الدىمەن تاۋەلسىزدىگىمىز تۋرالى سىر شەرتەر دەرەكتى فيلم كورەرمەندەر نازارىنا ۇسىنىلدى. ارتىنشا مىنبەرگە بايقوڭىر اۋدانىنىڭ اكىمى ەرلان كاناليموۆ كوتەرىلىپ, بارشا جۇرتتى ەلىمىزدىڭ باستى مەرەكەسى تاۋەلسىزدىك كۇنى مەرەكەسىمەن قۇتتىقتادى.
- تاۋەلسىزدىك باستى بايلىعىمىز, قۇن جەتپەس قۇندىلىعىمىز. 27 جىل ىشىندە ەلىمىز بارلىق سالادا العا شىعىپ, ۇلكەن دامۋ جولىنان ءوتتى, - دەدى اۋدان اكىمى.
قۇتتىقتاۋ سوزدەن كەيىن اۋدان باسشىسى بىرقاتار اكىمدىك قىزمەتكەرلەرى مەن اۋدانداعى مەكەمە باسشىلارىن «استاناعا 20 جىل» مەرەكەلىك مەدالمەن ماراپاتتادى.
الايدا, بۇل ماراپاتتاردى سوڭى ەمەس ەدى. ساحناعا قازاقستان رەسپۋبليكاسى ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆ شىعىپ, اۋدان تۇرعىندارىنا ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆتىڭ قۇتتىقتاۋىن جەتكىزدى. سونداي-اق, ەل الدىندا مەرەكەگە وراي بايقوڭىر اۋدانىنىڭ اكىمى ەرلان كاناليموۆ ۇلتىق ۇلانمەن اراداعى ىنتىماقتاستىقتى نىعايتۋعا قوسقان ۇلەسى ءۇشىن ءىى – دارەجەلى «ۇلتتىق ۇلان قىزمەتىنىڭ ۇزدىگى» كەۋدە بەلگىسىمەن ماراپاتتالدى. ۇلتىق ۇلاننىڭ باس تالىمگەرى ەل الدىندا اۋدان باسشىسىنىڭ كەۋدەسىنە ناگرادانى ءوز قولىمەن تاقتى.
سالتاناتتى شارا ۇلتتىق ۇلان اسكەري-وركەسترلىك ورتالىعىنىڭ باستىعى پودپولكوۆنيك اسحات مۇحامەدياروۆ باستاعان ۇلگىلىك-كورسەتىمدى وركەسترى جانە ءان-بي ءانسامبلىنىڭ باستىعى كاپيتان دارحان راحىمعاليەۆ جەتەكشىلىك ەتكەن ونەرپازداردىڭ كونتسەرتتىك باعدارلاماسىمەن ۇلاستى. IV جالپىرەسەيلىك بايقاۋدىڭ III دارەجەلى لاۋرەاتى, ۇلتتىق ۇلاننىڭ ءان-بي ءانسامبلىنىڭ ءسوليسى نەماتيللو زكرۋللاەۆ, وتاندىق ەسترادا جۇلدىزى مۇرات قوجا, ۇلاندىق انشىلەر, ەلىمىزدىڭ ەڭبەك سىڭىرگەن قايراتكەرى مۇرات نۇرعازيەۆ, دەنيس ياكوۆلەۆ, عايني جۇماشەۆا ونەر كورسەتسە, مىڭ بۇرالعان بيشىلەر دە ونەرلەرىن ورتاعا سالدى.
ارتىستەردىڭ ساحناعا شىعۋى ءبىر-بىرىنە ۇقسامادى. ءساندى كوستيۋمدەر, جارقىن وبرازدار, كوركىن اشار تاقىرىپتى بەينەروليكتەر كورەرمەندى ەلجىرەتتى.
شارا سوڭىندا ۇلاندىق ونەرپازدارعا بايقوڭىر اۋدانىنىڭ اكىمى اتىنان ىقىلاس گ ۇلى ۇسىنىلدى.
