مىنە, كوپ ۇزاماي-اق ايا مەن بوتا ماسكەۋدە وتكەن «رۋسسكي سيلۋەت» بايقاۋىنىڭ تاريحىندا جەڭىسكە جەتكەن العاشقى قازاق ديزاينەرلەرى اتاندى. اتالمىش سايىستىڭ «شەكاراسىز بايقاۋ» بولىگىندە دۇنيەنىڭ ءار شالعايىنداعى دارىندار ءوز جۇمىستارىن ءبىر اي بويى اشىق ونلاين-داۋىسقا سالادى. جۇرتتان ەڭ كوپ داۋىس جيناعان مودەلەرلەر جەڭىسكە جەتەدى.
ناتيجەسىندە ۇزدىكتەردىڭ ىشىنەن ءۇزىلىپ شىققان ديزاينەرلەرىمىز باسقا قاتىسۋشىلارمەن بىرگە ماسكەۋدە وتكەن جاس ديزاينەرلەردىڭ «رۋسسكي سيلۋەت» ءحىى حالىقارالىق بايقاۋىندا وزدەرىنىڭ 5 ۇلگىدەن تۇراتىن توپتاماسىن كورسەتۋگە مۇمكىندىك الدى. رەسەيدىڭ بارلىق تۇكپىرىنەن, اينالاداعى مەملەكەتتەر مەن چەرنوگوريا, قىتاي جانە وڭتۇستىك كورەيادان كەلگەن 94 ىسمەرمەن بىرگە ءسان الەمىندە سالتانات قۇرعان قىرعىزباەۆالاردىڭ قولتاڭباسىنا 60-قا تارتا قازىلار القاسىنىڭ قاتارىندا ۆياچەسلاۆ زايتسەۆ, ۆالەنتين يۋداشكين, فرانتسۋز مودەلەرى كلود بونۋچچي, Bosco di Ciliegi ماركەتينگ ديرەكتورى يليا كۋسنيروۆيچ, اناستاسيا زادورينا, يگور گۋلياەۆ, ۆيكتوريا اندرەيانوۆا, دجەمال ماحمۋدوۆ, سەرگەي سىسوەۆ سىندى مودا مەترلەرى باعا بەردى.
ايا مەن بوتا قىرعىزباەۆالار: ء«بىز بۇل بايقاۋدا اۆانگارد ستيلىندە, فۋتۋريزم باعىتىنداعى «جاڭبىر سالعان سۋرەتتەر» توپتاماسىن ۇسىندىق. كيىم ۇلگىلەرىندە قيالدىق كونسترۋكتسيالارعا, اكسەسسۋارلار مەن باس كيىمدەردە تاڭدانىس تۋدىرارلىق پىشىندەرگە باسىمدىق بەردىك. كوللەكتسيا بوياۋلارى اق, قارا, سۇر, قىزىل تۇستەردەن تۇرادى. ءوز ۇلگىلەرىمىزدى قازاقستاندا شىعارىلاتىن «Evo» فابريكاسى ۇسىنعان اياق كيىمدەرىمەن تولىقتىردىق», دەيدى.
قازاق قىزدارىنىڭ بۇل بايقاۋدان تاپقان تاعى ءبىر تابىسى ولار ماسكەۋدەگى «R.E.D دۇكەنىندە ءوز كوللەكتسيالارىن ۇسىنۋ» باقىتىنا يە بولدى.
ايناش ەسالي,
«ەگەمەن قازاقستان»
الماتى
