«عافۋ اقىننىڭ تۋعانىنا 90 جىل تولۋىنا ارنالعان ۇلكەن شارا استانادا ءوتتى. تۋعان جەرى دە قاراپ وتىرعان جوق. اقىننىڭ كىندىك قانى تامعان تورعاي ءوڭىرى مەن قوستانايدىڭ بارلىق اۋداندارى مەن قالالارىنداعى كىتاپحانالار مەن مەكتەپتەردە, كوللەدجدەردە اقىننىڭ مەرەيتويىنا وراي شارالار كەڭىنەن ءوتتى. بۇگىنگى كەش سول شارالاردىڭ قورىتىندىسى بولىپ وتىر. بيىل مادەنيەت مينيسترلىگىنىڭ قولداۋىمەن اقىن شىعارمالارىنىڭ 3 تومدىعى جارىق كوردى. ءبىز اقىننىڭ ۇلى باقىت اعامىزدىڭ وتىنىشىمەن ول كىتاپتاردى وبلىستىق امبەباپ كىتاپحاناعا اكەلىپ تاپسىردىق. ەندى ونىمەن قوستانايلىق وقىرماندار دا تانىسا الادى.» دەدى ەرلان بولات ۇلى. ودان كەيىن ءو.سۇلتانعازين اتىنداعى قوستاناي پەداگوگيكا ۋنيۆەرسيتەتى فيلولوگيا فاكۋلتەتىنىڭ دەكانى كەنجەگۇل ەسىركەپوۆا عافۋ قايىربەكوۆتىڭ شىعارماشىلىعى تۋرالى بايانداما جاسادى. عافۋدىڭ كوزىن كورگەن, جانىندا جۇرگەن قوستانايلىق رۋحاني ىنىلەرى عۇمار احمەتچين, ناعاشىباي مۇقاتوۆ ەستەلىكتەر ايتتى.
«عافاڭنىڭ ولەڭىنە جازىلعان ءشامشىنىڭ «انا تۋرالى جىر» ءانىن تۇركى تىلدەس حالىقتار ءوز انىندەي شىرقايدى. مەن ۋفاعا قۇدالىققا بارعاندا وسى ءاندى ايتامىز عوي دەپ دايىندالىپ بارساق, تاتار قۇدالار بىزدەن بۇرىن ايتىپ قويعانى بار. ولار ءاندى تاتار تىلىندە ايتتى, ءبىز سوسىن قازاق تىلىندە شىرقاپ بەردىك. سويتسەك, تاتارلار «قازاقتار ءوز اندەرىڭدى ايتىڭدار, بۇل ءبىزدىڭ ءان» دەپ «قىزعانىشتىق» كورسەتتى. سودان مەن قالتامداعى ءان جيناعىن كورسەتىپ, تالاسقانىم بار» دەپ قىزىقتى ەستەلىك ايتتى جازۋشى عۇمار احمەتچين.
«عافاڭنىڭ ولەڭدەرى كەڭ تارالدى. ونىڭ شىعارمالارىنىڭ اراسىندا تۋعان جەر تۋرالى اسقاق ۇنمەن جازىلعان, پاتريوتتىق سەزىمگە تولى ءارى نازىك ليريكالارى ءبىر توبە. انگە اينالىپ كەتكەن ولەڭدەرى قانشاما! عافۋدىڭ كەرەمەت انشىلىگى دە بولعان. قازىر قوستانايداعى ەڭ ۇزىن كوشە, ونىڭ بويىنداعى قازاق ورتا مەكتەبى اقىننىڭ اتىندا. بۇل تۋعان جەردىڭ اقىن ۇلىنا دەگەن قۇرمەتى» دەدى كەشتى جۇرگىزگەن اقىن اقىلبەك شاياحمەت.
كەشتى مەكتەپ وقۋشىلارى مەن ءو.سۇلتانعازين اتىنداعى قوستاناي پەداگوگيكا ۋنيۆەرسيتەتىنىڭ ستۋدەنتتەرى عافۋدىڭ ولەڭدەرىمەن, ە.ومىرزاقوۆ اتىنداعى وبلىستىق فيلارمونيانىڭ انشىلەرى اقىننىڭ سوزىنە جازىلعان اندەرمەن كوركەمدەپ وتىردى.
ءنازيرا جارىمبەت,
«ەگەمەن قازاقستان»
قوستاناي
