– باقىت مۇلحايدارقىزى, ءسىزدى جانە زاۋىت باستاۋىش پارتيا ۇيىمىنىڭ بارلىق مۇشەلەرىن «نۇر وتان» پارتياسى رەسپۋبليكالىق كونكۋرسىندا جەڭىسكە جەتۋلەرىڭىزبەن قۇتتىقتايمىز! ارينە, بۇل بۇكىل ء«اتموز» جشس ەڭبەك ۇجىمىنىڭ جەتىستىگى ەكەندىگى داۋسىز...
– كوپ راحمەت. ارينە, بۇل ءبىزدىڭ كاسىپورىن ەڭبەككەرلەرىنىڭ جەڭىسى. ولاردىڭ كوپشىلىگى «نۇر وتان» پارتياسىنىڭ مۇشەلەرى. وسىعان وراي زاۋىتتىڭ باس ديرەكتورى عالىمجان جىرشىبەك ۇلى امانتۋرلين باستاعان بارلىق پارتيالاستارىمدى وسىنداي ۇلكەن جەتىستىككە جانە قۇرمەتكە جەتكىزگەن بىرلەسكەن ءتيىمدى جۇمىسىمىز ءۇشىن, ورتاق ماقسات جولىنداعى جۇمىستا كورسەتكەن قولداۋلارى مەن تۇسىنىستىكتەرى ءۇشىن زور العىسىمدى بىلدىرەمىن.
– كونكۋرس جەڭىمپازدارى قانداي ولشەمدەر بويىنشا انىقتالدى؟
– ارينە, ەڭ باستى ولشەم بپۇ-لاردىڭ قوعامدىق ومىرگە, اتاپ ايتقاندا, پارتيالىق جوبالاردى ءىس جۇزىنە اسىرۋداعى بەلسەندىگى. ءوزىڭىز بىلەسىز, «نۇر وتان» پارتياسى بىرقاتار الەۋمەتتىك جوبالاردىڭ باستاماشىسى. اتاپ ايتقاندا, «اعا بۋىنعا قالتقىسىز قامقورلىق», «كەدەرگىسىز بولاشاق», «باقىتتى وتباسى – باقىتتى بالالىق شاق», «جاستار ەلىمىز ءۇشىن», «ومىرگە جولداما» جانە باسقا جوبالار بار. ءبىزدىڭ باستاۋىش ۇيىمىمىز وسى جانە باسقا دا جوبالاردى ءىس جۇزىنە اسىرۋ بارىسىندا ەرەكشە بەلسەندىلىك تانىتتى.
– پارتيانى جاڭعىرتۋ قانداي دارەجەدە جۇرگىزىلىپ جاتىر جانە وسىعان بايلانىستى بپۇ الدىندا تۇرعان مىندەتتەر قانداي؟
– فورۋم جۇمىسىنا 600-دەن استام دەلەگات قاتىستى. سونىمەن بىرگە 1 مىڭ ادام بەينە-كونفەرەنتسيا بايلانىسى ارقىلى فورۋم جۇمىسىنا قاتىستى. وسى فورۋمدا «نۇر وتان» پارتياسىنىڭ 20 جىلدىق مەرەيلى مەرەكەسىنە بايلانىستى اتقارىلاتىن شارالار باستاۋ الدى. باستاۋىش پارتيا ۇيىمدارىنىڭ مۇشەلەرىنە مەملەكەت باسشىسى نۇرسۇلتان نازارباەۆ ءسوز ارنادى. ەلباسىنىڭ قۇتتىقتاۋ ءسوزىن «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ فورۋمعا قاتىسۋشىلارعا وقىپ بەردى. ەلباسى اتالعان فورۋم پارتيا جۇمىسىن جاڭعىرتۋ ۇردىستەرىنە جاڭا جىگەر جانە تىڭ سەرپىلىس بەرۋدە ماڭىزدى قادام بولىپ تابىلاتىندىعىنا سەنىم ءبىلدىردى. كادر رەزەرۆتەرىن قالىپتاستىرۋدا باستاۋىش پارتيا ۇيىمدارى شەشۋشى ءرول اتقارىپ, قوعامدىق ۇيىمدارمەن جانە ازاماتتارمەن جۇمىس جۇرگىزۋدە كوشباسشى بولماق. فورۋم بارىسىندا پارتيالىق جۇمىستاردىڭ تيىمدىلىگىن ارتتىرۋ تۋرالى ماۋلەن اشىمباەۆ تا جان-جاقتى اڭگىمە قوزعادى.
