ەلباسى قازاقستاندىقتاردىڭ ءال-اۋقاتى مەن تۇرمىس ساپاسىن ارتتىرۋ ۇكىمەتتىڭ نەگىزگى مىندەتى سانالاتىنىن ايتتى.
– مەملەكەت جىل سايىن الەۋمەتتىك سالانى قارجىلاندىرۋ كولەمىن ارتتىرىپ, مىندەتتەمەلەردىڭ ءبارىن ورىنداپ كەلەدى. بيىل وسى ماقساتتارعا 2,6 تريلليون تەڭگە ءبولىندى. بۇل بىلتىرمەن سالىستىرعاندا 21,3 پايىزعا كوپ, – دەدى قازاقستان پرەزيدەنتى.
مەملەكەت باسشىسى تۇرعىنداردىڭ تۇرمىس ساپاسى مەن تابىسىن ارتتىرۋعا ارنالعان بيىلعى جولداۋدا ەڭ تومەنگى جالاقى مولشەرىن كوبەيتۋ ءۇشىن شارالار كەشەنى قامتىلعانىن ەرەكشە اتاپ ءوتتى.
– 2019 جىلعى 1 قاڭتاردان باستاپ تومەن جالاقى الاتىن ەڭبەككەرلەردىڭ, سونىڭ ىشىندە ازاماتتىق قىزمەتشىلەردىڭ ەڭبەكاقىسى 1,5 ەسە وسەدى. سونداي-اق, اكىمشىلىك, كومەكشى جانە تەحنيكالىق قىزمەت كورسەتەتىن قىزمەتكەرلەردىڭ جالاقىسى ارتادى. ەكونوميكانىڭ بارلىق سالاسىنداعى تومەن جالاقى الاتىن 1,3 ميلليون جالدامالى جۇمىسشىلاردىڭ جالاقىسى ورتاشا ەسەپپەن 30 پايىزعا كوبەيەدى, – دەدى نۇرسۇلتان نازارباەۆ.
ەلباسى الەۋمەتتىك قامسىزداندىرۋدىڭ مەملەكەتتىك جۇيەسىنە ءوزىن-ءوزى جۇمىسپەن قامتىعان تۇرعىنداردى تارتۋ ماقساتىمەن جىل باسىنان بەرى 2,7 ميلليون ادامنىڭ 1,8 ميلليونىنىڭ مارتەبەسى جاڭارتىلعانىن ايتتى. مەملەكەت باسشىسى 2019 جىلدان باستاپ قازاقستاننىڭ جۇمىس ىستەيتىن بارلىق ازاماتتارى ءۇشىن بىرىڭعاي جيىنتىق تولەم ەنگىزۋ جوسپارلانىپ وتىرعانىن اتاپ ءوتتى.
– 2018 جىلعى 1 قاڭتاردان باستاپ تۇرمىسى تومەن وتباسىلار ءۇشىن اتاۋلى الەۋمەتتىك كومەكتىڭ جاڭا فورماتىن ەنگىزدىك. سونىڭ ارقاسىندا بيىلعى 10 ايدىڭ ىشىندە 103 مىڭعا جۋىق وتباسى نەمەسە 534 مىڭ ادام مەملەكەتتىك قولداۋ شارالارىمەن قامتىلدى, – دەدى قازاقستان پرەزيدەنتى.
سونىمەن قاتار, مەملەكەت باسشىسى ءتيىستى ۆەدومستۆو جەتەكشىسىنە بەرىلەتىن شاعىن نەسيە سانىن كوبەيتۋ قاجەتتىگىن جانە ولاردىڭ حالىققا قول جەتىمدىلىگىن ارتتىرۋدىڭ ماڭىزدىلىعى تۋرالى ايتتى.
