ەۋرازيا ۇلتتىق ۋنيۆەرسيتەتى مەن قازاقستان رەسپۋبليكاسىنىڭ ۇلتتىق ۇلانى بىرلەسىپ ۇيىمداستىرعان شارانىڭ نەگىزگى ماقساتى اسكەري جۋرناليستەردى دايارلاۋ جانە اراداعى بايلانىستى ودان ءارى نىعايتۋ بولدى.
اۋقىمدى شاراعا ەۋرازيا ۇلتتىق ۋنيۆەرسيتەتىنىڭ پرورەكتورى ديقان قامزابەك ۇلى, ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, گەنەرال-مايور مۇحامەتقالي ساتوۆ, جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق, ۋنيۆەرسيتەت وقىتۋشىلارى مەن ستۋدەنتتەرى, ۇلتتىق ۇلاننىڭ اسكەري قىزمەتشىلەرى مەن ارداگەرلەر, اسكەري باسىلىم باسشىلارى قاتىستى.
كونفەرەنتسيا اياسىندا ەۋرازيا ۇلتتىق ۋنيۆەرسيتەتى مەن ۇلتتىق ۇلان اراسىنداعى ىنتىماقتاستىق تۋرالى مەموراندۋمعا قول قويىلىپ, جۋرناليستيكا جانە ساياساتتانۋ فاكۋلتەتىندە ۇلتتىق ۇلاننىڭ اسكەري جۋرناليستيكا اۋديتورياسىنىڭ اشىلۋ سالتاناتى ءوتتى.
سالتاناتتى جيىن بارىسىندا گەنەرال-مايور مۇحامەتقالي ساتوۆ مەموراندۋمنىڭ ءمان-ماڭىزىنا توقتالىپ ءوتتى. «بۇگىن 1 جەلتوقسان –تۇڭعىش پرەزيدەنت كۇنىنە وراي وتە اۋقىمدى شارا وتكىزىپ جاتىرمىز. ۇلتتىق ۇلاننىڭ اسكەري جۋرناليستيكا اۋديتورياسىن اشۋ – ەڭ الدىمەن, ەلباسى ماقالالارىنداعى جاستاردى پاتريوتيزم مەن وتانسۇيگىشتىك رۋحتا تاربيەلەۋ باعىتىنداعى العاشقى قادامىمىز. ەكىنشىدەن, ءبىز ىنتىماقتاستىق تۋرالى مەموراندۋمعا قول قويدىق. بۇل مەموراندۋمنىڭ نەگىزگى ماقساتى – ەۋرازيا ۇلتتىق ۋنيۆەرسيتەتىنىڭ ستۋدەنتتەرى مەن اسكەري قىزمەتكەرلەر اراسىندا يدەولوگيالىق-تاربيەلىك جۇمىستاردى بىرلەسىپ ۇيىمداستىرۋ», دەدى ول.
فاكۋلتەت دەكانى قايرات ساقتىڭ ايتۋىنشا, مۇنداي باستامالار ساپالى مامان دايىنداۋعا مۇمكىندىك بەرەدى. «قازىر سالالىق جۋرناليستەردى دايىنداۋ باعىتىندا كوپتەگەن جۇمىستار جۇرگىزىلۋدە. سونىڭ ءبىرى – اسكەري جۋرناليستەردى دايىنداۋ. ءبىز بولاشاقتا جاڭا وقۋ باعدارلاماسىن جۇزەگە اسىرۋدى جوسپارلاپ وتىرمىز. وسى كەزگە دەيىن اسكەري جۋرناليستەر باسقا ەلدەردىڭ كومەگىمەن دايىندالىپ كەلدى. ەندى تاۋەلسىز ەلدە ءوز اسكەري جۋرناليستەرىمىزدى ءوزىمىز دايىنداۋىمىز كەرەك. وسىنداي ارنايى باعدارلامالار باسەكەگە قابىلەتتى مامان دايىنداۋعا نەگىز بولادى».
كونفەرەنتسيادا اسكەري جۋرناليستيكانىڭ تاريحىنان باستاپ, ونىڭ اقپاراتتىق كەڭىستىكتەگى ءرولى, دامۋ تەندەنتسياسى تالقىلاندى.
شارا ۇلتتىق ۇلاننىڭ ءان-بي ءانسامبلىنىڭ ۇجىمى دايىنداعان « ۇلى دالا ۇلاندارى» اتتى كونتسەرتتىك باعدارلامامەن اياقتالدى.
قارلىعاش قۇرامىس,
«ەگەمەن قازاقستان»