– الدىن الا بەلگىلى بولعانىنداي, فورۋم بارىسىندا بپۇ-لاردىڭ قىزمەتىن جەتىلدىرۋگە باعىتتالعان تۇجىرىمداما تالقىلاندى. وسى ورايدا نە ايتاسىز؟
– ءيا, جاڭا قۇجات بويىنشا الداعى ۋاقىتتا جۇمىس بەس باعىت بويىنشا جۇرگىزىلەدى. پارتياعا قابىلدانعىسى كەلەتىن ۇمىتكەرلەرگە تالاپ ەداۋىر ارتاتىن بولادى. قۇجاتتاردى تاپسىرۋ كەستەسى جەڭىلدەتىلەدى. ۇمىتكەرلەرگە كەپىلدەمە بەرەتىن تۇلعالاردىڭ جاۋاپكەرشىلىگىن كۇشەيتۋ جوسپارلانۋدا. الداعى ۋاقىتتا ۇمىتكەر پارتياعا ءوتۋ تۋرالى ءوتىنىشتى ەلەكتروندى پورتال ارقىلى جىبەرە الادى. پارتيا مۇشەلەرى ءۇشىن تاعى ءبىر جاڭالىق ەندى ۇمىتكەرلەر «سىناق مەرزىمىنەن» وتەتىن بولادى. پارتياعا قابىلدانۋ ءۇشىن ءوتىنىش بەرگەن كۇننەن باستاپ, بپۇ جينالىسىندا قابىلدانعانعا دەيىنگى مەرزىمدە ۇمىتكەرلەرگە پارتيا مۇشەلىگىنە «كانديدات» دارەجەسى بەرىلەدى. كادر رەزەرۆتەرىن قالىپتاستىرۋدا جاڭا تالاپتار قويىلادى. كادر رەزەرۆىنە بپۇ-لاردىڭ ەڭ بەلسەندى وكىلدەرى قابىلدانادى. ولاردى ىرىكتەۋ ولشەمى – ۇمىتكەرلەردىڭ پارتيا باستاماشى بولعان جوبالارعا قاتىسۋداعى بەلسەندىلىگى, جوعارى رەيتينگى جانە جۇمىسىنىڭ تيىمدىلىگى. 2018 جىلدىڭ سوڭىنا دەيىن ورتالىق اپپاراتتىڭ جانە پارتيا فيليالدارىنىڭ پارتيالىق جەتەكشى لاۋازىمدارىنا, سونىمەن بىرگە بارلىق دارەجەدەگى ءماسليحاتتاردىڭ دەپۋتاتتارىنا رەزەرۆتەر قۇرىلادى. كەلەسى جىلدان باستاپ اۋداندىق, وبلىستىق جانە رەسپۋبليكالىق دارەجەدەگى رەزەرۆ قالىپتاستىرىلادى. باستاۋىش ۇيىمداردىڭ بەلسەندىلەرى تۇرعىنداردىڭ وتكىر پروبلەمالارىن انىقتاۋمەن جانە ءتيىمدى شەشۋمەن اينالىسادى. پارتيانى جۇيەلى جاڭعىرتۋ شەڭبەرىندە تسيفرلى تەحنولوگيانى جانە زاماناۋي كوممۋنيكاتسيالىق جەلىلەردى بەلسەندى تۇردە پايدالانۋ شارالارى جۇزەگە اسىرىلادى. بىرىڭعاي اقپاراتتىق («ە-ينفو») پورتالىن بەلگىلەۋ جانە قولدانۋ جوسپارلانۋدا. پارتيانىڭ ىشكى كوممۋنيكاتسيالىق جۇمىستارىن جەتىلدىرەتىن جانە بيۋروكراتتىق ۇردىستەردى بارىنشا ازايتاتىن 11 كىشى جەلىدەن قۇرالعان «تسيفرلى پارتيا» جاڭا اقپاراتتىق جۇيەسى ەنگىزىلەدى. ءبىر اۋماقتا ورنالاسقان بپۇ-نىڭ سانىن 3 ادامنان 30 (نەمەسە 50) ادامعا دەيىن كوبەيتىپ, وڭتايلاندىرۋ جوسپارلانۋدا.
اتىراۋ وبلىسىنىڭ دەلەگاتسياسى فورۋمنان مول تاجىريبە جيناقتاپ قايتتى. الداعى ۋاقىتتا ءبىز وسى يگى تاجىريبەلەردى ءوزىمىزدىڭ جۇمىسىمىزدا جان-جاقتى ىسكە اسىراتىن بولامىز.
– اڭگىمەڭىز ءۇشىن راحمەت.
اڭگىمەلەسكەن
جىلقىباي جاعىپار ۇلى,
«ەگەمەن قازاقستان»
