«بالۋان شولاق» – رەجيسسەر نۇرگەلدى سادىعۇلوۆتىڭ كوركەم فيلم سالاسىنداعى سونى قادامى, تىرناقالدى تۋىندىسى ەكەنىن اتاپ وتكەن ءجون.
سوڭعى ەكى اي شىعارماشىلىق توپ ءۇشىن اۋقىمدى تۇسىرىلىمدەردىڭ مونتاجىنا ارنالدى. مونتاجدىڭ سوڭعى نۇسقاسى «قازاقفيلم» كينوستۋدياسىنىڭ ساراپتامالىق كەڭەسىنە كورسەتىلىپ, وسىدان كەيىن عانا دىبىستاۋ, گرافيكا جانە تۇستەۋ جۇمىستارى اتقارىلدى, – دەدى رەجيسسەر.
سونداي-اق رەجيسسەر بۋرابايدا وتكەن تۇسىرىلىمدەر تۋرالى بايانداي كەلە: «كوكشەتاۋداعى تۇسىرىلىمدەر وتە ءساتتى ءوتتى دەپ ويلايمىن, سەبەبى مەن ءۇشىن تابيعات تاپتىرماس اكتەر. ءتۇسىرىلىم كەزىندە جاڭبىر جاۋىپ, بوران دا بولدى. سوعان قاراماستان, ءتۇسىرىلىم توبى ءبىر ادامداي جۇمىس ىستەدى. سونىڭ ارقاسىندا الدىمىزعا قويعان ماقساتىمىزعا قول جەتكىزدىك» دەگەن بولاتىن.
ءفيلمنىڭ تۇسىرىلىمدەرى الماتى وبلىسى, پاۆلودار قالاسى جانە بۋرابايدا وتكەن. كوپشىلىك ساحنالارعا 300-گە جۋىق ادام قاتىسقان.
– ەڭ باستىسى مەن ءۇشىن بالۋان شولاقتىڭ بەينەسىن ۇلكەن ەكرانعا اكەلۋ جانە سول ءداۋىردى كورسەتۋ بولدى. اكتەرلەردىڭ بارلىعى دا بارىن سالدى. دەگەنمەن, بالۋان شولاق رولىندەگى ەركەبۇلان دايىروۆ, اقىلبايدى سومداعان مەدعات ومىراليەۆ پەن دولگونوسوۆتى ويناعان الەكساندر باگريانتسەۆتى ەرەكشە اتاپ وتكىم كەلەدى, – دەدى رەجيسسەر نۇرگەلدى سادىعۇلوۆ.
وسى ارادا فيلمگە ەكى بىردەي ترەيلەر جانە ەكى ساۋندترەك ازىرلەنگەنىن ايتا كەتەلىك. فيلم الداعى كۇندەرى قالىڭ كورەرمەنىمەن قاۋىشادى.
ايناش ەسالي,
«ەگەمەن قازاقستان»
الماتى
