ەنەرگەتيكا مينيسترلىگىنىڭ مالىمەتىنشە, 2018 جىلدىڭ 11 ايىندا وتىن-ەنەرگەتيكا سالاسىنىڭ نەگىزگى كورسەتكىشتەرى وڭ ءوسىم ديناميكاسىن كورسەتىپ وتىر.
82,4 ملن توننا مۇناي جانە كوندەنسات ءوندىرىلدى, بۇل 2017 جىلدىڭ سايكەس كەزەڭىمەن سالىستىرعاندا 4,9%-عا جوعارى. ق. بوزىمباەۆ اتاپ وتكەندەي, ونىڭ ىشىندە, ءۇش ءىرى جوبا بويىنشا مۇناي ءوندىرۋ كولەمى 49 ملن توننانى قۇرادى: قاشاعاندا — 12 ملن توننا, تەڭىزدە — 25,9 ملن توننا, قاراشىعاناقتا — 11,1 ملن توننا مۇناي ءوندىرىلدى. مۇناي ەكسپورتىنىڭ كولەمى 66 ملن تونناعا جەتتى, بۇل بىلتىرعى سايكەس كەزەڭىمەن سالىستىرعاندا 3,8%-عا ارتىق.
«مۇناي وڭدەۋ كولەمى شامامەن 15 ملن توننانى قۇرادى, بۇل 2017 جىلدىڭ سايكەس كەزەڭىمەن سالىستىرعاندا 8,6%-عا جوعارى جانە وسى جىلدىڭ 11 ايىندا جوسپاردان 2,4%-عا ارتىق. مۇناي ونىمدەرى ءوندىرىسىنىڭ كولەمى (اۆياكەروسين, ديزەلدى وتىن, مازۋت, بەنزين) 10,6 ملن توننانى قۇرادى, بۇل 2017 جىلدىڭ وسىنداي كەزەڭىمەن سالىستىرعاندا 9,3%-عا جانە بيىلعى 11 ايدىڭ جوسپارىنان 3,9%-عا ارتىق», — دەپ باياندادى ەنەرگەتيكا ءمينيسترى ق. بوزىمباەۆ.
جالپى, ءمينيستردىڭ ايتۋىنشا, مۇناي ونىمدەرى نارىعىنداعى جاعداي تۇراقتى, جانار-جاعارماي تاپشىلىعى جوق. 10 جەلتوقسانداعى جاعداي بويىنشا, اي-92 ماركالى بەنزيننىڭ ورتاشا باعاسى: ءبىر ءليترى ءۇشىن 154,8 تەڭگە, ال ماۋسىم ارالىعىندا ديزەل وتىنىنىڭ ءبىر ءليترى 193,2 تەڭگەنى قۇرايدى. ەلىمىزدەگى مۇناي بازالارىندا جانار-جاعار مايدىڭ قالدىق قورىنىڭ كولەمى ىشكى نارىقتىڭ قاجەتتىلىگىن وتەۋ ءۇشىن جەتكىلىكتى: اي-92 بەنزينىنىڭ قورى – 267,5 مىڭ توننا (30 كۇنگە) جانە ديزەل وتىنى – 143,2 مىڭ توننا (11 كۇنگە) .
«ەلىمىزدىڭ شەكارالاس اۋماقتارىندا جانار-جاعارمايدى ترانزيتتىك تاسىمالداۋدا جوعارى تۇتىنۋ فاكتىلەرى ورىن الۋدا. بۇل كورشىلەس ەلدەرمەن سالىستىرعاندا مۇناي ونىمدەرى باعالارىنىڭ ايىرماشىلىعىنا بايلانىستى بولىپ وتىر», — دەدى ق.. بوزىمباەۆ.
وسىعان بايلانىستى, قازاقستاندا جانارماي باعاسىنىڭ كوتەرىلۋىنە جول بەرمەۋ ءۇشىن, سونداي-اق ديزەل وتىنى تاپشىلىعىنىڭ قاۋپىن ازايتۋ ماقساتىندا ەنەرگەتيكا مينيسترلىگى ەۋرازيالىق ەكونوميكالىق وداقتىڭ نورمالارىنا قايشى كەلمەيتىن قولدانىستاعى زاڭناما نەگىزىندە, قازاقستان رەسپۋبليكاسىنىڭ شەكاراسىنان تىس جەرلەرگە مۇناي ونىمدەرىن (ديزەل وتىنى) شىعارۋعا ۋاقىتشا تىيىم سالۋ ءۇشىن شارالار ازىرلەۋدە.
قازاقستاندا اي-92 ماركالى بەنزيننىڭ بولشەك ساۋدا باعاسى ءبىر ليتر ءۇشىن 154,8 تەڭگە, رەسەي فەدەراتسياسىندا — 230,5 تەڭگە, وزبەكستاندا — 273 تەڭگە, قىرعىزستاندا — 234 تەڭگەنى قۇرايدى. قازاقستاندا ديزەلدى وتىننىڭ ءبىر ءليترى ورتا ەسەپپەن — 193,2 تەڭگەنى, رف-تە — 246,5 تەڭگەنى, قىرعىزستاندا — 250,8 تەڭگە, ال وزبەكستاندا — 208 تەڭگە قۇرايدى.
50,5 ملرد م3 گاز ءوندىرىلدى, 2017 جىلدىڭ قاڭتار–قاراشا ايلارىمەن سالىستىرعاندا 4,8%-عا ارتتى, ال 11 ايدىڭ جوسپارىنان 6,1% ءوسىمدى كورسەتتى. گاز ەكسپورتىنىڭ كولەمى 17,9 ملرد م3 قۇرادى, بۇل 2017 ج. سايكەس كەزەڭىنەن 14%-عا جوعارى.
ەم دەرەكتەرىنە سايكەس, سۇيىتىلعان مۇناي گازىنىڭ ءوندىرىسى 2,8 ملن توننانى قۇرادى, بۇل 2017 جىلدىڭ سايكەس كەزەڭىنەن 7,3%-عا ارتىق. مۇناي بيتۋمى ءوندىرىسى 809 مىڭ توننا كولەمىندە, بۇل 2017 ج. سايكەس كەزەڭىنىڭ 147%-ىن, ال 2018 جىلدىڭ جوسپارىنا سايكەس 108% قۇرايدى.
ەلەكتر قۋاتىن ءوندىرۋ كولەمى 96,7 ملرد كۆتساع قۇرادى, بۇل 2017 جىلدىڭ سايكەس كەزەڭىمەن سالىستىرعاندا 4,8%-عا جوعارى.
ۋران ءوندىرۋ كولەمى 19,6 مىڭ توننا قۇرادى (2018 ج. جوسپارى – 21,6 مىڭ توننا, 11 ايعا جوسپار – 19,4 مىڭ توننا). بىلتىرعى جىلمەن سالىستىرعاندا 93% كورسەتتى. ال, 11 ايدىڭ جوسپارىنىڭ — 100,8%.
«وتىن-ەنەرگەتيكا سالاسى قارقىندى دامىپ كەلەدى. نەگىزگى كورسەتكىشتەرگە قول جەتكىزۋ مينيسترلىكتىڭ تۇراقتى باقىلاۋى مەن مونيتورينگىنە الىنعان», — دەپ تۇيىندەدى مينيستر ق. بوزىمباەۆ.
