تاۋەلسىزدىك تويىمىز 16 جەلتوقساندا اتالادى. مەرەكەنىڭ داتاسى مەرەكەلىك ءىس-شارالار ۇيىمداستىرۋعا سونشاما قولايلى دەۋ دە قيىنداۋ, راسىندا. كوشەگە شىعا كەلسەڭىز ارقانىڭ ارقىراعان ايازى بەتىڭىزدى شىمشيتىن استانانى ايتپاعاندا, ەڭ جىلى دەگەن وڭتۇستىك وڭىرلەردە دە بۇل كەزدە اق قار, كوك مۇز جەر بەتىن جاۋىپ جاتادى. بىراق ءبارىبىر ءوزىمىزدىڭ مەملەكەتىمىزدىڭ باستى مەرەكەسى جانىمىزعا جاقىن, جۇرەگىمىزگە جىلى. ماعان ايتقىزساڭىز, ءتىپتى, تاۋەلسىزدىك جاريالاعان كۇنىمىزدىڭ وسى مەزگىلگە ورايلاسۋى ورىندى دا. نەگە دەيسىز عوي؟ ويتكەنى تاۋەلسىزدىك تويىن وسىنداي قاتالداۋ اۋا رايىندا اتاپ ءوتۋ قازىرگى, كەلەر ۇرپاقتاردىڭ بارىنە بىزگە ءبىر كەزدە, عاسىرلار توعىسىندا, مىڭجىلدىقتار ايىرىعىندا تاۋەلسىزدىكتىڭ قانداي جاعدايدا, قالاي كەلگەنىن ءدايىم ەسكە سالىپ تۇرادى.
1991 جىلدىڭ كۇزىندە, كسرو-نىڭ قۇرامىنداعى كەڭەستىك رەسپۋبليكالار اپتا ارالاتىپ بىرىنەن كەيىن ءبىرى وزدەرىنىڭ مەملەكەتتىك تاۋەلسىزدىگىن جارىسا جاريالاپ جاتقاندا نۇرسۇلتان نازارباەۆقا «جۇرتتان نەگە قالىپ قويدىق؟ نەگە كەشىگىپ جاتىرمىز؟» دەگەن تۇرعىدا جان-جاقتان سۇراق جاۋدىرعانداردىڭ جەتكىلىكتى بولعانىن, ولاردىڭ اراسىندا پرەزيدەنتتى ايىپتاۋشىلاردىڭ دا از تابىلماعانىن جاقسى بىلەمىز. ەل تاعدىرىنا ەلەڭدەيتىن ەت جۇرەكتى ءار پەرزەنت مۇنى ىشتەي سەزىپ ءجۇردى. بايىرعى ۇلتتىڭ سانى رەسپۋبليكا حالقىنىڭ 40 پايىزىنا دا جەتپەيتىن (39%) كەزدە, قازاقتار كەي وبلىس ورتالىقتارىندا 10 پايىزدى عانا قۇرايتىن كەزدە, ورتاق وتان ۇعىمى سانادان ءوتىپ, سۇيەككە جەتىپ ۇلگەرگەن كەزدە اياق استىنان بولەك شىعۋ, تاريحي وتاننان شەتتەۋ دەگەنىڭىز ميلليونداعان ادام ءۇشىن جاندى جارالايتىنداي, جۇرەكتى جابىرقاتاتىنداي جاي ەكەنىن ءتۇسىنۋ تىم قيىن ەمەس. بىراق نۇرسۇلتان نازارباەۆ بۇل ءتۇيىندى دە اقىرى تارقاتتى. حالقىمىزعا تاريح جۇكتەيتىن سىننىڭ سالماعىن سەزىندىردى. تاۋەلسىزدىكتىڭ تار جول, تايعاق كەشۋىنە تاۋەكەل ەتۋ كەرەكتىگىنە بارشانى سەندىردى. سەندىردى دە, سالقىن سابىرىنىڭ, اسقان اقىلىنىڭ ارقاسىندا سول وي قيسىنىنا كوندىردى دە.
ول تۇستا پرەزيدەنت اپپاراتىندا ىستەگەندىكتەن ءارى ءبىزدىڭ ءبولىمنىڭ كابينەتتەرى پارلامەنت عيماراتىندا ورنالاسقاندىقتان, جۇمىستا جۇرگەنىمىزبەن, جاڭبىر-جاڭبىردىڭ اراسىندا شىداماي كەتىپ, سول كەزدەگى جوعارعى كەڭەستىڭ ءماجىلىس زالىنىڭ بالكونىنا بارىپ, تاۋەلسىزدىك جاريالاۋ ماسەلەلەرىن قىزبا-قىزۋ تالقىلاۋدىڭ, سونىڭ توڭىرەگىندەگى ايتىس-تارتىستىڭ, داۋ-دامايدىڭ شەت جاعاسىن ءبىز دە تىڭداي العانبىز. تاۋەلسىزدىكتىڭ ون جىلدىعىندا جاريالاعان «1991» اتتى ماقالامىزدا: «رازىلىقتان ايتارعا ءسوز تابا الماعان شاقتار دا, تاڭدانعاننان جاعا ۇستاعان ساتتەر دە بولدى. «جەتپىس جىل بويى جەلكەلەپ, سوگىپ جۇرگەن رەسەيلىك يمپەريانىڭ ۇلگىسى بويىنشا قازاق يمپەرياسىن قۇرۋعا ارەكەتتەنىپ جۇرگەنىمىز جوق پا؟» دەپ بوپسالاعاندار دا تابىلعانىن ايتىپ قايتەيىك, ەلىڭدە, جەرىڭدە وتىرىپ, تاۋەلسىزدىگىڭە اشىقتان-اشىق قارسى داۋىس بەرگەن ءبىر ەمەس, ەكى ەمەس, ون ەكى بىردەي دەپۋتات تابىلعانىن ايتىپ قايتەيىك. ايتەۋىر, ءتۇبى قايىر. بارىنە – سالاۋات», دەپ تە جازعانبىز.
ءيا, ءتۇبى قايىر بولدى. ەلباسى ەلىنە سەندى. ەل باستايتىن ەرگە ەل دە سەندى. سەنىپ, ەكى تىزگىن, ءبىر شىلبىردى بەردى. مەملەكەت قۇرا الاتىنىمىزدى, مىعىم تۇرا الاتىنىمىزدى كوردى. بىرتە-بىرتە قاناتتاندى, قۋاتتاندى. قۋاتتى ەل اتاندى. ءسويتىپ مىنە, بۇگىنگى بيىگىنە كەلدى. تاۋبە! وسىنىڭ ءبارىنىڭ باستاۋىندا ەلدىكتىڭ ەلەڭ-الاڭىندا-اق تانىلعان اسقان اقىلدىڭ, سالقىن سابىردىڭ الار ورنى وراسان.
ساۋىتبەك ابدراحمانوۆ,
پارلامەنت ءماجىلىسىنىڭ دەپۋتاتى