– وسى جىلدىڭ سوڭىنا دەيىن ەڭ تومەنگى جالاقى مولشەرىن ءبىر جارىم ەسە وسىرەتىن زاڭنىڭ قابىلدانۋىن قامتاماسىز ەتۋ قاجەت. مينيسترلىك جانە اكىمدىكتەر جۇمىس بەرۋشىلەردىڭ ەڭ تومەنگى جالاقى مولشەرىن ارتتىرۋىن قامتاماسىز ەتۋ ءۇشىن باقىلاۋ ورناتىپ, ءتيىستى ءتۇسىندىرۋ جۇمىستارىن جۇرگىزۋ جونىندە شارالار قابىلداۋى كەرەك. 1,3 ميلليون ازاماتىمىزدىڭ جالاقىسى ناقتى كوبەيۋگە ءتيىس, – دەدى نۇرسۇلتان نازارباەۆ.
ەلباسى 2019 جىلدىڭ 1 قاڭتارىنان باستاپ جاسىنا بايلانىستى بەرىلەتىن زەينەتاقى تولەمدەرىن 7 پايىزعا, سونداي-اق مۇگەدەكتىگى بويىنشا جانە اسىراۋشىسىنان ايىرىلعان جاعدايدا بەرىلەتىن مەملەكەتتىك الەۋمەتتىك جاردەماقىلار كولەمىن 5 پايىزعا ارتتىرۋ قاجەت ەكەنىنە توقتالدى.
باسقوسۋ بارىسىندا الەۋمەتتىك ساقتاندىرۋ ماسەلەلەرى دە تالقىلاندى. وسىعان وراي, ەڭبەك ەتۋ قابىلەتىن جوعالتۋىنا, جۇمىستان بوساپ قالۋىنا نەمەسە اسىراۋشىسىنان ايرىلۋىنا بايلانىستى بەرىلەتىن الەۋمەتتىك تولەماقىنىڭ ورتاشا كولەمىن 30 پايىزعا ارتتىرۋدى قامتاماسىز ەتۋ كەرەكتىگى ايتىلدى.
قازاقستان پرەزيدەنتى مۇگەدەكتەر ساناتىنا جاتاتىن ازاماتتاردىڭ ءوزىن-ءوزى تانىتۋى جانە تولىققاندى ينتەگراتسياسى ءۇشىن جاعداي جاساۋ ماقساتىمەن مۇمكىندىگى شەكتەۋلى ادامداردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندە جاڭا ۇلتتىق جوسپار ازىرلەۋدى تاپسىردى. بۇل قۇجات مۇگەدەكتىكتىڭ الدىن الۋ, كەڭ اۋقىمداعى ينكليۋزيۆتى ءبىلىم بەرۋدى ەنگىزۋ, ەرەكشە مۇقتاج جاندارعا ارنالعان بارلىق الەۋمەتتىك جانە كولىك ينفراقۇرىلىمىن بەيىمدەۋ جونىندەگى شارالاردى, سونداي-اق, جۇمىس بەرۋشىلەر مەن بيزنەستىڭ مۇگەدەكتەردى جۇمىسپەن قامتۋ ىسىنە بەلسەندى اتسالىسۋىن قامتاماسىز ەتۋ جونىندەگى تەتىكتەردى قامتيدى.
مەملەكەت باسشىسى تسيفرلىق ەكونوميكاعا جانە 4.0 يندۋسترياسىنا كوشۋىمىزگە بايلانىستى ەڭبەك رەسۋرستارىنىڭ ساپاسىنا قويىلاتىن تالاپتاردىڭ كۇشەيگەنىنە نازار اۋداردى.
– ساپالى جۇمىس ورىندارىن اشۋ ءۇشىن ەڭبەك نارىعىن دامىتۋدىڭ جاڭا تاسىلدەرىن ازىرلەۋ كەرەك. 2025 جىلعا قاراي قوسىمشا 2 ميلليونعا جۋىق جاس مامان ەڭبەك نارىعىنا شىعادى دەپ بولجانىپ وتىر. جاستارىمىزدى ءتيىستى جۇمىس ورىندارىمەن قامتاماسىز ەتۋ ماڭىزدى, – دەدى قازاقستان پرەزيدەنتى.
جيىن سوڭىندا نۇرسۇلتان نازارباەۆ پرەزيدەنت اكىمشىلىگىنە بەرىلگەن تاپسىرمالاردىڭ ورىندالۋىن باقىلاۋعا الۋدى تاپسىردى.
