بايقاۋ ىرىكتەۋىنە 8 بەن 12 جاس ارالىعىنداعى 3 578 بالا قاتىسىپ, 19 فيناليست ىرىكتەلىپ الىندى. قازاقستاننىڭ ءار وڭىرىنەن كەلگەن ىرىكتەۋ جەڭىمپازدارى «بالا داۋىسى استانا جۇرەگىندە» كونتسەرتتىك باعدارلاماسىندا ۆوكالدىق شەبەرلىكتەرىن كورسەتتى.
سالتاناتتى ماراپاتتاۋ كەشىندە ءسوز سويلەگەن قور قۇرىلتايشىسى ءاليا نۇرسۇلتانقىزى وسكەلەڭ ۇرپاقتى وتانشىلدىققا تاربيەلەپ, زياتكەرلىك جانە تۇلعالىق الەۋەتىن دامىتۋدا ماڭىزى زور جوبانىڭ قاجەتتىلىگى تۋراسىندا ءسوز قوزعادى.
«قازىر ماتەريالدى قۇندىلىقتار سالتانات قۇرعان زاماندا ءومىر ءسۇرىپ جاتىرمىز. سول سەبەپتى «بالا داۋىسى» سياقتى ومىرشەڭ جوبالار اۋاداي قاجەت. ءبىز مۇندا سۇلۋلىق پەن قۋانىش الەمىمەن قاۋىشىپ, شىنايى ونەرمەن سۋسىندايمىز. ءتورت بالانىڭ اناسى رەتىندە بالالارىم رۋحاني قۇندىلىقتى بارىنەن جوعارى قوياتىن ورتادا ءومىر سۇرسە دەيمىن. ول الەمدى جاسايتىن دا ءوزىمىز. بارلىعىن وزىمىزدەن باستاۋىمىز كەرەك. مەيىرىمدى ادامداردىڭ قولىنان ۇلى ىستەر كەلەدى!», دەدى بايقاۋدىڭ يدەيا اۆتورى ءاليا نۇرسۇلتانقىزى.
تەلەكورەرمەندەر ءبىر اي بويى بالالاردىڭ ونەرىن تاماشالاپ, وزدەرىنە ۇناعان ۇمىتكەرگە داۋىس بەرە وتىرىپ, «حالىق سۇيىكتىسى» ارنايى يەگەرى رەتىندە ماڭعىستاۋلىق ديلناز تىلەپوۆانى لايىق دەپ تانىدى. بايقاۋدىڭ كاسىبي قازىلار القاسى قۇرامىندا مايرا مۇحامەدقىزى, جەڭىس سەيدوللا ۇلى, ايقىن تولەپبەرگەن, دانيار وتەگەن, جانار دۇعالوۆا, اسەم جاكەتاەۆا جانە سەرىك يبراگيموۆ سەكىلدى تانىمال ونەرپازدار تورەلىك ەتتى. شىعىسقازاقستاندىق ماۋلەن احمەتقاليەۆ, الماتىدان كەلگەن تەمىرلان وسىمقۇل جانە سولتۇستىكقازاقستاندىق ءامينا جاپار العاشقى ءۇش ورىندى ءوزارا ءبولىستى. بارلىق فيناليست «بالا داۋىسىنىڭ» سيمۆولى – «عاجايىپ نوتا» جۇلدەسىمەن ماراپاتتالىپ, ەستەلىك سىيلىقتاردى ارقالاپ قايتتى.
ءاليا نازارباەۆانىڭ «جاندانۋ الەمى» قورىنىڭ ۇيىمداستىرۋىمەن ەلىمىزدىڭ دارىندى بالالارىنا ارنالعان اۋقىمدى جوبا مادەنيەت جانە سپورت مينيسترلىگىنىڭ, قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ قولداۋىمەن ءوتتى. «بالا داۋىسىنىڭ» ءتورتىنشى ماۋسىمى 2019 جىلدىڭ ناۋرىز ايىندا قوستانايدا جالعاسىن تابادى.
ايا ءومىرتاي,
«ەگەمەن قازاقستان»
