وڭىردە اۋىل شارۋاشىلىعى كووپەراتيۆتەرىنىڭ سانى بار, ساپاسى جوق. ناتيجەسىندە وبلىستا اشىلعان 124 كووپەراتيۆتىڭ قازىر 30-ىڭ جۇمىسى توقتاپ قالعان. تىركەلگەن 51- كووپەراتيۆ جۇمىس ىستەمەيدى.
مىسالى, جەلەزين اۋدانىندا 5 كووپەراتيۆتىڭ بىردە-ءبىرى جۇمىس جاساي الماعان. وبلىس ورتالىعىنداعى 5 كووپەراتيۆتىڭ ەكەۋى, ۋسپەن اۋدانىندا 12-كووپەراتيۆتىڭ 5 جۇمىسىن توقتاتىپتى.
جەرگىلىكتى اكىمدىكتەر شيكىزات جوق,كووپەراتيۆتەر باعىتىن باسقا سالاعا وزگەرتۋ قاجەت دەگەن سىلتاۋلارمەن بايلانىستىردۋدا.
سوندىقتان, وبلىس اكىمى بولات باقاۋوۆ جۇمىس ىستەمەيتىن, جۇمىس ىستەي المايتىن اۋىل شارۋاشىلىعى كووپەراتيۆتەرىنەن ەندى پايدا جوق ەكەنىن, جابۋ كەرەكتىگىن ايتتى.
ال, جالپى وڭىردە اگروونەركاسىپتىك كەشەندى دامىتۋعا بيىل قايتارىمسىز 10 ملرد. تەڭگە سۋبسيديا, قارجى ينستيتۋتتارى ارقىلى 11 ملرد. تەڭگە جەڭىلدەتىلگەن نەسيە بەرىلىپتى. بىراق, مەملەكەتتىك قولداۋعا يە بولعان شارۋاشىلىقتاردا اشىلعان جاڭا جۇمىس ورىندارى, الەۋمەتتىك جاۋاپكەرشىلىك, تولەيتىن سالىق كولەمى مەن جۇمىسشىلاردىڭ جالاقىسى تۋرالى اقپاراتتار بايقالمايدى.
وبلىس اكىمدىگىنىڭ مالىمەتىنشە, اقسۋ قالاسى مەن شارباقتى, ەرتىس اۋداندارىندا وسىمدىك شارۋاشىلىعى ونىمدەرىنىڭ ازايعان. جالپى, بيىل 900,5 مىڭ توننا ءداندى داقىل جينالىپتى. استىق قابىلدايتىن كاسىپورىنداردا 127,6 مىڭ توننا استىق بار. جەرگىلىكتى اۋىل شارۋاشىلىعى ونىمدەرىنىڭ 301 مىڭ تونناسى سىرتقى نارىققا ساتىلىپتى.
فاريدا بىقاي,
«ەگەمەن قازاقستان»
پاۆلودار
