگە, سونداي-اق وسى سالالارعا ينۆەستيتسيالاردى ۇلعايتۋعا باعىتتالعان.
قۇجات تابيعي مونوپوليانىڭ سالالارى مەن وسى سالالارداعى سۋبەكتىلەردىڭ مەملەكەتتىك تىركەلىمىن قالىپتاستىرۋ ءتارتىبىن ايقىندايدى, سونداي-اق تابيعي مونوپوليالار سۋبەكتىلەر قىزمەتىنە تاريفتەردىڭ تۇرلەرى مەن ولاردى بەلگىلەۋ ءتارتىبىن رەتتەيدى.
زاڭنامالىق دەڭگەيدە رەتتەلىپ كورسەتىلەتىن قىزمەتتەردىڭ ساپاسى مەن سەنىمدىلىك كورسەتكىشتەرىن, سونداي-اق تابيعي مونوپوليالار سۋبەكتىلەرى قىزمەتىنىڭ تيىمدىلىك كورسەتكىشتەرىن ايقىنداۋدى كوزدەيتىن ءتاريفتى رەتتەۋدىڭ ىنتالاندىرۋ ادىستەرى ەنگىزىلەدى.
تابيعي مونوپوليالار سۋبەكتىلەرى قىزمەتىنىڭ اشىقتىعىن ارتتىرۋ, تاريفتىك سمەتالار مەن ينۆەستيتسيالىق باعدارلامالاردىڭ ورىندالۋىن باقىلاۋدى كۇشەيتۋ ماقساتىندا زاڭ جوباسىمەن مەملەكەتتىك رەتتەۋ پروتسەسىنىڭ جاريالىلىعى كوزدەلەدى. وسىعان وراي, تاريفتىك ساياسات جونىندەگى كەڭەس ەنگىزىلەدى جانە قوعامدىق بىرلەستىكتەردىڭ جۇمىس ىستەۋى رەتتەلەدى, سونداي-اق, تابيعي مونوپوليالار سۋبەكتىلەرىنىڭ بۇقارالىق اقپارات قۇرالدارىندا بەكىتىلگەن تاريفتىك سمەتالار مەن ينۆەستيتسيالىق باعدارلامالاردىڭ ورىندالۋى تۋرالى ەسەپتەردى ورنالاستىرۋ جونىندەگى مىندەتى كوزدەلەدى.
سونىمەن قاتار, زاڭ جوباسىمەن ينۆەستيتسيالىق باعدارلامانىڭ ورىندالۋىنا جانە تابيعي مونوپوليالار سۋبەكتىلەرى قىزمەتىنىڭ تيىمدىلىك كورسەتكىشتەرىنە قول جەتكىزۋگە قوعامدىق مونيتورينگ پەن تەحنيكالىق ساراپتاما جۇرگىزۋ ءتارتىبى بەلگىلەنەدى.
سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ساتىپ الۋ جانە كۆازيمەملەكەتتىك سەكتور سۋبەكتىلەرىنىڭ ساتىپ الۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا تالقىلادى.
تۇزەتۋلەر 14 زاڭنامالىق اكتىگە, ونىڭ ىشىندە بيۋدجەت, كاسىپكەرلىك, سالىق جانە اكىمشىلىك قۇقىق بۇزۋشىلىق تۋرالى كودەكستەرگە جانە 10 زاڭعا ەنگىزىلەدى.
قۇجاتتا ورتالىقتاندىرىلعان قىزمەت نەگىزىندە مەملەكەتتىك ساتىپ الۋلاردىڭ بىرىڭعاي جۇيەسىن ەنگىزۋ, كۆازيمەملەكەتتىك سەكتوردا ساتىپ الۋ وتكىزۋ ادىستەرىن قايتا قاراۋ قاراستىرىلىپ وتىر. مەملەكەتتىك ورگاندار مەن كۆازيمەملەكەتتىك سەكتور سۋبەكتىلەرىنىڭ اقپارات جۇيەسىندە ەلەكتروندىق تۇردە بىرىڭعاي ساتىپ الۋ ورنىن قۇرۋ كوزدەلگەن.
كۆازيمەملەكەتتىك سەكتوردىڭ ساتىپ الۋلارىن رەتتەيتىن قۇقىقتىق ەرەجەلەرىن بۇزعانى ءۇشىن اكىمشىلىك جاۋاپتىلىق ەنگىزىلەدى. مەملەكەتتىك ساتىپ الۋ جۇيەسىندە شاعىمدار ۆەب-پورتالى ارقىلى بەرىلگەن مالىمەتتەردى, سونداي-اق ولاردى قاراۋ ناتيجەلەرى بويىنشا قابىلداعان شەشىمدەردى كورسەتەتىن رەسپۋبليكالىق شاعىمدار تىزىمدەمەسىن قالىپتاستىرۋ جانە ەنگىزۋ كودەلۋدە.
زاڭ جوباسىمەن الەۋەتتى جابدىقتاۋشىنىڭ قارجىلىق ورنىقتىلىعى جونىندە جاڭا بىلىكتىلىك تالاپتارى بەلگىلەنىپ وتىر. سونداي-اق وفشورلىق ايماقتاردا تىركەلگەن الەۋەتتى جابدىقتاۋشىلاردىڭ ساتىپ الۋعا قاتىسۋىنا تىيىم سالىناتىن بولدى.
كوميتەت وتىرىسىندا سول كۇنى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى № 8156-KZ قارىز تۋرالى كەلiسiمگە (شىعىس – باتىس اۆتوموبيل جولدارىن دامىتۋ جوباسى (الماتى – قورعاس ۋچاسكەسى): باتىس ەۋروپا – باتىس قىتاي حالىقارالىق ترانزيت ءدالىزى (واوەى 1b) تۇزەتۋلەرگە قاتىستى قر مەن حققدب اراسىنداعى كەلىسىم-حاتتى راتيفيكاتسيالاۋ تۋرالى» زاڭ جوباسى دا قارالدى.
قۇجاتتا «ورتالىق-وڭتۇستىك» دالىزىندەگى «استانا – قاراعاندى – بالقاش – كۇرتى – قاپشاعاي – الماتى» اۆتوموبيل جولىنىڭ «بالقاش – بۋرىلبايتال» قوسىمشا بولىگىن قوسۋ قاراستىرىلعان. رەسپۋبليكالىق بيۋدجەت كوميسسياسىنىڭ 2018 جىلعى 11 قاڭتارداعى وتىرىسىنىڭ حاتتاماسى بويىنشا, «بالقاش – بۋرىلبايتال» بولىگىن جاڭعىرتۋ حققدب قارىزىنىڭ ۇنەمدەلگەن قارجىسى مەن رەسپۋبليكالىق بيۋدجەتتەن قوسىمشا قارجىلاندىرۋ ەسەبىنەن قارجىلاندىرۋ ماقۇلداندى.
زاڭ جوبالارى پالاتانىڭ قاراۋىنا جىبەرىلدى.
