فوتو: Pixabay
قازىرگى تاڭدا كۇيزەلىسكە تۇسكەن ازاماتتار الەۋمەتتىك جەلىلەر ارقىلى «پسيحولوگ» رەتىندە ءوزىن تانىستىراتىن, بىراق ءتيىستى ءبىلىمى مەن رۇقساتى جوق ماماندارعا جۇگىنەدى. ولار سوڭعى قاراجاتىن جۇمساپ, ۇزاق ۋاقىت بويى كەڭەس السا دا, جاعدايى جاقسارماۋى مۇمكىن. ال مۇنداي جاعدايعا شاعىمدانۋ مۇمكىندىگى جوق, سەبەبى بۇل سالا زاڭمەن رەتتەلمەگەن.
اسحات ايماعامبەتوۆتىڭ ايتۋىنشا, ەگەر تاعام دايىنداعان ادام حالىقتى ۋلاندىرسا – ول جاۋاپكەرشىلىككە تارتىلادى. ال ادامنىڭ تاعدىرىنا اسەر ەتەتىن جالعان پسيحولوگتار ءۇشىن ازىرگە ناقتى جاۋاپكەرشىلىك قاراستىرىلماعان. ەندى بۇل جاعداي تۇبەگەيلى وزگەرتىلەدى.
جاڭا زاڭ جوباسى شەڭبەرىندە بىرقاتار ماڭىزدى تالاپتار ەنگىزىلەدى. اتاپ ايتقاندا, پسيحولوگتاردىڭ بىرىڭعاي رەسمي رەەسترى جاسالادى, مامانداردىڭ ديپلومى مىندەتتى تۇردە تەكسەرىلەدى, سونداي-اق ولاردىڭ كاسىبي جاۋاپكەرشىلىگى ناقتى بەكىتىلەدى. سونىمەن قاتار كاسىبي قۇپيانى ساقتاۋ مىندەتى ەنگىزىلەدى, ال پسيحولوگ پەن پسيحياتردىڭ قىزمەتى ناقتى اجىراتىلاتىن بولادى.
دەپۋتاتتىڭ ايتۋىنشا, مەملەكەت ءۇشىن ادامنىڭ پسيحيكالىق ساۋلىعى – جاي تۇرمىستىق قىزمەت ەمەس, اسا جاۋاپتى جانە ماڭىزدى سالا. سوندىقتان بۇل باعىت زاڭمەن رەتتەلىپ, باقىلاۋعا الىنۋى ءتيىس.
نەگىزگى ماقسات – كومەك ىزدەگەن ءاربىر ازاماتقا قاۋىپسىز, ساپالى جانە كاسىبي پسيحولوگيالىق قولداۋ جۇيەسىن قامتاماسىز ەتۋ.
