فوكۋس قازاقستان رۋحاني جاڭعىرۋ باعدارلاماسى اياسىندا جۇزەگە اسىپ جاتقان «زاماناۋي قازاقستاندىق مادەنيەت - جاھاندىق الەمدە» اتتى ارنايى جوباسىنىڭ ءبىر بولىگى بولىپ تابىلادى.
فوكۋس قازاقستان جوباسىنىڭ كۋراتورى روزا ابەنوۆانىڭ ايتۋىنشا, جوبا حالىقارالىق ارەناداعى قازاقستاننىڭ زاماناۋي بەينەلەۋ ونەرىن اۋقىمدى كورسەتە العان ۇيىمداستىرۋ تاجىريبەسىنىڭ العاشقى جانە تابىستى مىسالى بولا الادى. 4 قالادا (لوندون, بەرلين, دجەرسي سيتي, سۋۆون) 400-گە جۋىق جۇمىس جانە 94 سۋرەتشىنىڭ مۇراعاتتىق قۇجاتتارى كورسەتىلدى. جوبانىڭ سوڭىندا ءار كورمە بويىنشا كاتالوگتار شىعارىلادى.
«ەۋرازيالىق ۋتوپيا: Post Scriptum» كورمەسى كەڭەستىك كەزەڭنىڭ جانە قازىرگى زامانعى سۋرەتشىلەردىڭ شىعارماشىلىعىن زەردەلەۋ, كوركەمدىك ءداستۇردىڭ جالعاسى مەن ءۇزىلۋىن كورسەتۋ, رەسپۋبليكامىزدىڭ تاۋەلسىزدىگى كەزەڭىندەگى قازىرگى زامانعى ونەردىڭ دۇنيەگە كەلۋىن, جاڭا ديسكۋرستار مەن مەديانىڭ پايدا بولۋىن زەرتتەۋ ارقىلى قازاقستاندىق ونەردىڭ ءنارراتيۆىن انىقتاۋعا تىرىسادى. ۇلتتىق سۋرەت ونەرى مەكتەبىنىڭ ەرەكشەلىكتەرى, «جەرگىلىكتى مودەرنيزم» فەنومەنى جانە تاۋەلسىزدىك كەزەڭىندەگى ونەر – وسى كورمەنىڭ باستى تاقىرىپتارى. كورمەدە ۇكى اجيەۆتىڭ, ولگا كۋجەلەنكونىڭ, ساليحيتدين ايتباەۆتىڭ, جاڭاتاي شاردەنوۆتىڭ, ەۆگەني سيدوركيننىڭ, الەكسەي ستەپانوۆتىڭ, ميحايل كيمنىڭ, بوريس پاكتىڭ, ءابدىراشيت سىدىحانوۆتىڭ, رۋستام ءحالفيننىڭ, سەرگەي ماسلوۆتىڭ, ساكەن نارىنوۆتىڭ, سەرىكباي ءالجانوۆتىڭ, ەربوسىن مەلدىبەكوۆتىڭ, ەلەنا مەن ۆيكتور ۆوروبەۆتاردىڭ, الەكساندر ۋگايدىڭ, باقىت بۇبىقانوۆتىڭ, الىبەك مەرگەنوۆتىڭ, ساۋلە دۇيسەنبينانىڭ, نۇربول نۇراحمەتتىڭ جانە باسقالارىنىڭ شىعارمالارى ۇسىنىلدى.
«ەۋرازيالىق ۋتوپيا: Post Scriptum» كورمەسىنىڭ جەتەكشىلەرى: سوروكينا يۋليا (قازاقستان), شين ىن يانگ (وڭتۇستىك كورەيا). يۋليا سوروكينا جەرگىلىكتى مودەرنيزم فەنومەنىن, سۋرەتشىلەردىڭ مودەرنيزم مۇراسىن سەزىنۋى مەن ونىڭ ءوز تاجىريبەلەرىمەن ۇشتاستىرۋىن اتاپ كورسەتەدى. شين ىن يانگتىڭ ايتۋىنشا, «قازاقستان كورەيامەن تاريحي تۇرعىدان تىعىز بايلانىسقان, بىراق, ءبىز قازاقستاننىڭ ونەرى مەن مادەنيەتى تۋرالى تىم از بىلەمىز. قازاقستان ونەرىنىڭ العاشقى كورمەسىنىڭ ارقاسىندا ءبىزدىڭ ول تۋرالى كوبىرەك بىلۋىمىزگە مۇمكىندىك تۋدى».
فوكۋس قازاقستان جوباسىن قر ۇلتتىق مۋزەيى مەن قر مادەنيەت جانە سپورت مينيسترلىگى ۇيىمداستىردى.
كورمە 2019 جىلدىڭ 3 ناۋرىزىنا دەيىن جالعاسادى.
